ក្រុមការងារផ្នែកឯកជន “ខ” “ផ្នែកទេសចរណ៍”បើកកិច្ចប្រជុំដោយលើកឡើងបញ្ហាប្រឈមចំនួន៥

ដោយៈ ម៉ាណា

    ភ្នំពេញៈ ក្រុមការងារផ្នែកឯកជន “ខ” “ផ្នែកទេសច​រណ៍” នៃវេទិការាជរដ្ឋាភិបាល-ផ្នែកឯកជន  ដែលដឹកនាំដោយឧកញ៉ា លូ ម៉េង សហប្រធានក្រុមការងារ “ខ” តំណាងផ្នែកឯកជន ដោយបានលើកឡើងពីបញ្ហាប្រឈមធំៗចំនួន៥។

កិច្ចប្រជុំនេះក៏មានការចូលរួមផងដែរពីសំណាក់ អនុសហប្រធានក្រុមការងារ “ខ” តំណាងផ្នែកឯកជន​, តំណាងសហព័ន្ធទេសចរណ៍កម្ពុជា, តំណាងសមាគមសហគមន៍ចុងភៅកម្ពុជា, តំណាងសមាគមសណ្ឋារគារនៅកម្ពុជា  និងតំណាងក្រុមហ៊ុន ឯកជនពាក់ព័ន្ធក្នុងវិស័យទេសចរណ៍មួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីបន្តធ្វើការពិនិត្យ ពិភាក្សាលើបញ្ហាប្រឈមដែលនៅសេសសល់ និងបន្តលើកឡើងនូវបញ្ហាប្រ​ឈមថ្មីៗបន្ថែមទៀតក្នុងវិស័យទេសចរណ៍ ដើម្បីដាក់ស្នើសុំដំណោះស្រាយជាមួយនឹងដៃគូ គឺក្រសួងទេសចរណ៍ នាពេលខាងមុខនេះ។

ជាលទ្ធផល កិច្ចប្រជុំបានធ្វើការពិនិត្យ ពិភាក្សាលើបញ្ហាប្រឈមមួយចំនួនរួមមាន៖ ១.បញ្ហាទិដ្ឋាការធុរកិច្ច ២. បញ្ហាសំរាមនៅក្រុងព្រះសីហនុ ៣. បញ្ហាពន្ធអាករពិសេសសម្រាប់វិស័យទេសចរណ៍ ៤. បញ្ហាការពង្រីកទីផ្សារទេសចរណ៍សម្រាប់ទីផ្សារប្រទេសរុស្សី និងប្រទេ​សឥណ្ឌា ៥. បញ្ហាថ្លៃសេវាបង់នៅច្រកកម្ពុជា-វៀតណាមសម្រាប់ក្រុមហ៊ុនដឹកជញ្ជូនទេសចរណ៍ រួមនឹងបញ្ហាប្រឈមមួយចំនួន​ផ្សេងទៀតផងដែរ៕