ដោយ: លក្ខិណា
ភ្នំពេញ: អគ្គលេខាធិការអង្គការ OPEC លោក Mohammad Barkindo បាននិយាយថា ស្ថិតក្នុងចំណោមសញ្ញាជាច្រើនដែលរំពឹងទុកនោះ ទស្សនវិស័យសម្រាប់ឆមាសទី ១ ឆ្នាំ ២០២១ គឺមានភាពច្របូកច្របល់ ហើយនៅតែមានហានិភ័យធ្លាក់ចុះជាច្រើន។
យោងតាមការចុះផ្សាយរបស់ Channelnewsasia ឱ្យដឹងនៅថ្ងៃទី៤ ខែមករា ឆ្នាំ០២១ ថា នៅក្នុងខែធ្នូ ក្រុមប្រទេសអង្គការ OPEC+ បានសម្រេចចិត្តបង្កើនផលិតកម្មចំនួន៥សែនបារ៉ែលក្នុងមួយថ្ងៃ ចាប់ពីខែមករា ដែលជាផ្នែកមួយនៃការកើនឡើងជាបណ្តើរៗ ហើយរំពឹងថានឹងកើនចំនួន២លានបារ៉ែល ក្នុងមួយឆ្នាំនៅឆ្នាំនេះ ប៉ុន្តែប្រទេសជាសមាជិកមួយចំនួនបានចោទសួរពីភាពចាំបាច់នៃការជំរុញបន្ថែមទៀត ដោយសារតែការរីករាលដាលជំងឺរាតត្បាត។
សហស្ថាបនិកក្រុមហ៊ុនផលិតថាមពល លោក Amrita Sen បាននិយាយថា មូលដ្ឋានគ្រឹះ ដែលកំពុងចុះខ្សោយ ជាការប្រយ័ត្នប្រយែងសម្រាប់អង្គការ OPEC + ដើម្បីរក្សាទិន្នផលឱ្យស្ថិតស្ថេរ ហើយមានការពេញចិត្តក្នុងចំណោមប្រទេសផលិតប្រេងធំៗមួយចំនួន ដើម្បីរក្សាផលិតកម្ម។
មេដឹកនាំអង្គការ OPEC គឺប្រទេសអារ៉ាប៊ីសាអូឌីតបានស្នើឱ្យមានវិធីសាស្រ្តប្រុងប្រយ័ត្នជាងមុនក្នុងកិច្ចប្រជុំមុនៗ ខណៈដែលសមាជិកអង្គការ OPEC ប្រទេសអារ៉ាប់រួម និងប្រទេសមិនមែនអង្គការ OPEC បាននិយាយថា ពួកគេចង់អោយមានការបង្កើនល្បឿនទិន្នផលប្រេងលឿនជាងមុន។
លោកAmrita Seបាននិយាយថា សេដ្ឋកិច្ចពិភពលោកអាចស្ទុះងើបឡើងវិញយ៉ាងខ្លាំងនៅឆមាសទី ២ នៃឆ្នាំ ២០២១ ប៉ុន្តែវិស័យជាច្រើនដូចជាការធ្វើដំណើរទេសចរណ៍ ការកំសាន្ត និងបដិសណ្ឋារកិច្ច អាចចំណាយពេលច្រើនឆ្នាំដើម្បីឈានដល់កម្រិតមុនមានជំងឺរាតត្បាត។
អង្គការ OPEC + ត្រូវបានបង្ខំឱ្យកាត់បន្ថយផលិតកម្មក្នុងចំនួនដ៏ច្រើនបំផុតនៅឆ្នាំ ២០២០ ដោយសារវិធានការទប់ស្កាត់ជាសកលរារាំងដល់តម្រូវការប្រេង។ អង្គការOPEC + បានកាត់បន្ថយទិន្នផលប្រេង ៩.៧ លានបារ៉ែលក្នុងមួយថ្ងៃ បន្ទាប់មកកាត់បន្ថយដល់ ៧.៧ លានបារ៉ែល និងទីបំផុតដល់ ៧.២ លានបារ៉ែល ចាប់ពីខែមករាតទៅ៕
