ដោយៈ ម៉ាណា
ភ្នំពេញៈ ចំនុចសំខាន់ៗចំនួន៧ ត្រូវបានលើកយកមកពិភាក្សា និងដោះស្រាយនៅក្នុងកិច្ចប្រជុំក្រុម “ញ” របស់ក្រសួងរ៉ែ និងថាមពល និងផ្នែកឯកជនពាក់ព័ន្ឋក្នុងវិស័យនេះ។
នៅទីស្តីការក្រសួងរ៉ែ និងថាមល មានរៀបចំកិច្ចប្រជុំក្រុមការងារ ក្រុម “ញ” “ផ្នែកធនធានរ៉ែ និងថាមពល” នៃវេទិការាជរដ្ឋាភិបាល-ផ្នែកឯកជន ដែលដឹកនាំដោយសហប្រធានក្រុមការងារទាំងពីរ លោកកែវ រតនៈ រដ្ឋមន្ត្រីក្រសួងរ៉ែ និងថាមពល និងជាសហប្រធានក្រុមការងារ “ញ” តំណាងផ្នែករដ្ឋាភិបាល និងឧកញ៉ា អ៊ុន យុទ្ធី អនុប្រធានសភាពាណិជ្ជកម្មកម្ពុជា និងជាសហប្រធានក្រុមការងារ “ញ” តំណាងផ្នែកឯកជន។
កិច្ចប្រជុំនេះក៏មានការចូលរួមផងដែរ ពីសំណាក់តំណាងក្រសួងស្ថាប័នពាក់ព័ន្ធដៃលជាសមាជិក សមាជិកានៃក្រុមការងារ “ញ” តំណាងផ្នែករដ្ឋាភិបាល និងតំណាងផ្នែកឯកជនដែលជាសមាជិក សមាជិកានៃក្រុមការងារ “ញ” ជាច្រើនទៀតផងដែរ។
កិច្ចប្រជុំនេះមានគោលបំណង ដើម្បីពិគ្រោះ ពិភាក្សា និងដោះស្រាយ នូវបញ្ហាប្រឈមក្នុងវិស័យធនធានរ៉ែ និងថាមពល ដែលស្នើឡើងដោយផ្នែកឯកជន។
កិច្ចប្រជុំបានដំណើរការពិនិត្យ ពិភាក្សា និងដោះស្រាយទៅលើបញ្ហាប្រឈមរបស់ផ្នែកឯកជនរួមមាន ទី១ បញ្ហាប្រតិបត្តិការរបស់ការដ្ឋានថ្មសំណង់ខុសច្បាប់ ទី២ បញ្ហានៃការត្រួតពិនិត្យការដ្ឋានថ្មសំណង់របស់មន្ត្រីអនុវត្តន៍ច្បាប់ ទី៣ ការបង់ពន្ធលើសួយសារមិនស្មើភាពគ្នា ទី៤ ការជួលទីតាំង ទី៥ ការបញ្ចប់អាជ្ញាប័ណ្ណរ៉ែពីសំណាក់ក្រសួង ទី៦ ការទទួលប្រាក់ឧបត្ថម្ភធនពីអគ្កីសនីភាវូបនីយកម្ម ទី៧ ការផ្គត់ផ្គង់ថាមពលចំពោះវិស័យស្រូវអង្ករ រួមនឹងបញ្ហាមួយចំនួនផ្សេងទៀតផងដែរ ដែលនឹងត្រូវលើកយកទៅពិភាក្សា និងដោះស្រាយជាលក្ខណះបច្ចេកទេសបន្ថែមទៀត៕
