ដោយៈ ម៉ាណា
កំពង់ធំៈ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញជាអធិបតីក្នុងពិធីបើកសិក្ខាសាលាស្តីពី “ការរៀបចំផែនការអាជីព និងការជ្រើសរើសជំនាញសិក្សា” ដល់ក្រុមយុវជនមកពីវិទ្យាល័យចំនួន៣ នៅក្នុងស្រុកសន្ទុក ខេត្តកំពង់ធំ។
ពិធៅនេះបានប្រារពធ្វើកាលពីព្រឹកថ្ងៃទី២០ ខែមិថុនា ឆ្នាំ២០២៥ ដោយមានការចូលរួមពីលោកគ្រូ-អ្នកគ្រូនិងសិស្សានុសិស្សថ្នាក់ទី១២ មកពីវិទ្យាល័យចំនួន៣ នៅស្រុកសន្ទុក ខេត្តកំពង់ធំ សរុបចំនួន ៥៨៨រូប។
ក្នុងឱកាសនោះ លោកជំទាវបានលើកឡើងពីសារៈសំខាន់ នៃការរៀបចំផែនការ និងការកំណត់គោលដៅអាជីព ឱ្យបានច្បាស់លាស់ ដើម្បីពង្រឹងការប្រកួតប្រជែងក្នុងទីផ្សារការងារ និងការអភិវឌ្ឍអាជីពយូរអង្វែង។
ក្នុងន័យនេះ លោកជំទាវបានផ្តាំផ្ញើសិស្សានុសិស្ស ឱ្យជ្រើសរើសជំនាញសិក្សា ដែលស័ក្តិសមនឹងបុគ្គលិកលក្ខណៈផ្ទាល់ខ្លួន ចំណង់ចំណូលចិត្ត និងតម្រូវការទីផ្សារការងារជាក់ស្តែង។
បន្ថែមលើសារគន្លឹះជាច្រើន សិស្សានុសិស្សដែលចូលរួមក្នុងកម្មវិធីនេះ ក៏ទទួលបានសៀវភៅកម្រងសំណួរ សម្រាប់ជាជំនួយក្នុងការស្វែងយល់ពីខ្លួនឯង ព្រមទាំងបទពិសោធល្អៗ អំពីការសិក្សាពីក្រុមការងារយុវជនធនាគារជាតិនៃកម្ពុជា ដែលធ្លាប់ទទួលបានអាហារូបករណ៍ទៅសិក្សានៅបរទេសថែមទៀតផង៕
