ដោយ: សុខុម
ប៉េកាំង: ចិន ដែលប្រទេសបំពុលបរិយាកាសធំបំផុតរបស់ពិភពលោកបានចាប់ផ្ដើមប្រព័ន្ធជួញដូរកាបូន កាលពីថ្ងៃទី១ ខែកុម្ភៈ ក្នុងគោលបំណងកាត់បន្ថយការបំភាយឧស្ម័នកាបូនទៅក្នុងបរិយាកាស និងឆ្ពោះទៅកាត់បន្ថយការបំភាយឧស្ម័នកាបូនឱ្យមកនៅកម្រិតសូន្យ នៅក្នុងសេដ្ឋកិច្ចរបស់ខ្លួនត្រឹមឆ្នាំ២០៦០។ នេះបើយោងតាមការចុះផ្សាយរបស់សារព័ត៌មាន CNA នៅថ្ងៃទី២ ខែកុម្ភៈ។
គម្រោងនេះអនុញ្ញាតឱ្យរដ្ឋបាលខេត្តនានា កំណត់កម្រិតបំពុលបរិយាកាសសម្រាប់ក្រុមហ៊ុនថាមពលធំៗ ជាលើកដំបូង និងអនុញ្ញាតឱ្យក្រុមហ៊ុននានា ទិញយកសិទ្ធិបំពុលបរិយាកាស ពីក្រុមហ៊ុនផ្សេងទៀត ដែលបំភាយឧស្ម័នកាបូនក្នុងកម្រិតទាប។
តាមការរំពឹងទុក កម្មវិធី ដែលដំបូងឡើយគ្រោងចាប់ផ្ដើមក្នុងឆ្នាំ២០១៧ នេះ នឹងជួយកាត់បន្ថយការបំភាយឧស្ម័នកាបូនបានច្រើន ព្រោះក្រុមហ៊ុនថាមពលធំៗ នឹងត្រូវបង់លុយចូលរដ្ឋច្រើន ដែលជាថ្លៃបំពុលបរិយាកាស។
គេរំពឹងថា ប្រព័ន្ធនេះនឹងជែងឈ្នះប្រព័ន្ធរបស់សហភាពអឺរ៉ុប ក្លាយជា “គម្រោងជួញដូរការបំភាយឧស្ម័ន” (ETS) ធំបំផុតរបស់ពិភពលោក។
ទីភ្នាក់ងារព័ត៌មាន Xinhua របស់ចិន បានលើកឡើងថា វិធានសម្រាប់ការគ្រប់គ្រង ETS បានចូលជាធរមានកាលពីថ្ងៃទី១ កុម្ភៈ។ ទីភ្នាក់ងារព័ត៌មាននេះបានចុះផ្សាយថា ក្រុមហ៊ុនថាមពលជាង២.២០០ ទូទាំងប្រទេសចិន ដែលបំភាយឧស្ម័នកាបូនជាង២៦.០០០តោន ទៅក្នុងបរិយាកាសក្នុងមួយឆ្នាំៗ ពេលនេះអាចចាប់ផ្ដើមជួញដូរបរិមាណកំណត់ការបំភាយឧស្ម័នរបស់ខ្លួនបានហើយ។
រដ្ឋាភិបាលក្រុងប៉េកាំង បានសន្យាថា កម្រិតខ្ពស់បំផុតនៃការបំភាយឧស្ម័នរបស់ខ្លួននឹងត្រូវបានកំណត់មុនឆ្នាំ២០៣០ ហើយនឹងកាត់បន្ថយការបំភាយឧស្ម័នមកនៅកម្រិតសូន្យ នៅរយៈពេល៣០ឆ្នាំក្រោយ។
ការជួញដូរការបំភាយឧស្ម័នកាបូនទៅក្នុងបរិយាកាសនេះចាប់ផ្ដើម ស្របពេលក្រុមអ្នកជំនាញព្រមានថា ប្រទេសចិន កំពុងតែបង្កើនការផលិតធ្យូងថ្មរបស់ខ្លួន។ យោងតាមទិន្នន័យបង្ហាញថា ប្រមាណ៦០ភាគរយនៃការផលិតថាមពលក្នុងប្រទេសចិន នៅតែដំណើរការ ដោយការដុតធ្យូងថ្មនៅឡើយ៕
