ដោយៈសុខុម
ក្រុងឡុងដ៍: យោងតាមសារព័ត៌មាន CNN ចុះផ្សាយកាលពីថ្ងៃទី១០ មករា ឱ្យដឹងថា មានហេតុផលជាច្រើន ដែលបានជះផលប៉ះពាល់ខ្លាំងដល់រូបិយប័ណ្ណដុល្លារ នាពេលបច្ចុប្បន្ន ហើយក្នុងចំណោមនោះ រួមមាន ទាំងព្រឹត្តិការណ៍កុបកម្ម នៅវិមានរដ្ឋសភាកាពីតូលរបស់សហរដ្ឋអាមេរិក កាលពីសប្ដាហ៍មុនផងដែរ។
តើនឹងមានអ្វីកើតឡើង?? ជាទូទៅអស្ថិរភាពនយោបាយភាគច្រើន បង្កផលប៉ះពាល់លើរូបិយប័ណ្ណទូទាំងពិភពលោក ហើយអំពើហិង្សាដែលញុះញ៉ង់ដោយប្រធានាធិបតីសហរដ្ឋអាមេរិក លោកដូណាល់ ត្រាំ ទំនងជាមិនជួយបង្កើនទំនុកចិត្តលើរបិយប័ណ្ណដុល្លារ ដែលកំពុងតែធ្លាក់ថ្លៃនោះឡើយ។
ក្រុមហ៊ុនប្រឹក្សាយោបល់អំពីហានិភ័យនយោបាយ Eurasia Group ដែលមានមូលដ្ឋាននៅញូវយ៉ក បានសង្កត់ធ្ងន់ថា “ការបែកបាក់សាមគ្គីរបស់សហរដ្ឋអាមេរិក ជាហានិភ័យធំបំផុតសម្រាប់ឆ្នាំ២០២១”។
យោងតាមលោក Ian Bremmer ប្រធានក្រុមហ៊ុន Eurasia Group ឱ្យដឹងថា អស្ថិរភាពនយោបាយ ក្នុងស្រុកនៅសហរដ្ឋអាមេរិក រួមជាមួយការគ្រប់គ្រងមិនបានល្អរបស់ប្រទេសនេះ ចំពោះការឆ្លងរាតត្បាតវីរុសកូវីដ-១៩ នឹងធ្វើឱ្យប្រធានាធិបតីទើបជាប់ឆ្នោតលោកចូ បៃឌិន ពិបាកនឹងរក្សាតួនាទីជារបស់អាមេរិក ក្នុងនាមឋានៈជាមហាអំណាចពិភពលោកលេខ១ ខ្លាំងណាស់ ទោះបីជាលោកខំប្រឹងប្រែងអស់ ពីលទ្ធភាពយ៉ាងណាក៏ដោយ។
លោកIan Bremmer បានសរសេរលើបណ្ដាញទំនាក់ទំនងសង្គមទ្វីតទ័រ កាលពីថ្ងៃព្រហស្បតិ៍សប្ដាហ៍មុនថា “សហរដ្ឋអាមេរិក ពេលនេះជួបអស្ថិរភាពនយោបាយខ្លាំងបំផុត និងបានធ្វើឱ្យបែកបាក់សាមគ្គី ក្នុងចំណោមបណ្ដាប្រទេសប្រជាធិបតេយ្យ ដែលមានឧស្សាហកម្មជឿនលឿនបំផុតរបស់ពិភពលោក”។
ចាប់តាំងពីឡើងថ្លៃអំឡុងពេលទីផ្សារ កំពុងជួបស្ថានការណ៍ចលាចល កាលពីខែមីនា ឆ្នាំមុន រូបិយប័ណ្ណដុល្លារបានធ្លាក់ថ្លៃជាង១២% ធៀបនឹងរូបិយប័ណ្ណសំខាន់ៗផ្សេងទៀត។
សង្កាត់ហិរញ្ញវត្ថុ Wall Street បានយល់ស្របថា រូបិយប័ណ្ណដុល្លានៅតែប្រឈមហានិភ័យធ្លាក់ចុះបន្ថែមទៀត៕
