ដោយៈសុខុម
ក្រុងឡុងដ៏: ប្រទេសអង់គ្លេស បានចាត់ទុកសមាគមបណ្ដាប្រជាជាតិអាស៊ីអាគ្នេយ៍ (អាស៊ាន) ជាអាទិភាពកំពូលនៃគោលនយោបាយការបរទេសរបស់ខ្លួន ក្រោយពីខ្លួនបានចាកចេញពីសភាពអឺរ៉ុបជាផ្លូវការ ហើយកំពុងតែសម្លឹងរកចាប់ដៃគូពាណិជ្ជកម្មថ្មីៗក្រោមពាក្យស្លោកថា “ចក្រភពអង់គ្លេស ជាសកល” (Global Britain)។ នេះបើយោងតាមសារព័ត៌មាន Nikkei Asia ចុះផ្សាយកាលពីថ្ងៃទី០២ កុម្ភៈ។
ប្រទេសអង់គ្លេស ដែលបានចាកចេញពីសហភាពអឺរ៉ុប ពេញលេញត្រឹមដំណាច់ឆ្នាំ២០២០ ក្រោយរយៈពេលអន្តរកាលផុតសុពលភាព បានលើកឡើងជាសាធារណៈថា កិច្ចព្រមព្រៀងពាណិជ្ជកម្មជាមួយប្រទេសនានា ដូចជា សហរដ្ឋអាមេរិក អូស្ត្រាលី និងនូវែសេឡង់ ជាដើម នឹងក្លាយជាគោលនយោបាយអាទិភាពកំពូលរបស់ខ្លួន នៅក្នុងរយៈពេលប៉ុន្មានខែខាងមុខ។ ការផ្តោតបែបនេះ ក៏ដោយសារតែប្រទេសទាំងនោះ មានទំនាក់ទំនងយ៉ាងរឹងមាំផ្នែកប្រវត្តិសាស្ត្រ វប្បធម៌ និងសេដ្ឋកិច្ចជាមួយប្រទេសអង់គ្លេស។
លោក Jon Lambe ឯកអគ្គរដ្ឋទូតអង់គ្លេសប្រចាំអាស៊ាន បានលើកឡើងក្នុងបទសម្ភាសន៍កាលពីពេលថ្មីៗនេះ ជាមួយសារព័ត៌មាន Nikkei Asia ថា “យើងអាចនិយាយបានថា អាស៊ាន ជាអាទិភាពខ្ពស់បំផុតសម្រាប់យើង” ។
ប្រទេសអង់គ្លេស បានចុះកិច្ចព្រមព្រៀងពាណិជ្ជកម្មសេរី (FTA) ជាមួយប្រទេសសិង្ហបុរី និងវៀតណាមរួចទៅហើយ ប៉ុន្តែកិច្ចព្រមព្រៀងទាំងនោះ ធ្វើឡើងដោយងាយស្រួល ដោយសារប្រទេសទាំងពីរ មានកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុបស្រាប់ទៅហើយ។
ទោះជាយ៉ាងណា អង់គ្លេស នឹងត្រូវចាប់ផ្ដើមចរចាកិច្ចព្រមព្រៀងជាមួយបណ្ដាប្រទេសជាសមាជិកអាស៊ាន ចាប់ពីចំណុចសូន្យឡើងទៅ។
កាលពីថ្ងៃច័ន្ទ ទី១ កុម្ភៈកន្លងមកនេះ ប្រទេសអង់គ្លេស បានស្នើសុំជាផ្លូវការ ដើម្បីចូលរួមក្នុង “កិច្ចព្រមព្រៀងគ្រប់ជ្រុងជ្រោយ និងវឌ្ឍនភាពនៃភាពជាដៃគូពាណិជ្ជកម្មអន្តរប៉ាស៊ីហ្វិក” (Comprehensive and Progressive Agreement for Trans-Pacific Partnership (CPTPP)) ដែលមានប្រទេសចំនួន១១បានចូលរួម។ បច្ចុប្បន្នកិច្ចព្រមព្រៀងនេះគ្របដណ្ដប់ ១៣% នៃផលិតផលក្នុងស្រុកសរុប (GDP) របស់ពិភពលោក។
ទោះជាយ៉ាងណា ប្រទេសអង់គ្លេស ចង់ពង្រឹងទំនាក់ទំនងកាន់តែស្អិតរមួតជាមួយបណ្ដាប្រទេសក្នុងតំបន់។
លោក Jon Lambe ថ្លែងថា “ពាណិជ្ជកម្មជារឿងមួយ ក្នុងចំណោមរឿងជាច្រើនដែលធ្វើឱ្យអាស៊ាន ក្លាយជាដៃគូដ៏រឹងមាំសម្រាប់អង់គ្លេស” ។
ប្រទេសអង់គ្លេស បានធ្វើការពិនិត្យផ្ទៀងផ្ទាត់ពាណិជ្ជកម្មរួម ជាមួយប្រទេសថៃ និងប្រទេសឥណ្ឌូនេស៊ីរួចទៅហើយ សម្រាប់កិច្ចព្រមព្រៀង ដែលអាចនឹងកើតមានឡើង ហើយក៏បានចូលរួមជាមួយប្រទេសម៉ាឡេស៊ី តាមរយៈគណៈកម្មាធិការរួមទទួលបន្ទុកដោះស្រាយបញ្ហានានា ដូចជា គោលនយោបាយពាណិជ្ជកម្ម និងការចូលទៅកាន់ទីផ្សារជាដើម៕
