ដោយ៖ លក្ខិណា
ភ្នំពេញ៖ វិស័យធនាគារបានអភិវឌ្ឍន៍ខ្លួនជាបន្តបន្ទាប់ ក្នុងរយៈពេល៥ឆ្នាំចុងក្រោយនេះ ដែលធ្វើឱ្យទំហំឥណទាន និងទំហំប្រាក់បញ្ញើកើនឡើង។ នេះបើយោងតាមរបាយការណ៍ របស់ធនាគារជាតិនៃកម្ពុជាចេញផ្សាយនៅថ្ងៃទី២០ ខែមករា ឆ្នាំ២០២១នេះ។
យោងតាមរបាយការណ៍របស់ធនាគារជាតិនៃកម្ពុជា ស្ដីពីការអភិវឌ្ឍវិស័យធនាគារពីឆ្នាំ២០១៦ ដល់ឆ្នាំ២០២០ បានបង្ហាញថា ឆ្នាំ២០១៦ ឥណទានក្នុងវិស័យធនាគារស្មើនឹងប្រមាណ៨៥ភាគរយ នៃផលិតផលក្នុងស្រុកសរុប និងប្រាក់បញ្ញើមានប្រមាណ៧៥ភាគរយ នៃផលិតផលក្នុងស្រុកសរុប។
ឆ្នាំ២០១៧ ឥណទានបានកើនឡើង៩១ភាគរយ នៃផលិតផលក្នុងស្រុកសរុប ហើយប្រាក់បញ្ញើក៏បានកើនឡើងដល់៨៦ភាគរយនៃផលិតផលក្នុងស្រុកសរុប។ រហូតមកដល់ឆ្នាំ២០២០ ទ្រព្យសកម្មសរុបនៃវិស័យធនាគារមានរហូតដល់១៨៩ភាគរយនៃផលិតផលក្នុងស្រុកសរុប ឥណទានមានប្រមាណ១១៩ភាគរយនៃផលិតផលក្នុងស្រុកសរុប និងប្រាក់បញ្ញើមាន១១៣ភាគរយនៃផលិតផលក្នុងស្រុកសរុប។
របាយការណ៍បង្ហាញថា ឥណទានអតិថិជនក្នុងឆ្នាំ២០២០ បានកើនឡើងប្រមាន១៤,៨ភាគរយ គិតជាទឹកប្រាក់៣៧,៣ពាន់លានដុល្លារ ប្រាក់បញ្ញើអតិថិជនមានកំណើន១៥,៤ភាគរយ កើនឡើងដល់៣៣,៨ពាន់លានដុល្លារអាមេរិក ខណៈទ្រព្យសកម្មរបស់ប្រព័ន្ធធនាគារមានកំណើន១៥,៧ភាគរយ កើនឡើងដល់៥៩,៤ពាន់លានដុល្លារ។
លោកបណ្ឌិតអ៊ិន ចាន់នីប្រធានសមាគមធនាគារនៅកម្ពុជា បានមានមានប្រសាសន៍ថា ក្នុងឆ្នាំ២០២០នេះ បើទោះបីជាកម្ពុជា ជួបវិបត្តិដោយសារកូវីដ១៩ ក្ដី តែវិស័យធនាគារបានហែលឆ្លងផុតក្នុងវិបត្តិនេះដោយចូលមកកាន់ឆ្នាំ២០២១។
លោកបណ្ឌិតបន្ថែមថា ក្នុងឆ្នាំ ២០២០ ធនាគារទាំងអស់ឃើញថានៅតែមានប្រាក់ចំណេញ តែប្រាក់ចំណេញនោះមិនច្រើនទេ ជាក់ស្ដែងធនាគារអេស៊ីលីដា ក៏មានការរីកលូតលាស់ប្រមាណ១៥ភាគរយដែរក្នុងឆ្នាំ២០២០។ ការរីកលូតលាស់នេះ គឺបានមកពីការជួយជ្រោមជ្រែងរបស់រដ្ឋាភិបាល ជាពិសេសធនាគារជាតិនៃកម្ពុជា ដូចជាការជួយអនុគ្រោះនានាដល់ប្រតិបត្តិករធនាគារ និងការរៀបចំឥណទានឡើងវិញជាដើម៕
