ដោយៈ ចំណាន
ព្រះសីហនុៈ ក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំកម្មពិធីសិក្ខាសាលាស្តីពី “ការពង្រឹងសមត្ថភាពរៀបចំក្រុងកោះរ៉ុងជាទីក្រុង ទេសចរណ៍គ្មានផ្សែងបារី” នៅរដ្ឋបាលក្រុងកោះរ៉ុង ខេត្តព្រះសីហនុ។
សិក្ខាសាលានេះធ្វើឡើងក្រោមអធិបតីភាព លោកហោ សារុន រដ្ឋលេខាធិការក្រសួងទេសចរណ៍ និងជាប្រធានក្រុមការងារបរិស្ថានគ្មានផ្សែងបារី តំណាងលោកហួត ហាក់ រដ្ឋមន្ត្រីក្រសួងទេសចរណ៍ អញ្ជើញជាអធិបតីក្នុងពិធីបើកសិក្ខាសាលានេះ។
សិក្ខាសាលានេះ មានការអញ្ជើញចូលរួមពី លោក សួស សេរីសួស្តី អភិបាលរងនៃគណៈអភិបាលខេត្តព្រះសីហនុ ក្រុមការងារថ្នាក់ជាតិមកពីក្រសួងទេសចរណ៍ ក្រសួងសុខាភិបាល ដៃគូអភិវឌ្ឍន៍ មន្ទីរទេសចរណ៍ខេត្ត មន្ទីរពាក់ព័ន្ធ រដ្ឋបាលខេត្ត ក្រុង សង្កាត់ ការិយាល័យចំណុះក្រុង អធិការដ្ឋាននគរបាលក្រុង បញ្ជាការដ្ឋានកងរាជអាវុធហត្ថ បញ្ជាការដ្ឋានកងយុទ្ធពលមេរភូមិន្ទ ទាំងពីរប្រភេទ នាយប៉ុស្តិ៍នគរបាលសង្កាត់ និងមូលដ្ឋានអាជីវកម្មសេវាកម្ម ទេសចរណ៍សរុបប្រមាណ១០០នាក់។
សិក្ខាសាលានេះមានគោលបំណងសំខាន់ៗ រួមមាន៖ ពង្រឹងការយល់ដឹងអំពីផលប៉ះពាល់នៃផ្សែងបារី ពង្រឹងការយល់ដឹងអំពីគោលការណ៍ទីក្រុងទេសចរណ៍គ្មានផ្សែងបារី បង្កើនសមត្ថភាពអនុវត្តរបស់មន្ត្រីរដ្ឋបាលក្រុង សង្កាត់ កងកម្លាំង និងភាគីពាក់ព័ន្ធ លើកទឹកចិត្តឱ្យអាជីវកម្មទេសចរណ៍ចូលរួម បង្កើតបរិយាកាសស្អាត និងមានសុខភាពល្អ និងកសាងភាពជាដៃគូរវាងរដ្ឋ និងឯកជន និងសហគមន៍ ផ្លាស់ប្តូរបទពិសោធន៍ ព្រមទាំងរៀបចំផែនការសកម្មភាព អនុវត្តន៍ក្រុងកោះរ៉ុងឱ្យមានប្រសិទ្ធភាព ដើម្បីត្រៀមឆ្ពោះទៅការវាយតម្លៃ និងការទទួលស្គាល់ជាផ្លូវការ។
សិក្ខាសាលានេះ ក៏បានរៀបចំជាកិច្ចពិភាក្សាជារួម Panel discussion ដែលមានអ្នកសម្របសម្រួល និងវាគ្មិនកិត្តិយសមកពីក្រសួង ស្ថាប័ន អង្គភាពសំខាន់ៗ និងផ្នែកឯកជនចូលរួមពិគ្រោះយោបល់គ្នាក្រោមប្រធានបទ “ដំណើរឆ្ពោះទៅកាន់ការរៀបចំក្រុងកោះរ៉ុងជាទីក្រុងទេសចរណ៍ គ្មានផ្សែងបារីប្រកបដោយជោគជ័យ” ដែលផ្តល់ឱកាសជូន អ្នកចូលរួមទាំងអស់លើកជាសំណួរ ឬបទពិសោធន៍ដែលជួបប្រទះ មកដោះស្រាយនិងចែករំលែកផងដែរ។
បន្ទាប់ពីសិក្ខាសាលា លោកហោ សារុន រដ្ឋលេខាធិការក្រសួងទេសចរណ៍អញ្ជើញ ជាអធិបតីដឹកនាំកិច្ចប្រជុំចង្អៀត ជាមួយរដ្ឋបាលក្រុង សង្កាត់ និងផ្នែកឯកជន ដើម្បីរៀបចំផែនការសកម្មភាពជំរុញក្រុងកោះរ៉ុង ជាទីក្រុងទេសចរណ៍គ្មានផ្សែងបារី ឱ្យបានក្នុងឆ្នាំ២០២៦នេះ។
អង្គសិក្ខាសាលាទាំងមូល បានយកចិត្តទុកដាក់ខ្ពស់ គាំទ្រ និងប្តេជ្ញាចិត្តរួមគ្នាជំរុញក្រុងកោះរ៉ុង ជាទីក្រុងទេសចរណ៍គ្មានផ្សែងបារី៕
