ដោយ៖ លក្ខិណា
ភ្នំពេញ៖ កូរ៉េខាងត្បូង តាមរយៈទីភ្នាក់ងារជំរុញពាណិជ្ជកម្ម និងវិនិយោគកូរ៉េ (KOTRA) បានរៀបចំបង្ហាញនូវទំនិញសក្ដានុពលរបស់ខ្លួន ដើម្បីស្វែងរកឱកាសទីផ្សារនៅក្នុងប្រទេសកម្ពុជា ក្នុងគោលបំណងនាំចូលមកផ្គត់ផ្គង់ និងដើម្បីដោះដូរទំនិញជាមួយកម្ពុជាបន្ថែម។
លោក Lee Chi Ho នាយកគ្រប់គ្រងនៃភ្នាក់ងារជំរុញពាណិជ្ជកម្ម និងវិនិយោគកូរ៉េប្រចាំនៅកម្ពុជានៃក្រសួងពាណិជ្ជកម្មសាធារណរដ្ឋកូរ៉េ បានឱ្យដឹងនៅថ្ងៃទី៥ ខែកុម្ភៈ ឆ្នាំ២០២១ថា ទំនាក់ទំនងពាណិជ្ជកម្មរវាងកម្ពុជា និងកូរ៉េ កាន់តែមានភាពប្រសើរឡើង ដោយក្នុងឆ្នាំកន្លងទៅនេះចរន្ត នៃការដោះដូរទំនិញ រវាងប្រទេសទាំងពីរ នៅតែមាន បើទោះបីជាស្ថិតក្នុងដំណាក់កាលនៃការរាតត្បាតជំងឺកូវីដ-១៩ ជាសកលយ៉ាងណាក៏ដោយ។
លោកបន្តថា KOTRA បាននិងកំពុងណែនាំ និងជំរុញការនាំចូលនូវផលិតផលណា ដែលល្អចូលមកកាន់ទីផ្សារប្រទេសកម្ពុជាបន្ថែមទៀត ខណៈកិច្ចព្រមព្រៀងពាណិជ្ជកម្មសេរី (FTA) ទ្វេភាគីរវាងកម្ពុជា-កូរ៉េ នឹងជួយពង្រឹងទំនាក់ទំនង និងពង្រីកទំហំពាណិជ្ជកម្ម នៃប្រទេសទាំងពីរបន្ថែមទៀត។
លោកបន្ថែមថា កន្លងមក កូរ៉េបាននាំចូលមកកម្ពុជា មានដូចជារថយន្ត គ្រឿងយន្ត ផលិតផលសំអាង គ្រឿងអេឡិចត្រូនិក ភេសជ្ជៈ និងផលិតផលប្រើប្រាស់ជាច្រើនទៀត ដែលមានការនិយមគាំទ្រ ពីប្រជាពលរដ្ឋកម្ពុជា។
កាលពីពេលថ្មីៗនេះដែរ កម្ពុជា និងកូរ៉េខាងត្បូង បានប្រកាសបញ្ចប់ការចរចាកិច្ចព្រមព្រៀងពាណិជ្ជកម្មសេរីជាផ្លូវការ និងរង់ចាំការចុះហត្ថលេខារវាងភាគីទាំងពីរ នៅអំឡុងខែមិថុនា ឆ្នាំ២០២១នេះ។ កិច្ចព្រមព្រៀងពាណិជ្ជកម្មសេរីនេះ រំពឹងថានឹងចូលជាធរមាននៅក្នុងឆ្នាំ២០២១នេះដែរ។
តាមរយៈកិច្ចព្រមព្រៀងពាណិជ្ជកម្មសេរីកម្ពុជា និងកូរ៉េខាងត្បូង នឹងជួយបង្កើនទំហំពាណិជ្ជកម្ម ការវិនិយោគរវាងប្រទេសទាំងពីរបន្ថែមទៀត ដោយកម្ពុជានឹងបង្កើនការនាំចេញរបស់ខ្លួន ទៅកាន់ប្រទេសកូរ៉េបន្ថែម និងកូរ៉េក៏អាចនាំទំនិញរបស់ខ្លួនចូល មកកាន់ទីផ្សារប្រទេសកម្ពុជាបន្ថែមបានដូចគ្នា៕
