ដោយៈ ម៉ាណេត
ភ្នំពេញៈ កម្ពុជា និងអឺរ៉ុបបានជួបប្រជុំគ្នា ដើម្បីបង្កើតយុទ្ធសាស្ត្រសហប្រតិបត្តិការអភិវឌ្ឍន៍ សម្រាប់រយៈពេល៧ឆ្នាំ (២០២១-២០២៧) ដោយផ្តោតលើវិស័យអាទិភាពចំនួន៣ និងឯកភាពពិគ្រោះយោបល់បន្ថែម ដើម្បីដោះស្រាយវិបត្តិកូវីដ១៩ ។ នេះបើយោងតាមការចេញផ្សាយរបស់សារព័ត៌មានរបស់ម៉ាឡេស៊ី The Star នៅថ្ងៃទី២ ខែកុម្ភៈ។
កិច្ចព្រមព្រៀងយុទ្ធសាស្ត្រនេះ ត្រូវបានបង្កើតឡើងជាផ្លូវការ កាលចុងខែមករា ឆ្នាំ២០២១ រវាងលោកប្រាក់ សុខុនឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកអគ្គរដ្ឋទូតអឺរ៉ុបលោក Carmen Moreno ។
សេចក្តីប្រកាសព័ត៌មានបន្ទាប់ពីកិច្ចប្រជុំ បានកត់សម្គាល់ថា វិស័យអាទិភាពទាំងបី ដែលនឹងត្រូវដោះស្រាយ គឺកំណើនសេដ្ឋកិច្ចនិងការបង្កើតការងារ កសិកម្ម និងការគ្រប់គ្រងធនធានធម្មជាតិនិងអភិបាលកិច្ច។
លោកប្រាក់ សុខុន និងលោក Moreno បានយល់ស្របថា “ភាគីទាំងពីរចាំបាច់ត្រូវមានការសម្របសម្រួលបន្ថែមទៀត ដើម្បីដោះស្រាយវិបត្តិជំងឺរាតត្បាត” ។
ភាគីទាំងពីរបានផ្លាស់ប្តូរទស្សនៈស្តីពី សមាហរណកម្មតំបន់អាស៊ាន និងជាពិសេសគម្លាតអភិវឌ្ឍន៍នៅក្នុងតំបន់ និងការគាំទ្ររបស់អឺរ៉ុប សម្រាប់ប្រទេសកម្ពុជា ក្នុងការធ្វើសមាហរណកម្មចូលទៅក្នុងទីផ្សារក្នុងតំបន់ និងខ្សែសង្វាក់តម្លៃ។
ការពិភាក្សាក៏បានលើកឡើង អំពីបញ្ហាទាក់ទងនឹងពលករចំណាកស្រុក ការចូលទីផ្សារអឺរ៉ុបសម្រាប់ផលិតផលស្រូវកម្ពុជា ឧស្សាហកម្ម ទេសចរណ៍ កម្មវិធីគាំពារសង្គម ការចូលរួមរបស់វិស័យឯកជន និងការលើកកម្ពស់ការវិនិយោគទ្វេភាគី។
លោកប្រាក់ សុខុនថ្លែងថា “ជំនួយអភិវឌ្ឍន៍របស់សហភាពអឺរ៉ុប សម្រាប់ប្រទេសកម្ពុជា ក្នុងរយៈពេលជាង២ទសវត្សកន្លះ បានចូលរួមចំណែកយ៉ាងសំខាន់ដល់វឌ្ឍនភាពសេដ្ឋកិច្ចសង្គម របស់ប្រទេសជាតិ” ។
លោកបានមានប្រសាសន៍ថាយើងស្វាគមន៍ការពិគ្រោះយោបល់ ដើម្បីធ្វើឱ្យប្រសើរឡើង និងកែលំអសកម្មភាពអភិវឌ្ឍន៍ របស់អឺរ៉ុប ហើយទន្ទឹងរង់ចាំលទ្ធផល នៃយុទ្ធសាស្ត្រសហប្រតិបត្តិការអភិវឌ្ឍន៍ឆ្នាំ ២០២១-២០២៧ ។
លោក Moreno បានថ្លែងថា “ក្នុងចំណោមសមិទ្ធិផល ដែលទទួលបានជោគជ័យ មានគម្រោងរោងចក្រប្រព្រឹត្តកម្មទឹកស្អាតបាក់ខែង។ រោងចក្រនេះ នឹងត្រូវទ្រទ្រង់ដោយជំនួយពីអឺរ៉ុប និងទីភ្នាក់ងារអភិវឌ្ឍន៍បារាំង (AFD) ដែលរួមមានឥណទានពីធនាគារវិនិយោគអឺរ៉ុប។ គម្រោងនេះនឹងបង្កើតការងារចំនួន ១៦.០០០កន្លែង និងផ្គត់ផ្គង់ទឹកស្អាតដល់ប្រជាជន” ។
លោកគិន ភានាយកវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានកោតសរសើរ ចំពោះកិច្ចសហប្រតិបត្តិការកន្លងមក រវាងភាគីទាំងពីរ និងបានអបអរសាទរចំពោះការខិតខំប្រឹងប្រែងរបស់ភាគីទាំងពីរ។
លោកសង្ឃឹមថា “ភាគីទាំងពីរនឹងដោះស្រាយបញ្ហា និងស្វែងរកដំណោះស្រាយរួមគ្នា នៅក្នុងវិស័យជាច្រើនទៀត” ៕
