ដោយៈ ចំណាន
ភ្នំពេញៈ ព្រះរាជាណាចក្រកម្ពុជា និងសាធារណរដ្ឋឆែកសហការរួមគ្នា ជំរុញការផ្សព្វផ្សាយសក្តានុពលទេសចរណ៍ និងអភិវឌ្ឍវិស័យទេសចរណ៍រវាងប្រទេសទំាងពីរ ឱ្យកាន់តែសកម្ម និងជាក់ស្តែងបន្ថែមទៀត។
ព័ត៌មាននេះ បានបង្ហាញក្នុងឱកាសលោកហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកជំទាវ Markéta Kolc Hájková ឯកអគ្គរដ្ឋទូតសាធារណរដ្ឋឆែកប្រចាំកម្ពុជា និងសហការីជាន់ខ្ពស់ ចូលជួបសម្តែងការគួរសម និងពិភាក្សាការងារស្តីពីការពង្រឹងកិច្ចសហប្រតិបត្តិការ ទេសចរណ៍រវាងប្រទេសទាំងពីរ នៅទីស្តីការក្រសួងទេសចរណ៍។
ក្នុងជំនួបប្រកបដោយផ្លែផ្កានេះ លោកជំទាវឯកអគ្គរដ្ឋទូត បានថ្លែងអំណរគុណជូនដល់លោករដ្ឋមន្ត្រី ដែលបានអនុញ្ញាតចូលជួបសំដែងការគួរសម និងពិភាក្សាការងារផ្លាស់ប្តូរទស្សនៈ លើការបង្កើនកិច្ចសហប្រតិបត្តិក្នុងវិស័យទេសចរណ៍ ជាពិសេសចែករំលែកនូវបទពិសោធលើការអភិវឌ្ឍវិស័យទេសចរណ៍ និងចំណង់ចំណូលចិត្តធ្វើទេសចរណ៍របស់ប្រជាជនឆែក។
លោកជំទាវឯកអគ្គរដ្ឋទូត បានកោតសរសើរ និងវាយតម្លៃខ្ពស់ពីការអភិវឌ្ឍលើគ្រប់វិស័យ ពិសេសក្នុងវិស័យទេសចរណ៍ ដែលលោកជំទាវបានឃើញផ្ទាល់ជាក់ស្តែង រវាងការធ្វើដំណើរមកទស្សនាកម្ពុជាជាលើកដំបូងកាលពី១៥ឆ្នាំមុន និងស្ថានភាពទេសចរណ៍នាពេលបច្ចុប្បន្ននេះ ដែលទទួលការកើនឡើងគួរឱ្យកត់សម្គាល់ ដែលកើតចេញពីកត្តាសុខសន្តិភាព ស្ថិរភាពនយោបាយ សណ្តាប់ធ្នាប់សាធារណៈល្អ សុខសុវត្ថិភាពដល់ភ្ញៀវទេសចរ ដែលធានាបានដោយរាជរដ្ឋាភិបាលកម្ពុជា។
ជាកិច្ចឆ្លើយតប លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនឆែកដែលតែងតែជួយឧបត្តម្ភគាំទ្រប្រទេសកម្ពុជាលើគ្រប់វិស័យ ដើម្បីស្ថាបនាប្រទេសឡើងវិញពីបាតដៃទទេ បន្ទាប់ពីរបបប្រល័យពូជសាសន៍ ខែ្មរក្រហមបានដួលរលំចាប់តាំងពីឆ្នាំ១៩៨១ រហូតមក។
ទន្ទឹមនឹងនេះ លោករដ្ឋមន្រ្តី ក៏បានគូសបញ្ជាក់ពីកំណើនភ្ញៀវទេសចរឆែកមកទស្សនាកម្ពុជាពីមួយឆ្នាំទៅមួយឆ្នាំ។
តាមរយៈជំនួបប្រកបដោយផ្លែផ្កានេះ ភាគីទាំងពីរ បានឯកភាពចាត់ទុកវិស័យទេសចរណ៍ជាភារកិច្ចរួមគ្នា ដែលត្រូវសហការចូលរួមជំរុញការអភិវឌ្ឍវិស័យនេះ ឱ្យកាន់តែខ្លាំងក្លាបន្ថែមទៀត តាមរយៈសកម្មភាពជាក់ស្តែងរួមគ្នា កិច្ចសហការផ្សព្វផ្សាយសក្តានុពលទេសចរណ៍រួមគ្នា ដើម្បីបង្កើនចំនួនភ្ញៀវទេសចរ រវាងប្រទេសទាំងពីរឱ្យកាន់តែកើនឡើងជាលំដាប់។
ព្រះរាជាណាចក្រកម្ពុជា និងសាធារណរដ្ឋឆែក មានទំនាក់ទំនងការទូតដ៏ល្អលើគ្រប់វិស័យ ចាប់តាំងពីឆ្នាំ១៩៥៦មក ដែលគិតមកដល់បច្ចុប្បន្ន មានរយៈពេលជាង៧០ឆ្នាំមកហើយ។ ចំណងមិត្តភាពជាពិសេស គឺព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ធ្លាប់បានគង់បន្តព្រះរាជសិក្សានៅសាធារណរដ្ឋឆែក និងអាចប្រើប្រាស់ភាសាឆែកយ៉ាងស្ទាត់ជំនាញផងដែរ៕
