ភ្នំពេញៈ ការជួញដូរភាគហ៊ុន បានផ្ដល់អត្ថប្រយោជន៍ជាច្រើនដល់វិនិយោគិន ដូចជា ទី១ ឱកាសវិនិយោគ និងប្រាក់ចំណេញ ទី២លទ្ធភាពក្នុងការវិនិយោគដោយវិនិយោគិនតូចៗ ទី៣ ការលើកទឹកចិត្តផ្នែកពន្ធ និង ទី៤ ពិពិធកម្មនៃសំណុំវិនិយោគ និងចំណូលបន្ថែម។
ទី១ ឱកាសវិនិយោគ និងប្រាក់ចំណេញ
ជំនួសឱ្យ ឬបន្ថែមលើការបើកអាជីវកម្មដោយខ្លួនឯង ការកាន់កាប់ភាគហ៊ុនផ្តល់ឱ្យវិនិយោគិន នូវឱកាសក្នុងការចូលរួមចំណែកក្នុងអាជីវកម្មមួយ ដែលមិនតម្រូវឱ្យមានជំនាញនិងបទពិសោធន៍ពាក់ព័ន្ធ ឬការតាមដានត្រួតពិនិត្យជាប់ជាប្រចាំឡើយ។ ទន្ទឹមនឹងនេះ ប្រាក់ចំណេញពីការជួញដូរ និងភាគលាភទទួលបានពីការកាន់កាប់ ភាគហ៊ុនអាចមានចំនួនច្រើនលើសផលវិនិយោគដទៃទៀត។
ទី២ លទ្ធភាពក្នុងការវិនិយោគដោយវិនិយោគិនតូចៗ
ផ្សារភាគហ៊ុន អនុញ្ញាតឱ្យវិនិយោគិនដែលមានប្រាក់តិចតួច អាចក្លាយជាម្ចាស់(មួយផ្នែក)នៃក្រុមហ៊ុនធំៗ និងទទួលបានផលចំណេញ ដូចវិនិយោគិនជាអ្នកមាន និងជាស្ថាប័នផងដែរ ទៅតាមសមមាត្រភាគហ៊ុនដែលពួកគេកាន់កាប់។
ទី៤ ការលើកទឹកចិត្តផ្នែកពន្ធ
មិនមានពន្ធប្រថាប់ត្រា លើការផ្ទេរកម្មសិទ្ធិពេលជួញដូរភាគហ៊ុន មិនមានពន្ធលើចំណេញមូលធន(capital gain) និងមិនមានពន្ធលើភាគលាភ សម្រាប់និវេសនជនកម្ពុជា។ ចំណែកអនិវេសនជន ពន្ធលើភាគលាភត្រូវបន្ថយមកត្រឹម៧% (ពីអត្រាដើម ១៤%) ។
ទី៤ ពិពិធកម្មនៃសំណុំវិនិយោគ និងចំណូលបន្ថែម
ក្រៅពីប្រភពចំណូលចម្បងដូចជាប្រាក់ខែ ឬប្រាក់ចំណេញពីអាជីវកម្ម និងប្រាក់ចំណូលបន្ថែមផ្សេងទៀត ក្នុងទម្រង់ជាការប្រាក់ ដែលបានពីការដាក់ប្រាក់សន្សំមានកាលកំណត់ ចំណួលពីការជួល ឬចំណេញពីអចលនទ្រព្យ លោកអ្នកអាចវិនិយោគក្នុងផ្សារភាគហ៊ុន ដើម្បីធ្វើពិពិធកម្មសំណុំវិនិយោគ និងដើម្បីទទួលបានចំណូលបន្ថែម។
បន្ថែមពីលើនេះ ថ្លៃសេវាសម្រាប់ការជួញដូរមូលបត្រមានកម្រិតទាប ដោយស្ថិតក្នុងរង្វង់ ០,៥% នៃតម្លៃជួញដូរតែប៉ុណ្ណោះ៕