ដោយៈសុខុម
វ៉ាស៊ីនតោន: ស្ថាប័នមូលនិធិរូបិយវត្ថុអន្តរជាតិIMF កាលពីថ្ងៃអង្គារ ទី២៦ មករា បានដំឡើងការព្យាករពីកំនើនសេដ្ឋកិច្ច សម្រាប់កំណើនសេដ្ឋកិច្ចពិភពលោកក្នុងឆ្នាំ២០២១នេះ ដោយលើកឡើងថា ការធ្លាក់ចុះសេដ្ឋកិច្ចដែលបង្កឡើង ដោយសារការឆ្លងរាតត្បាតវីរុសកូវីដ-១៩ កាលពីឆ្នាំកន្លងទៅនឹងមានភាពធូរស្រាលឡើងវិញ។ នេះបើយោងតាមការចុះផ្សាយរបស់សារព័ត៌មាន CNA។
ស្ថាប័ននេះនិយាយថា ការអនុម័តជាច្រើនលើវ៉ាក់សាំងកូវីដ-១៩ និងការចាប់ផ្ដើមចាក់វ៉ាក់សាំង នៅក្នុងប្រទេសជាច្រើនកាលពីខែធ្នូ កន្លងទៅ បានធ្វើឱ្យមានក្ដីសង្ឃឹមកាន់តែខ្លាំងថា ការឆ្លងរាតត្បាតវីរុសកូវីដ-១៩ ដែលពេលនេះបានឆ្លងទៅមនុស្សជិត១០០ លាននាក់ និងផ្ដាច់ជីវិតមនុស្សជាង២,១លាននាក់ទូទាំងពិភពលោក នឹងឈានដល់ទីបញ្ចប់ក្នុងពេលឆាប់ៗនេះ។
ប៉ុន្តែទន្ទឹមនេះស្ថាប័នផ្ដល់ប្រាក់កម្ចីទូទាំង ពិភពលោកមួយនេះព្រមានថា សេដ្ឋកិច្ចពិភពលោកបានបន្តប្រឈមមុខនឹង “ភាពមិនប្រាកដប្រជាមិនធម្មតា” ហើយរលកថ្មីនៃការឆ្លងរាតត្បាតវីរុសកូវីដ-១៩ និងស្ថានការណ៍វិវឌ្ឍន៍បានបង្កហានិភ័យនានា ហើយកម្មភាពសេដ្ឋកិច្ចរបស់ពិភពលោក ស្ថិតក្រោមកម្រិតព្យាករណ៍ មុនពេលផ្ទុះវីរុសកូវីដ-១៩ នៅឡើយ។
លោកស្រីGita Gopinath ប្រធានសេដ្ឋវិទូប្រចាំនៅស្ថាប័នIMF បានថ្លែងថា សេចក្ដីសម្រេចរបស់ប្រធានាធិបតីអាមេរិក ថ្មី ចូ បៃឌិន ដើម្បីផ្ដល់ថវិកាជួយគាំទ្រដល់គំនិតផ្ដួចផ្ដើមវ៉ាក់សាំងCOVAX របស់អង្គការសុខភាពពិភពលោក WHO ជា “ការបោះជំហានដ៏ធំ” ឆ្ពោះទៅការទប់ជាប់ការឆ្លងរាតត្បាត។
មនុស្សរហូតដល់ទៅជិត៩០លាននាក់ ទំនងជាធ្លាក់ចុះក្រោមបន្ទាត់នៃភាពក្រីក្រខ្លាំងអំឡុងឆ្នាំ២០២០-២០២១ ដោយសារការឆ្លងរាតត្បាតវីរុសកូវីដ-១៩ បានបំផ្លាញវឌ្ឍនភាព នៅក្នុងការកាត់បន្ថយភាពក្រីក្រ ក្នុងរយៈពេលជាង២ទសវត្សរ៍មកនេះ។ មនុស្សយ៉ាងច្រើននៅតែគ្មានការងារធ្វើ និងពុំមានការងារគ្រប់គ្រាន់នៅឡើយ ក្នុងប្រទេសជាច្រើន រួមទាំងសហរដ្ឋអាមេរិកផងដែរ។
លោកស្រីGita Gopinath បានគូសបញ្ជាក់ថា បណ្ដាសេដ្ឋកិច្ចជឿនលឿនកំពុងងើបឡើងយ៉ាងឆាប់រហ័ស ហើយវាពិតជាសំខាន់ណាស់ ដែលប្រទេសមិនសូវសម្បូរធនធានទទួលបានជំនួយពីសហគមន៍អន្តរជាតិ៕