ដោយៈ ម៉ាណា
ភ្នំពេញៈ សមាគមធនាគារនៅកម្ពុជា(ABC) និងសារមន្ទីរសេដ្ឋកិច្ច និងរូបិយវត្ថុព្រះស្រីឦសានវរ្ម័ន(ស.ស.រ) បានចុះហត្ថលេខាបន្តអនុស្សរណៈនៃការយោគយល់គ្នា(MoU) ដើម្បីបន្តភាពជាដៃគូប្រកបដោយជោគជ័យ ក្នុងការលើកកម្ពស់អក្ខរកម្មសេដ្ឋកិច្ច ក្នុងចំណោមយុវជនកម្ពុជា។
នេះជាឆ្នាំទី៣ ហើយដែលស្ថាប័នទាំង២មានចុះMoU ជាមួយគ្នា។
ពិធីចុះហត្ថលេខាបានប្រព្រឹត្តិទៅនៅសារមន្ទីរ ស.ស.រកាលពីដើមសប្តាហ៍នេះ ក្រោមអធិបតីភាព លោក យឹម លាត ទេសាភិបាលរងធនាគារជាតិនៃកម្ពុជា(NBC)។
យោងតាមសេចក្តីប្រកាសព័ត៌មានរបស់ABC បានអះអាងថា ការបន្តចុះអនុស្សរណៈ នៃការយោគយល់គ្នាស្តីអំពី “កម្មវិធីវិស័យធនាគារសម្រាប់អក្ខរកម្មសេដ្ឋកិច្ច” គឺបញ្ជាក់សាជាថ្មីពីការប្តេជ្ញាចិត្តយ៉ាងមុតមាំរបស់វិស័យធនាគារ ក្នុងការលើកកម្ពស់ការអប់រំសេដ្ឋកិច្ច។
គំនិតផ្តួចផ្តើមនេះ បង្កើនលទ្ធភាពឱ្យសិស្សានុសិស្ស មកពីគ្រឹះស្ថានអប់រំរដ្ឋអាចមកទស្សនាសារមន្ទីរ ស.ស.រ របស់ធនាគារជាតិនៃកម្ពុជាកាន់តែច្រើន ដោយមានជំនួយពីដៃគូធនាគារ និងគ្រឹះស្ថានហិរញ្ញវត្ថុសំខាន់ៗ ដើម្បីលើកកម្ពស់ការយល់ដឹងបន្ថែម អំពីប្រវត្តិសាស្ត្រសេដ្ឋកិច្ចនិងរូបិយវត្ថុជាតិ។
ABC បានឲ្យដឹងថា គិតមកទល់បច្ចុប្បន្ន តាមរយៈគំនិតផ្តួចផ្តើមនេះធនាគារឯកជននៅកម្ពុជា បានរួមចំណែកក្នុងមូលនិធិសម្រាប់ចំណាយលើថ្លៃដឹកជញ្ជូន និងថ្លៃទស្សនា និងបានផ្តល់ឱកាសដល់សិស្សានុសិស្សប្រមាណ១៥,០០០នាក់ ដែលមកពីគ្រឹះស្ថានអប់រំរដ្ឋក្នុងរាជធានីភ្នំពេញ តំបន់ជាយរាជធានី ខេត្តកំពង់ធំ រតនគិរី ស្ទឹងត្រែង ក្រចេះ និងកំពង់ចាម អាចមកទស្សនាសារមន្ទីរ ស.ស.រ។
ប្រធានសមាគមធនាគារនៅកម្ពុជា លោក រ័ត្ន សោភ័ណ បាននិយាយថា ការបន្តចុះអនុស្សរណៈនៃការយោគយល់គ្នានេះ ធ្វើឡើងផ្អែកលើលទ្ធផល ប្រកបដោយផ្លែផ្កាដែលយើងសម្រេចបាន ក្នុងរយៈពេលពីរឆ្នាំកន្លងមក និងស្របតាមគោលការណ៍ហិរញ្ញវត្ថុ ប្រកបដោយនិរន្តរភាពរបស់សមាគមធនាគារនៅកម្ពុជា(CSFPs) ក្នុងការកសាងសមត្ថភាព និងលើកកម្ពស់អក្ខរកម្មសេដ្ឋកិច្ច។ ដំណើរស្វែងយល់នៅសារមន្ទីរ ស.ស.រ ផ្តល់ឱ្យសិស្សានុសិស្សនូវចំណេះដឹង ដ៏មានតម្លៃ និងឱកាសក្នុងការរៀនសូត្រ ពីប្រវត្តិសាស្ត្ររបស់យើង ក៏ដូចជាតម្លៃនៃរូបិយវត្ថុផងដែរ។
សហប្រធានសារមន្ទីរ ស.ស.រ លោកBlaise Kilian បានលើកឡើងថា យើងពិតជារីករាយនឹងភាពជាដៃគូដ៏ជោគជ័យនេះ ដែលបានអនុញ្ញាតឱ្យសិស្សានុសិស្ស មកពីគ្រឹះស្ថានអប់រំរដ្ឋរាប់ពាន់នាក់ បានមកសិក្សារៀនសូត្រអំពីប្រវត្តិសេដ្ឋកិច្ច និងរូបិយវត្ថុរបស់ប្រទេសកម្ពុជា ព្រមទាំងពង្រឹងបរិយាបន្ននៃសារមន្ទីរ ស.ស.រ ផងដែរ៕
