ដោយៈ ចំណាន
ភ្នំពេញៈ រដ្ឋលេខាធិការក្រសួងពាណិជ្ជកម្ម លោកលីម ឡោកពិសិដ្ឋ ទទួលជួបសម្តែងការគួរសម និងពិភាក្សាការងារជាមួយគណៈប្រតិភូវិនិយោគិនជប៉ុន ដើម្បីពិភាក្សាលើកិច្ចសហប្រតិបត្តិការជម្រុញពាណិជ្ជកម្ម។
ក្នុងជំនួបនេះ គណៈប្រតិភូវិនិយោគិនជប៉ុន ដឹកនាំដោយលោក Kohei Wakabayashi ប្រធានការិយាល័យ តំណាងអង្គការពាណិជ្ជកម្មក្រៅស្រុកជប៉ុន (JETRO) ដើម្បីពិភាក្សាអំពីការពង្រឹងកិច្ចសហប្រតិបត្តិការ និងជំរុញពាណិជ្ជកម្មទ្វេភាគីរវាងកម្ពុជា និងជប៉ុន។
នៅក្នុងជំនួបនេះ លោករដ្ឋលេខាធិការ និងតំណាងស្ថាប័ន JETRO បានពិភាក្សាអំពីកិច្ចសហប្រតិបត្តិការល្អ រវាងក្រសួងពាណិជ្ជកម្ម និង JETRO ដោយបានកត់សម្គាល់អំពីកាលានុវត្តភាព នៃការពង្រឹងបន្ថែមទៀតនូវការធ្វើពាណិជ្ជកម្ម និងវិនិយោគទ្វេភាគីជាពិសេសលើវិស័យឧស្សាហកម្ម និងរោងចក្រកែច្នៃកសិផល ដើម្បីជំរុញការនាំចេញផលិតផលសក្តានុពលកម្ពុជា ទៅកាន់ទីផ្សារប្រទេសជប៉ុនឱ្យកាន់ច្រើនបន្ថែមទៀតផងដែរ។
ជាមួយគ្នានេះ លោក Kohei Wakabayashi បានលើកឡើងអំពីសារៈសំខាន់ នៃកិច្ចសម្រួលពាណិជ្ជកម្ម និងថ្លែងអំណរគុណចំពោះការយកចិត្តទុកដាក់ពីក្រសួង -ស្ថាប័នពាក់ព័ន្ធរបស់រដ្ឋាភិបាលកម្ពុជា ក្នុងការផ្តល់ការគាំទ្រ និងសម្របសម្រួលដល់ធុរកិច្ចជន និងវិនិយោគិនជប៉ុននៅកម្ពុជា៕
