ដោយ សុខុម
កាលីហ្វ័រញ៉ា: ក្រុមហ៊ុន Google ដែលជាបុត្រសម្ព័ន្ធរបស់ក្រុមហ៊ុនពហុជាតិសាសន៍ខ្នាតយក្ស Alphabet Inc របស់សហរដ្ឋអាមេរិក បានប្រកាសថា ខ្លួននឹងជួយជ្រោមជ្រែងប្រធានាធិបតីទើបជាប់ឆ្នោតលោក ចូ បៃឌិន នៅក្នុងកិច្ចប្រឹងប្រែងរបស់លោកដើម្បីអនុម័តច្បាប់អន្តោប្រវេសន៍ថ្មីរបស់សហរដ្ឋអាមេរិក ហើយនឹងជួយចេញថ្លៃដាក់ពាក្យសម្រាប់ជនអន្តោប្រវេសន៍ ដែលស្វែងរកការងារស្របច្បាប់ធ្វើក្រោមកម្មវិធីមួយរបស់រដ្ឋាភិបាល។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី១៣ មករា។
ក្រុមហ៊ុន Google បានប្រកាសកាលពីថ្ងៃពុធ ទី១៣ មករា ថា ខ្លួននឹងជួយចេញថ្លៃដាក់ពាក្យរបស់ជនអន្តោប្រវេសន៍វ័យក្មេងប្រមាណ ៥០០ នាក់ដែលស្វែងរកការងារធ្វើក្រោមកម្មវិធីគាំពារជនអន្តោប្រវេសន៍ Deferred Action for Childhood Arrivals ហៅកាត់ DACA។
DACA ជាគោលនយោបាយអន្តោប្រវេសន៍មួយរបស់សហរដ្ឋអាមេរិក ដែលអនុញ្ញាតឱ្យបុគ្គលមួយចំនួនដែលគ្មានសិទ្ធិរស់នៅស្របច្បាប់ក្នុងសហរដ្ឋអាមេរិក ក្រោយពីត្រូវគេនាំមកកាន់ប្រទេសនេះតាំងពីកុមារ ឱ្យទទួលបានសិទ្ធិរស់នៅបណ្ដោះអាសន្ន ២ ឆ្នាំដែលអាចបន្តបានដើម្បីជៀសផុតពីការនិរទេស (បណ្ដេញចេញ) ហើយមានសិទ្ធិទទួលបានសៀវភៅការងារ។ ទោះជាយ៉ាងណា ដើម្បីទទួលបានអត្ថប្រយោជន៍ពីកម្មវិធីនេះ អ្នកទទួលផលមិនអាចមានប្រវត្តិប្រព្រឹត្តបទឧក្រិដ្ឋ ឬបទមជ្ឈិមកម្រិតធ្ងន់ជាដាច់ខាត។
ការប្រកាសនេះធ្វើឡើង ក្រោយពីក្រុមហ៊ុន Google និងក្រុមហ៊ុនធំៗផ្សេងទៀតរបស់សហរដ្ឋអាមេរិក បានរិះគន់ប្រធានាធិបតី ដូណាល់ ត្រាំ យ៉ាងឆ្អែតអស់រយៈពេល ៤ ឆ្នាំមកនេះដោយសារការរឹតបន្តឹងគោលនយោបាយអន្តោប្រវេសន៍ និងធ្វើឱ្យប៉ះពាល់ដល់សមត្ថភាពរបស់ក្រុមហ៊ុនទាំងនោះក្នុងការជួលជនអន្តោប្រវេសន៍មកធ្វើការឱ្យខ្លួន។
លោក ចូ បៃឌិន បានថ្លែងកាលពីសប្ដាហ៍មុនថា លោកនឹងស្នើច្បាប់អន្តោប្រវេសន៍ថ្មីទៅរដ្ឋសភាភ្លាមៗ នៅពេលលោកចូលកាន់តំណែងជាប្រធានាធិបតីជាផ្លូវការនៅថ្ងៃទៅ២០ មករា ដ៏ខ្លីខាងមុខនេះ។ ហើយដោយសារគណបក្សប្រជាធិបតេយ្យរបស់លោកនឹងគ្រប់គ្រងរដ្ឋសភា ដូចនេះវាជាឱកាសជួយជំរុញគំនិតរបស់លោកឱ្យក្លាយទៅជាច្បាប់។
លោក Kent Walker អនុប្រធានជាន់ខ្ពស់នៃក្រុមហ៊ុន Google បានលើកឡើងថា “យើងនឹងជួយជ្រោមជ្រែងកិច្ចប្រឹងប្រែងរបស់រដ្ឋសភាថ្មី និងរដ្ឋការថ្មីក្នុងការអនុម័តកំណែទម្រង់ច្បាប់អន្តោប្រវេសន៍មានលក្ខណៈគ្រប់គ្រុងជ្រោយ ដែលនឹងជួយកែលម្អកម្មវិធីទិដ្ឋាកាផ្អែកលើការងារដើម្បីឱ្យអាមេរិក មានការប្រកួតប្រជែងល្អជាងមុន ផ្ដល់ការធានារ៉ាប់រងប្រសើរជាងមុនដល់កម្មករនិយោជិត និងនិយោជកជាជនអន្តោប្រវេស៍ ហើយលើកកម្ពស់ដំណើរការទទួលជនអន្តោប្រវេសន៍ និងការអនុវត្តសន្តិសុខព្រំដែនដែលល្អប្រសើរ និងមានមនុស្សធម៌ជាងមុន។
លោកបានបន្ថែមទៀតថា ក្រុមហ៊ុន Google នឹងបរិច្ចាគប្រាក់ចំនួន ២៥០.០០០ ដុល្លារដល់អង្គការ United We Dream ដែលជួយជនអន្តោប្រវេសន៍កំពុងរស់នៅដោយខុសច្បាប់ក្នុងសហរដ្ឋអាមេរិក បន្ទាប់ពីទៅដល់ទឹកដីនេះតាំងពីកុមារឱ្យទទួលបានសៀវភៅការងារ និងជៀសផុតពីការបណ្ដេញចេញពីទឹកដីអាមេរិក។
លោកបានគូសបញ្ជាក់ថា សេចក្ដីសម្រេចមួយរបស់តុលាការដែលគេរំពឹងថានឹងចេញក្នុងពេលឆាប់ៗនេះ គំរាមកំហែងផ្អាកការបន្ត និងការដាក់ពាក្យស្នើសុំសៀវភៅការងារ ហើយអ្នកដែលទទួលបានវា គឺពិតជាសំណាងណាស់ ប្រៀបដូចយល់សប្ដិទាំងថ្ងៃ៕
