ដោយៈ ម៉ាណា
ភ្នំពេញៈ អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ លោកហេង សុធី បានដឹកនាំកិច្ចប្រជុំពិភាក្សាស្ដីពីយុទ្ធសាស្រ្តវាយតម្លៃផលប៉ះពាល់បរិស្ថាន ជាផ្នែកមួយក្នុងការសិក្សាការរៀបចំគ្រប់គ្រងតំបន់កំពង់ផែជាតិ។
យុទ្ឋសាស្រ្តនេះ ស្ថិតក្រោមគម្រោងពង្រឹងសមត្ថភាពរដ្ឋបាលកំពង់ផែនៃព្រះរាជាណាចក្រកម្ពុជា ជាមួយនឹងក្រុមការងារជំនាញការបច្ចេកទេស នៃទីភ្នាក់ងារសហប្រតិបត្តិការជប៉ុន(JICA) ដោយមានការចូលរួមពីសំណាក់ លោក-លោកស្រីអគ្គនាយករង លោកប្រធាននាយកដ្ឋាន និងលោក-លោកស្រីអនុប្រធាននាយកដ្ឋាន និងមន្ត្រីជំនាញរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ។
កិច្ចប្រជុំនេះបានរៀបចំឡើង ដើម្បីធ្វើបទបង្ហាញ និងពិភាក្សាទៅលេីចំណុចមួយចំនួន ដែលមានទាក់ទងនឹងបរិស្ថាន នៅក្នុងការសិក្សាគម្រោងដែលត្រៀមបង្ហាញ នៅក្នុងសិក្ខាសាលាផ្សព្វផ្សាយស្ដីពីការរៀបចំគ្រប់គ្រងតំបន់កំពង់ផែជាតិ ក្រោមគម្រោងពង្រឹងសមត្ថភាពរដ្ឋបាលកំពង់ផែ ដែលនឹងប្រព្រឹត្តទៅនៅថ្ងៃទី២០ ខែវិច្ឆិកា ឆ្នាំ២០២៥ ខាងមុខនេះ៕
