ដោយៈ ចំណាន
ភ្នំពេញៈ រដ្ឋមន្ត្រីក្រសួងទេសចរណ៍ លោកហួត ហាក់ កាលពីសប្តាហ៍មុន បានអញ្ជើញចូលរួមព្រឹត្តិការណ៍ “រត់ដើម្បីការអប់រំកុមារព្រំដែន”។
ក្រោមអធិបតីភាព ពីលោកបណ្ឌិត្យសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដែលព្រឹត្តិការណ៍នេះ មានការរៀបចំរត់លើចម្ងាយ៣គីឡូម៉ែត្រ។ ៥គីឡូម៉ែត្រ និង១០គីឡូម៉ែត្រ ដោយមានការចូលរួមពីថ្នាក់ដឹកនាំ មន្ត្រីរាជការ សិស្សានុសិស្ស យុវជន វិស័យឯកជន និងប្រជាពលរដ្ឋយ៉ាងច្រើនកុះករ ក្នុងគោលបំណងរួមចំណែកគាំទ្រ ការអប់រំរបស់កុមារនៅតាមតំបន់ព្រំដែន និងលើកកម្ពស់ការហាត់ប្រាណដើម្បីសុខភាព។
ក្នុងឱកាសនោះ លោករដ្ឋមន្ត្រី បានចូលរួមរត់ជាមួយអត្តពលិកជាច្រើន បង្ហាញពីការគាំទ្រចំពោះសកម្មភាពកីឡា ដើម្បីសុខភាព និងសកម្មភាពសប្បុរសធម៌ ព្រមទាំងការលើកទឹកចិត្តឱ្យប្រជាពលរដ្ឋគ្រប់វ័យងាកមកចូលរួមក្នុងការធ្វើលំហាត់ប្រាណជាប្រចាំ។
ការចូលរួមរបស់រដ្ឋមន្ត្រីក្នុងព្រឹត្តិការណ៍នេះ បានឆ្លុះបញ្ចាំងពីការប្តេជ្ញាចិត្តរបស់ក្រសួងទេសចរណ៍ ក្នុងការគាំទ្រព្រឹត្តិការណ៍ទេសចរណ៍កីឡា (Sports Tourism) ដែលរួមចំណែកលើកកម្ពស់សុខុមាលភាពសាធារណៈ បង្កើតសកម្មភាពសង្គម ប្រកបដោយអត្ថន័យ និងពង្រឹងកម្ពុជាជាគោលដៅទេសចរណ៍ ប្រកបដោយសុវត្ថិភាព សុខភាព និងភាពកក់ក្តៅសម្រាប់ភ្ញៀវជាតិ និងអន្តរជាតិ៕
