ដោយៈ ម៉ាណេត
ភ្នំពេញៈ កម្ពុជា និងអឺរ៉ុប បានឯកភាពជាគោលការណ៍ លើអាទិភាពសម្រាប់យុទ្ធសាស្ត្ររួមរបស់អឺរ៉ុបស្តីពី កិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ ដើម្បីជំរុញការអភិវឌ្ឍធនធានមនុស្ស ការធ្វើពិពិធកម្មសេដ្ឋកិច្ច ការលើកស្ទួយវិស័យឯកជននិងការងារ និងការអភិវឌ្ឍប្រកបដោយចីរភាពនិងបរិយាប័ន្ន។
ការឯកភាពនេះត្រូវបានធ្វើឡើងថ្ងៃទី១១ ខែមករា ឆ្នាំ២០២១ នៅទីស្តីការ ក្រុមប្រឹក្សាអភិវឌ្ឍន៍កម្ពុជា ក្នុងកិច្ចប្រជុំមួយរវាងលោកឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការ នីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា និងតំណាងសហភាពអឺរ៉ុប និងតំណាងដៃគូអឺរ៉ុបប្រចាំកម្ពុជា (ឆែក បារាំង អាល្លឺម៉ង់ ស៊ុយអ៊ែត និងស្វីស) ដឹកនាំដោយលោក Franck Viault អគ្គទីប្រឹក្សា និងជាប្រធានទទួលបន្ទុកផ្នែកកិច្ចសហប្រតិបត្តិការ នៃសហភាពអឺរ៉ុបប្រចាំកម្ពុជា។
បន្ទាប់ពីកិច្ចជុំ ភាគីទាំងពីរ បានឯកភាពជាគោលការណ៍ លើអាទិភាពសម្រាប់យុទ្ធសាស្ត្ររួមរបស់អឺរ៉ុបស្តីពីកិច្ចសហ ប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ ដូចមានចែងក្នុងយុទ្ធសាស្ត្រចតុកោណដំណាក់កាលទី៤ គឺទី១ ការអភិវឌ្ឍធនធានមនុស្ស ទី២ ការធ្វើពិពិធកម្មសេដ្ឋកិច្ច ទី៣ ការលើកស្ទួយវិស័យឯកជន និងការងារ និងទី៤ ការអភិវឌ្ឍប្រកបដោយចីរភាព និងបរិយាប័ន្ន។
លោកឈៀង យ៉ាណារ៉ាបានថ្លែងថា សហភាពអឺរ៉ុប និងដៃគួអឺរ៉ុបសម្រេចបាន សមិទ្ធផលដ៏ល្អប្រសើរ ក្នុងការអនុវត្តយុទ្ធសាស្ត្ររួមរបស់អឺរ៉ុបស្តីពី កិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០១៤-២០២០ និងកម្មវិធីណែនាំពហុឆ្នាំរបស់សហភាពអឺរ៉ុប ឆ្នាំ២០១៤-២០២០ ក៏ដូចជាកិច្ចសហប្រតិបត្តិការអភិវឌ្ឍន៍ កន្លងមក ដែលបានរួមចំណែកយ៉ាងសំខាន់ ក្នុងកិច្ចអភិវឌ្ឍន៍ប្រកបដោយចីរភាព និងបរិយាប័ន្ននៅកម្ពុជា។
សហភាពអឺរ៉ុប និងដៃគួអឺរ៉ុបទាំងអស់ បានរួមចំណែកជាមួយរាជរដ្ឋាភិបាលកម្ពុជាក្នុងការឆ្លើយតបទៅនឹងការទប់ស្កាត់ ការប្រយុទ្ធប្រឆាំងនឹងការរីករាលដាល នៃជំងឺកូវីដ-១៩ និងការកាត់បន្ថយផលប៉ះពាល់ដល់សង្គម- សេដ្ឋកិច្ចនៅប្រទេសកម្ពុជានាពេលកន្លងមក។
តំណាងដៃគូអឺរ៉ុបសម្រេចបានតាមរយៈវឌ្ឍនភាពនៃវិស័យ អាទិភាពចំនួន៤ រួមមាន៖ ១) ការអភិវឌ្ឍវិស័យសង្គមកិច្ច ២) ការជំរុញកំណើនសេដ្ឋកិច្ច ប្រកបដោយសមធម៌ និងចីរភាព ៣) ការអភិវឌ្ឍហេដ្ឋារចនាសម្ព័ន្ធនៅទីក្រុង និងជនបទ និង៤) អភិបាលកិច្ច និងអន្តរវិស័យ។ សមិទ្ធផលទាំងនេះ គឺជាសក្ខីភាពនៃការប្តេជ្ញាបន្តគាំទ្ររបស់សហភាពអឺរ៉ុប និងប្រទេសជាសមាជិកសហភាពអឺរ៉ុប និងសហព័ន្ធស្វីសសម្រាប់ដំណើរការនៃកិច្ចអភិវឌ្ឍន៍នៅកម្ពុជា។
ទន្ទឹមនឹងនេះ តំណាងដៃគូអឺរ៉ុប បានរៀបចំសេចក្តីព្រាងយុទ្ធសាស្ត្ររួមរបស់អឺរ៉ុប ស្តីពីកិច្ចសហប្រតិបត្តិការអភិវឌ្ឍន៍ សម្រាប់កម្ពុជាឆ្នាំ២០២១-២០២៧ និងសេចក្តីព្រាងកម្មវិធីណែនាំពហុឆ្នាំរបស់សហភាពអឺរ៉ុប ឆ្នាំ២០២១-២០២៧ គឺនឹងត្រូវបញ្ចប់នាចុងខែមករា ឆ្នាំ២០២១នេះ ដើម្បីត្រៀមសម្រាប់ដាក់ពិភាក្សា និងប្រមូលធាតុចូល និងអនុសាសន៍ ក្នុងកិច្ចពិគ្រោះយោបល់រវាងរាជរដ្ឋាភិបាលកម្ពុជា និងសហភាពអឺរ៉ុប-ដៃគួអឺរ៉ុបប្រចាំកម្ពុជា ដែលគ្រោងនឹងប្រព្រឹត្តទៅក្នុងអំឡុងខែកុម្ភៈ ឆ្នាំ២០២១ ខាងមុខនេះ។
ដោយឡែក ចំពោះកម្មវិធីណែនាំពហុឆ្នាំ ២០២១-២០២៧ ដែលជាកម្មវិធីសហប្រតិបត្តិការរវាងសហភាពអឺរ៉ុប និងរាជរដ្ឋាភិបាលកម្ពុជា ភាគីទាំងពីរបានឯកភាពជាគោលការណ៍ លើវិស័យអាទិភាពចំនួន៣ រួមមាន៖ ១) វិស័យសេដ្ឋកិច្ច និងការងារ ២) វិស័យអប់រំ និងបណ្តុះបណ្តាលជំនាញវិជ្ជាជីវៈ និង ៣) វិស័យអភិបាលកិច្ច។
ក្នុងចន្លោះឆ្នាំ១៩៩២-២០២០ ដៃគួអឺរ៉ុប (សហភាពអឺរ៉ុប និងប្រទេសសមាជិកចំនួន១០ ព្រមទាំងសហព័ន្ធស្វីស) បានផ្តល់ហិរញ្ញប្បទានសហប្រតិបត្តិការសរុបប្រមាណ៤២០០លានដុល្លារអាមេរិក សមមូល១៩% នៃហិរញ្ញប្បទានសរុបដែលផ្តល់ដោយដៃគូអភិវឌ្ឍន៍ទាំងអស់បានផ្តល់ដល់កម្ពុជា៕
