ចូលរួមក្នុង Chanel : Cambodia Financial Times ដើម្បីទទួលបានព័ត៌មានយ៉ាងឆាប់រហ័ស
ដោយៈ ម៉ាណា
ភ្នំពេញៈ មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជាបានឲ្យដឹងថាក្នុងរយៈពេលត្រីមាសទី១ឆ្នាំនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគំរោវិនិយោគចំនួន១៧២ មានទុនវិនិយោគប្រមាណ២៥០០លានដុល្លារអាមេរិក។
លោកបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានថ្លែងបែបនេះ ក្នុងពេលបានដឹកនាំក្រុមការងារទទួលជួបពិភាក្សាការងារជាមួយ គណៈប្រតិភូ អង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ ហៅកាត់ជាភាសាអង់គ្លេសថា AMRO ដឹកនាំដោយ លោកបណ្ឌិត JINHO CHOI ប្រធានក្រុមសេដ្ឋវិទូ ដែលធ្វើបេសកកម្មស្វែងយល់ អំពីស្ថានភាពម៉ាក្រូសេដ្ឋកិច្ច និងការវិនិយោគរបស់កម្ពុជា។
លោកបណ្ឌិត សរ សិនិរ៉ា បានជម្រាបជូនគណៈប្រតិភូយ៉ាងពិស្តារ អំពីស្ថានភាពនៃកំណើនជាបន្តបន្ទាប់ នៃរំហូរការវិនិយោគមកកម្ពុជា ដែលគួរឱ្យកត់សម្គាល់។ ជាក់ស្ដែងក្នុងឆ្នាំ ២០២៤ កន្លងទៅ ក.អ .ក. បានអនុម័តគម្រោងវិនិយោគបន្ថែមចំនួន៤១៤ គម្រោង មានទុនវិនិយោគសរុប ប្រមាណ៧ពាន់លានដុល្លារអាមេរិក បានបង្កើតការងារជូនប្រជាពលរដ្ឋកម្ពុជា ប្រមាណ៣៣ម៉ឺនកន្លែងបន្ថែម ចំនួនគម្រោងនេះ គឺមានកំណើន៤០% ធៀបទៅនឹងឆ្នាំ២០២៣។
លោកបន្តថា នៅក្នុងត្រីមាសទី១ ឆ្នាំ២០២៥ រំហូរទុនវិនិយោគមកកម្ពុជា កំពុងបន្តកើនឡើងគួរកត់សម្គាល់ ដែលក្នុងរយៈពេល៣ ខែដើមឆ្នាំ២០២៥នេះ ក.អ.ក.បានអនុម័តគម្រោងវិនិយោគសរុប ចំនួន១៧២គម្រោង កើនឡើងប្រមាណ១៤% ធៀបទៅនឹងរយៈពេល ៣ ខែដូចគ្នា ក្នុងឆ្នាំ២០២៤ ក្នុងទុនវិនិយោគសរុបប្រមាណ២.៥០០ លានដុល្លារអាមេរិក ដែលបានបង្កើតការងារ ជូនប្រជាពលរដ្ឋកម្ពុជាប្រមាណ១២ម៉ឺនកន្លែងបន្ថែមទៀត។
លោកបណ្ឌិតបានចែករំលែក ជាមួយគណៈប្រតិភូផងដែរអំពីផែនការទាក់ទាញវិនិយោគបន្ថែមមកកម្ពុជា និងការធ្វើពិពិធកម្មមុខសញ្ញាវិនិយោគ ដើម្បីជំរុញកំណើនសេដ្ឋកិច្ច តាមរយៈការរក្សាឱ្យបាននូវទំនាក់ទំនងការទូតល្អ ជាមួយប្រទេសជាដៃគូសេដ្ឋកិច្ច និងវិនិយោគ ដើម្បីរក្សាភាពធននៃសេដ្ឋកិច្ចកម្ពុជា នៅក្នុងស្ថានភាពនៃសង្គ្រាមពាណិជ្ជកម្ម ដែលគម្រាមកំហែងដល់ពាណិជ្ជកម្មសកលលោក។
ក្នុងឱកាសនោះ លោកបណ្ឌិត JINHO CHOI បានសំដែងការសាទរ ជូនចំពោះរាជរដ្ឋាភិបាលកម្ពុជា ចំពោះការរក្សាបាននូវកំណើននៃការទាក់ទាញរំហូរទុនវិនិយោគមកកម្ពុជា និងបង្ហាញនូវការស្ងើចសរសើរចំពោះទស្សនៈវិស័យជាវិជ្ជមាន របស់រាជរដ្ឋាភិបាលកម្ពុជា និងជឿជាក់ថា កម្ពុជានឹងអាចចាប់យកឱកាស ក្នុងការទាក់ទាញវិនិយោគបន្ថែមទៀត៕
