ដោយៈសុខុម
អឺរ៉ុបៈពេលនេះសហភាពអឺរ៉ុប កំពុងស្វះស្វែងប្ដឹងទៅតុលាកាកំពូល ដើម្បីជំទាស់នឹងសាលក្រមរបស់តុលាការជាន់ទាប ដែលសម្រេចឱ្យក្រុមហ៊ុនអាមេរិក Apple Inc ឈ្នះក្ដីនៅក្នុងសំណុំរឿងគេចពន្ធ១៣ ពាន់លានអឺរ៉ូ (១៥,៨ ពាន់លានដុល្លារអាមេរិក)។
ក្រុមមន្ត្រីសហភាពអឺរ៉ុបនិយាយថា ចៅក្រមបានប្រើប្រាស់ “ការទាញសេចក្ដីសន្និដ្ឋានផ្ទុយពីអង្គហេតុ” នៅពេលចៅក្រមទាំងនោះសម្រេចថា សាខារបស់ក្រុមហ៊ុន Apple ក្នុងប្រទេសអៀរឡង់ មិនទទួលខុសត្រូវចំពោះការបង់ពន្ធយ៉ាងច្រើនបែបនេះឡើយ។
នៅក្នុងលិខិតបណ្ដឹងទាស់ចេញផ្សាយកាលពីថ្ងៃច័ន្ទ ទី១ កុម្ភៈ បង្ហាញពីការប្ដេជ្ញាចិត្តរបស់សហភាពអឺរ៉ុប នៅក្នុងការប្ដឹងទាស់សាលក្រមរបស់តុលាការជាន់ទាបដែលបានសម្រេចកាលពីខែកក្កដា។ ការសើរើរឿងក្ដីនេះ ធ្វើឡើងក្រោយពីលោកស្រី Margrethe Vestager ប្រធានគណៈកម្មការអឺរ៉ុប បានបើកការស៊ើបអង្កេតលើសេចក្ដីសម្រេចរបស់តុលាការ ដោយលើកឡើងថា សេចក្ដីសម្រេចរបស់តុលាការគាំទ្រដោយខុសច្បាប់ ចំពោះក្រុមហ៊ុនពហុជាតិសាសន៍ធំៗមួយចំនួន។
ការប្ដឹងផ្ដល់ក្រុមហ៊ុន Apple ឱ្យបង់ពន្ធជាច្រើនពាន់លានដុល្លារក្នុងឆ្នាំ២០១៦ នេះបានក្លាយជាសំណុំរឿងដ៏ធំមួយ សម្រាប់លោកស្រី Margrethe Vestager និងជាការបង្ហាញថា លោកស្រីមិនខ្លាចធ្វើឱ្យApple ដែលជាក្រុមហ៊ុនវិទ្យាមានតម្លៃបំផុតរបស់ពិភពលោក ឬក្រសួងរតនាគាររសបស់សហរដ្ឋអាមេរិកខឹងនោះឡើយ។
ចំណាត់ការរបស់លោកស្រី បានជួយពន្លឿនកិច្ចប្រឹងប្រែង របស់សហភាពអឺរ៉ុប ដើម្បីបិទបញ្ចប់ចំណុចខ្វះចន្លោះទាក់ទិនពន្ធដារ ដែលកន្លងមកបានអនុញ្ញាតឱ្យក្រុមហ៊ុនពហុជាតិសាសន៍មួយចំនួនបង់ពន្ធតិចដោយស្របច្បាប់នៅអឺរ៉ុប។
សហភាពអឺរ៉ុប និយាយថា តុលាការជាន់ទាបបានលើកយកមកធ្វើជាសំអាងដោយមិនត្រឹមត្រូវនូវករណីក្រុមហ៊ុន Apple ខ្វះបុគ្គលិកនៅសាខា២កន្លែង ក្នុងប្រទេសអៀរឡង់ និងកម្រិតនៃការទទួលខុសត្រូវរបស់ក្រុមហ៊ុននេះ ចំពោះកម្មសិទ្ធិបញ្ញាលើការលក់ទូរស័ព្ទ iPhone និង iPad នៅទូទាំងអឺរ៉ុប។ ចៅក្រមមិនបានថ្លឹងថ្លែងឱ្យបានត្រឹមត្រូវលើការវិភាគរបស់សហភាពអឺរ៉ុប អំពីសាខារបស់ក្រុមហ៊ុន Apple នៅប្រទេសអៀរឡង់ ឡើយ ហើយបែរជាបង្ហាញហេតុផលផ្ទុយស្រឡះពីអង្គហេតុទៅវិញ។
ទោះជាយ៉ាងណា ភ្លាមៗក្រុមហ៊ុន Apple បានបដិសេធមិនឆ្លើយបំភ្លឺឡើយជុំវិញបញ្ហានេះ។
ស្ថិតនៅចំណុចស្នូលនៃការទាញទឡ្ហីករណ៍ផ្លូវច្បាប់ តុលាការគ្រាន់តែសួរសំណួរងាយៗដូចជា តើប្រាក់ចំណេញរកបាននៅទីណា ហើយគួរបង់ពន្ធនៅទីណាប៉ុណ្ណោះ។ ក្រុមហ៊ុន Apple បានអះអាងថា រាល់សេចក្ដីសម្រេចសំខាន់ៗទាំងអស់ លើផលិតផលរបស់ Apple ធ្វើឡើងនៅទីស្នាក់ការកណ្ដាលក្នុងទីក្រុង Cupertino សហរដ្ឋអាមេរិក ហើយថា ពន្ធលើប្រាក់ចំណេញគួរតែបង់នៅក្នុងសហរដ្ឋអាមេរិក។
ទោះជាយ៉ាងណា ក្រុមហ៊ុន Apple បានពន្យាពេលបញ្ជូនប្រាក់ចំណេញ នៅបរទេសមកសហរដ្ឋអាមេរិក ជាច្រើនឆ្នាំមកហើយ រហូតទាល់តែមានការធ្វើវិសោធនកម្មច្បាប់ស្ដីពីពន្ធដារ ទើបក្រុមហ៊ុននេះ ចាប់ផ្ដើមបញ្ជូនប្រាក់ចំណេញ នៅបរទេសមកសហរដ្ឋអាមេរិក វិញក្នុងឆ្នាំ២០១៨ ៕