ប្រធានធនាគារពិភពលោកស្នើឲ្យNBCចែករំលែកបទពិសោធន៍ទាក់ទងបច្ចេកវិទ្យាហិរញ្ញវត្ថុដល់ប្រទេសដទៃ

ដោយៈ ម៉ាលីនណា

ភ្នំពេញៈ ប្រធានធនាគារពិភពលោកប្រចាំកម្ពុជា លោកស្រី Tania Meyerបានស្នើឲ្យធនាការជាតិនៃកម្ពុជា(NBC)ចែករំលែកបទពិសោធន៍ពីបច្ចេកវិទ្យាហិរញ្ញវត្ថុដល់ប្រទេសដទៃ ដែលកម្ពុជាបានអនុវត្តន៍យ៉ាងល្អប្រសើរ។

ព័ត៌មាននេះត្រូវបានលើកឡើង ក្នុងពេលលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យលោកស្រី Tania Meyer ប្រធានគ្រប់គ្រង ធនាគារពិភពលោកប្រចាំកម្ពុជា និងសហការី ចូលជួបសម្តែងការគួរសម និងពិភាក្សាការងារ នារសៀលថ្ងៃទី២៥ ខែវិច្ឆិកា ឆ្នាំ២០២៥។

ក្នុងជំនួបនេះ លោកជំទាវទេសាភិបាល និងលោកស្រី Tania បានលើកឡើងពីកិច្ចសហប្រតិបត្តិការល្អ រវាងស្ថាប័នទាំងពីរនាពេលកន្លងមក។ ជាក់ស្តែង ធនាគារពិភពលោកបាន និងកំពុងផ្តល់ជំនួយបច្ចេកទេសសំខាន់ៗមួយចំនួន ដល់ធនាគារជាតិនៃកម្ពុជាដូចជា ការរួមចំណែកក្នុងការអភិវឌ្ឍសមត្ថភាព គ្រប់គ្រងទុនបម្រុងអន្តរជាតិ ក្រប​ខ័ណ្ឌគ្រប់គ្រងនិងបង្ការវិបត្តិ ប្រព័ន្ធធានារ៉ាប់រងលើប្រាក់បញ្ញើ និងបច្ចេកវិទ្យាជាដើម។

លោកស្រីTania ក៏បានលើកសរសើរ និងវាយតម្លៃខ្ពស់ចំពោះសមិទ្ធផល ដែលធនាគារជាតិនៃកម្ពុជាសម្រេចបាន ដូចជា ការរក្សាបានស្ថិរភាពអត្រាប្តូរប្រាក់ និងស្ថិរភាពថ្លៃ ភាពរឹងមាំនៃប្រព័ន្ធធនាគារ និងការរីកចម្រើន នៃប្រព័ន្ធទូទាត់ឌីជីថលនៅកម្ពុជា។ ក្នុងន័យនេះ លោកស្រី បានលើកទឹកចិត្តឱ្យធនាគារជាតិនៃកម្ពុជា បន្តជួយចែករំលែ​កបទពិសោធន៍ជោគជ័យ លើការអភិវឌ្ឍប្រព័ន្ធទូទាត់ ក៏ដូចជាសមិទ្ធផលផ្សេងទៀតទៅកាន់ប្រទេសផ្សេងៗផងដែរ។

ជាការឆ្លើយតប លោកជំទាវទេសាភិបាល បានមានប្រសាសន៍ពីការចែករំលែកបទពិសោធន៍ នៃការអភិវឌ្ឍប្រព័ន្ធទូទាត់ឌីជីថលកម្ពុជា ការគ្រប់គ្រងទុនបម្រុងអន្តរជាតិ និងការត្រួតពិនិត្យប្រព័ន្ធធនាគារ ទៅកាន់បណ្តាប្រទេសនានាទាំងក្នុងតំបន់ និងពិភពលោកនាពេលកន្លងមក។

បន្ថែមលើនេះ លោកជំទាវក៏បានបញ្ជាក់ថា ធនាគារជាតិនៃកម្ពុជាតែងទទួលស្វាគមន៍ ដំណើរទស្សនកិច្ចសិក្សា របស់គណៈប្រតិភូជាន់ខ្ពស់នៃធនាគារកណ្តាលនានា មកកាន់កម្ពុជាក្នុងគោលបំណងស្វែងយល់ពីដំណើរការអភិវឌ្ឍប្រព័ន្ធទូទាត់នៅកម្ពុជា។

លើសពីនេះ លោកជំទាវទេសាភិបាល និងលោកស្រី Tania បានផ្លាស់ប្តូរទស្សនាទាន អំពីការអភិវឌ្ឍសេដ្ឋកិច្ចកម្ពុជា និងបញ្ហាប្រឈមដែលកំពុងជួបប្រទះ ដោយសារកត្តាខាងក្រៅមួយចំនួន។

លោកជំទាវទេសាភិបាល ក៏បានលើកឡើងពីអត្ថប្រយោជន៍នៃការរីកចម្រើននៃបច្ចេកវិទ្យា និងហានិភ័យពាក់ព័ន្ធ ជាពិសេស ការរីកចម្រើនយ៉ាងឆាប់រហ័សនៃបញ្ញាសិប្បនិម្មិត AI បញ្ហាសាយប័រ និងអនឡាញស្កេម ដែលទាមទារឱ្យមានកិច្ចសហការ ពីគ្រប់ភាគីពាក់ព័ន្ធដើម្បីពង្រឹងចំណេះដឹងផ្នែកហិរញ្ញវត្ថុ និងរក្សាស្ថិរភាពហិរញ្ញវត្ថុ៕