ដោយៈសុខុម
គូឡាឡាំពួ: ប្រទេសម៉ាឡេស៊ី បានជំរុញឱ្យឧស្សាហកម្មនានា និងពលរដ្ឋអនុវត្តឱ្យបានម៉ឺងម៉ាត់តាមគោលការណ៍ប្រតិបត្តិស្តង់ដារ (SOP) ដោយស្មារតីយោគយល់ ក្រោយរដ្ឋាភិបាល បានសម្រេចអនុញ្ញាតឱ្យអាជីវកម្មភាគច្រើន បើកដំណើរការធម្មតា អំឡុងពេលរឹតបន្តឹងការធ្វើដំណើរ។ នេះបើយោងតាមការចុះផ្សាយរបស់សារព័ត៌មាន CNA។
ក្នុងសុន្ទរកថាចាក់ផ្សាយតាមកញ្ចក់ទូរទស្សន៍កាលពីថ្ងៃព្រហស្បតិ៍ ទី៤ កុម្ភៈ លោកនាយករដ្ឋមន្ត្រី Muhyiddin Yassin បានថ្លែងថា រដ្ឋាភិបាលសុខចិត្តស្ដាប់តាមមតិរបស់ពលរដ្ឋ មិនបិទសេដ្ឋកិច្ចអំឡុងពេលអនុវត្តន៍ វិធានការរឹតបន្តឹងការធ្វើដំណើរ។
លោកថ្លែងថា “សូមមេត្តាឆ្លើយតបកាយវិការនេះ ដោយស្មារតីយោគយល់តាមរយៈការអនុវត្តឱ្យបានម៉ឺងម៉ាត់ តាមគោលការណ៍ SOP ដើម្បីឱ្យយើងអាចធានាបានថា អាជីវកម្ម និងពាណិជ្ជកម្មនឹងនៅតែអាចបន្តដំណើរការ ហើយទន្ទឹមនេះក៏ជួយទប់ស្កាត់ការឆ្លងរាតត្បាតវីរុសកូវីដ-១៩ នៅកន្លែងធ្វើការ និងនៅក្នុងសហគមន៍ផងដែរ” ។
កាលពីខែមុន វិធានការរឹតបន្តឹងការធ្វើដំណើរ ត្រូវបានដាក់ឱ្យអនុវត្តឡើងវិញនៅគ្រប់រដ្ឋទាំងអស់លើកឡើងតែរដ្ឋ Sarawak រហូតដល់ថ្ងៃទី១៨ កុម្ភៈ ដើម្បីទប់ការឆ្លងរាតត្បាតវីរុសកូវីដ-១៩ ។
ប្រទេសម៉ាឡេស៊ី កាលពីថ្ងៃព្រហស្បតិ៍ ទី៤ កុម្ភៈ បានរាយការណ៍ករណីថ្មីនៃការឆ្លងវីរុសកូវីដ ចំនួន៤.៥៧១ករណី ដែលធ្វើឱ្យករណីឆ្លងសរុបកើនដល់ ២៣១.៤៨៣ករណី។
ក្រសួងសុខាភិបាលម៉ាឡេស៊ី ក៏បានរាយការណ៍ករណីស្លាប់១៧ ករណីបន្ថែមទៀត ធ្វើឱ្យចំនួនសរុបនៃអ្នកស្លាប់ដោយសារវីរុសកូវីដ-១៩ កើនឡើងដល់៨២៦ករណី។
នៅក្នុងសន្ទរកថារបស់លោកក្នុងថ្ងៃដដែល នាយករដ្ឋមន្ត្រីម៉ាឡេស៊ី បានគូសបញ្ជាក់ថា ទិន្នន័យចុងក្រោយបង្ហាញថា៥៩% នៃករណីឆ្លងវីរុសកូវីដ-១៩ បានកើតឡើងនៅកន្លែងធ្វើការ។
លោកបានសង្កត់ធ្ងន់ពីភាពចាំបាច់ ដែលត្រូវអនុវត្តតាមគោលការន៍ SOP នៅតាមរោងចក្រ ការដ្ឋានសំណង់ កន្លែងស្នាក់នៅរបស់កម្មករ និងកន្លែងធ្វើការនានា ព្រោះការឆ្លងជាច្រើន អំឡុងពេលផ្ទុះការឆ្លងរលកទី៣ បានកើតឡើងនៅកន្លែងទាំងអស់នេះ។
លោកលើកឡើងថា បម្រាមមិនឱ្យធ្វើដំណើរទាំងស្រុង និងការបិទគ្រប់សកម្មភាពសេដ្ឋកិច្ច គឺមានប្រសិទ្ធភាពបំផុត នៅក្នុងការទប់ស្កាត់ការឆ្លងរាតត្បាតវីរុសកូវីដ-១៩ ប៉ុន្តែទន្ទឹមនេះ វាក៏ជះផលប៉ះពាល់ខ្លាំងណាស់ដែរ ចំពោះសេដ្ឋកិច្ចរបស់ប្រទេស។ ណាមួយ ដោយសារមានសំណូមពរយ៉ាងទទូចពីពលរដ្ឋ ទើបបានជារដ្ឋាភិបាលសម្រេចអនុញ្ញាតឱ្យអាជីវកម្មភាគច្រើនបើកដំណើរការជាធម្មតា៕
