ដោយៈ ម៉ាណា
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយដៃគូពាក់ព័ន្ធនឹងរៀបចំព្រឹត្តិការណ៍ “ពិព័រណ៍ការងារ និងផលិតភាពជាតិ” នៅចុងសប្តាហ៍នេះ ដោយមានក្រុមហ៊ុនចូលរួមប្រមាណ១៥០។
ព្រឹត្តិការណ៍នេះ នឹងផ្តល់ឱកាសការងារជាង៣ម៉ឺនកន្លែង សម្រាប់អ្នកស្វែងរកការងារ ជាពិសេសអតីតពលករត្រឡប់ មកពីធ្វើការនៅប្រទេសថៃ។
“ពិព័រណ៍ការងារ និងផលិតភាពជាតិ ឆ្នាំ២០២៥” នឹងប្រព្រឹត្តិទៅចាប់ពីថ្ងៃទី១-២ ខែវិច្ឆិកា ឆ្នាំ២០២៥ នៅសាលពិព័រណ៍កោះពេជ្រ រាជធានីភ្នំពេញ ក្រោមប្រធានបទ “វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ”។
ព្រឹត្តិការណ៍នេះ ទទួលបានការគាំទ្រពីអង្គការអន្តរជាតិខាងការងារ(ILO) ទីភ្នាក់ងារសហប្រតិបត្តិការអន្តរជាតិកូរ៉េ មូលនិធិអភិវឌ្ឍន៍ជំនាញ និងដៃគូពាក់ព័ន្ធជាច្រើនទៀត។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសាបានឲ្យដឹងថា ព្រឹត្តិការណ៍នេះនឹងផ្តល់ឱកាសឱ្យសិស្ស/និស្សិត ប្រជាពលរដ្ឋទូទៅ ជាពិសេសអ្នកស្វែងរកការងារអាចមកចូលទស្សនា និងដាក់ពាក្យសុំធ្វើការភ្លាមៗ ហើយក៏អាចមានការសម្ភាសន៍ការងារភ្លាមៗផងដែរ។ ព្រឹត្តិការណ៍នេះនឹងផ្តល់ផលចំណេញយ៉ាងច្រើនទៅដល់អ្នកចូលរួម។
លោកអះអាងថា ពិព័រណ៍នេះ មានការចូលរួមពីសំណាក់ក្រសួង ស្ថាប័ន ក្រុមហ៊ុន សហគ្រាស និងគ្រឹះស្ថានអប់រំបណ្តុះបណ្តាល ប្រមាណ១៥០ ដែលមានស្តង់សរុបជាង១៨០ ដែលនឹងដាក់តាំងបង្ហាញពីឱកាសការងារយ៉ាងច្រើន ហើយក៏នឹងផ្តល់ឱកាសការងាររហូតដល់ជាង៣ម៉ឺនកន្លែងនៅក្នុងវិស័យជាច្រើន។
ការងារផ្ទាល់តែម្តងនៅអគារពិព័រណ៍កោះពេជ្រ រាជធានីភ្នំពេញ។ សូមបងប្អូនទាំងអស់ មកចូលរួមការតាំងពិព័រណ៍ការងារ ដើម្បីស្វែងរកការងារនៅទីនោះផ្ទាល់។ នេះជាមោទនភាពថ្មីមួយទៀត ដែលរាជរដ្ឋាភិបាលក៏ដូចជាក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញ ដើម្បីបងប្អូនស្វែងរកការងារធ្វើ មានភាពងាយស្រួលតាមដែលអាចធ្វើទៅបាន។
យោងតាមក្រសួងការងារ គោលបំណងសំខាន់ៗនៃព្រឹត្តិការណ៍ “ពិព័រណ៍ការងារ និងផលិតភាពជាតិ ឆ្នាំ២០២៥” គឺដើម្បីបន្តរក្សាតុល្យភាពក្នុងទីផ្សារការងារ តាមរយៈការជួយជ្រោមជ្រែងនិយោជកដែលមានតម្រូវការជ្រើសរើសកម្លាំងពលកម្ម និងអ្នកស្វែងរកការងារ បង្កើតឱ្យមានកន្លែងជួបជុំគ្នាដ៏ធំ និងងាយស្រួលរវាងអ្នកស្វែងរកការងារ និយោជក អ្នកផ្តល់ការអប់រំបណ្ដុះបណ្ដាល និងដៃគូពាក់ព័ន្ធនានា ដើម្បីធ្វើការផ្លាស់ប្ដូរ និងចែករំលែកព័ត៌មានទីផ្សារការងារ ហើយក៏មានការរៀបចំ នូវសិក្ខាសាលាផលិតភាព ដើម្បីលើកកម្ពស់ការយល់ដឹងស្តីពី ការបង្កើនផលិតភាពការងារ ដោយមានការចែករំលែកចំណេះដឹង និងបទពិសោធពីវាគ្មិនជំនាញៗជាច្រើន៕
