ដោយៈ ម៉ាណា
ភ្នំពេញៈ កម្ពុជានឹងទទួលបានផលវិជ្ជមាន ពីការចរចាលើកិច្ចព្រមព្រៀងពាណិជ្ជកម្មបដិការរវាងកម្ពុជា និងសហរដ្ឋអាមេរិក ដែលនឹងប្រព្រឹត្តទៅដោយផ្ទាល់នៅរដ្ឋធានីវ៉ាស៊ីនតោន របស់សហរដ្ឋអាមេរិក នាថ្ងៃទី១៤-១៥ ខែឧសភា ឆ្នាំ២០២៥ ខាងមុខ។
កាលពីនាព្រឹកថ្ងៃទី២ ខែឧសភា អង្គភាពអ្នកនាំពាក្យរាជរដ្ឋាភិបាលកម្ពុជា បានចេញសេចក្ដីប្រកាសព័ត៌មានមួយ ដោយលើកឡើងថា នាព្រឹកថ្ងៃទី២ ខែឧសភា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) លោកស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី ១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានដឹកនាំក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក បានជួបប្រជុំទ្វេភាគីតាមប្រព័ន្ធវីដេអូ ជាមួយនឹងតំណាងពាណិជ្ជកម្មសហរដ្ឋអាមេរិក ដែលដឹកនាំដោយ លោកស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។
សេចក្តីប្រកាសព័ត៌មានបញ្ជាក់ថា “រាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត”។
អនុប្រធានសភាពាណិជ្ជកម្ពុជា-ចិន លោក ឡោ វិចិត្រ ជឿជាក់ថា រាជរដ្ឋាភិបាលកម្ពុជាកំពុងបង្ហាញពីឆន្ទៈ ក្នុងការសម្របសម្រួលពាណិជ្ជកម្មជាមួយសហរដ្ឋអាមេរិក តាមរយៈការបង្កើនកិច្ចខិតខំទិញទំនិញពីអាមេរិកឱ្យបានកាន់តែច្រើន ក៏ដូចជាការសន្យាកាត់បន្ថយអត្រាពន្ធគយ ក្នុងអត្រាណាមួយតាមលទ្ធភាពរបស់រដ្ឋាភិបាល។
លោកបន្ថែមថា “បើការចរចារវាងកម្ពុជា និងសហរដ្ឋអាមេរិក ទទួលបានលទ្ធផលជាវិជ្ជមាន គឺប្រាកដណាស់ថាទំនិញផលិតនៅកម្ពុជា នឹងកាន់តែមានទីផ្សារធំទូលាយនៅសហរដ្ឋអាមេរិក”។ លោកបន្ថែមថា “បច្ចុប្បន្នចង្វាក់ផលិតកម្មនៅកម្ពុជា បានកើនឡើងជាបន្តបន្ទាប់ ជាពិសេសផលិតផលសម្លៀកបំពាក់ ស្បែកជើង កាបូបធ្វើដំណើរ កង់ សំបកកង់រថយន្ត និងផលិតផលកសិកម្មមួយចំនួនទៀត”។
លោកបានបន្តថា ដោយសារកម្ពុជាមានតម្លៃពលកម្ម ប្រកួតប្រជែងខ្លាំង ដូច្នេះប្រសិនបើអាមេរិក បន្ធូរបន្ថយពន្ធនាំចូលសម្រាប់ផលិតផលរបស់យើង គឺនឹងមានទំនិញកាន់តែច្រើនរត់ចូលទីផ្សារអាមេរិក។ ទោះយ៉ាងណា កម្ពុជាក៏មានភាពចាំបាច់ ក្នុងការបង្កើតការបញ្ជាទិញទំនិញផលិតនៅអាមេរិកផងដែរ។
យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា(GDCE) បានបង្ហាញថា ក្នុងឆ្នាំ២០២៤ កម្ពុជា-អាមេរិកសម្រេចបានទំហំពាណិជ្ជកម្ម ១០,១៨ ពាន់លានដុល្លារ កើនឡើង១១,២ភាគរយក្នុងនោះកម្ពុជានាំចេញទៅអាមេរិក ក្នុងតម្លៃ៩,៩ពាន់លានដុល្លារ កើនឡើង១១,៤ភាគរយ ខណៈអាមេរិកនាំចូលកម្ពុជាវិញ ក្នុងតម្លៃ ២៦៤,១៤លានដុល្លារ។
រដ្ឋបាលសហរដ្ឋអាមេរិក ដឹកនាំដោយលោកប្រធានាធិបតី Donald J. Trump កាលពីថ្ងៃទី៣ ខែមេសា(ម៉ោងនៅសហរដ្ឋអាមេរិក) បានប្រកាសពីការដំឡើងពន្ធគយ សម្រាប់ការនាំចូលទំនិញពីស្ទើរគ្រប់ប្រទេស ទៅកាន់ទីផ្សារសហរដ្ឋអាមេរិក ចាប់ពីថ្ងៃទី៩ ខែមេសា ឆ្នាំ២០២៥ តទៅ។ ទោះយ៉ាងណា នៅពេលកាលបរិច្ឆេទចូលមកដល់ លោក Donald J. Trump ក៏បានសម្រេចពន្យារពេលចំនួន ៩០ថ្ងៃ ដើម្បីបើកឱកាសឱ្យប្រទេសនីមួយៗ ជួបចរចាទ្វេភាគីជាមួយរដ្ឋាភិបាលសហរដ្ឋអាមេរិក។
កម្ពុជាត្រូវបានសហរដ្ឋអាមេរិក កំណត់យកពន្ធទំនិញក្នុងអត្រា ៤៩ភាគរយ ដែលជាកម្រិតខ្ពស់ជាងគេក្នុងតំបន់អាស៊ាន។ ការកំណត់អត្រាពន្ធថ្មីនេះ ត្រូវបានធ្វើឡើងដោយផ្អែកលើ ចំនួនទឹកប្រាក់នៃអតុល្យភាពជញ្ជីងពាណិជ្ជកម្មទ្វេភាគីកម្ពុជា -សហរដ្ឋអាមេរិក ក្នុងឆ្នាំ ២០២៤៕
