ដោយៈ ម៉ាណា
ភ្នំពេញៈ នៅចុងខែមីនានេះ ប្រទេសកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូល ឧស្សាហកម្មវាយនភណ្ឌពិភពលោក ឆ្នាំ២០២៥ (Cambodia Global Textile Summit 2025)។
យោងតាមបណ្តាញសង្គមរបស់សភាពាណិជ្ជកម្មអឺរ៉ុប ប្រចាំនៅកម្ពុជា (Eurocham Cambodia) កាលពីថ្ងៃទី២៥ ខែមីនា ឱ្យដឹងថា ចាប់ពីថ្ងៃទី៣១ ខែមីនា ដល់ថ្ងៃទី១ ខែមេសា ឆ្នាំ២០២៥ កម្ពុជានឹងធ្វើជាម្ចាស់ផ្ទះ ព្រឹត្តិការណ៍ឧស្សាហកម្មវាយនភណ្ឌពិភពលោក ឆ្នាំ២០២៥ នៅសណ្ឋាគារសូហ្វីតែលភ្នំពេញ។
ព្រឹត្តិការណ៍នេះ ជាការប្រមូលផ្តុំអ្នកដឹកនាំធុរកិច្ចធំៗ ដៃគូអភិវឌ្ឍន៍ និងម៉ាកយីហោល្បីៗពិភពលោក ដើម្បីពិភាក្សាអំពីអនាគតនៃវិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ។
Eurocham Cambodia បានឱ្យដឹងទៀតថា ក្នុងព្រឹត្តិការណ៍រយៈពេល២ថ្ងៃនេះ នឹងមានកិច្ចពិភាក្សា និងការពន្យល់បកស្រាយពីសំណាក់អ្នកជំនាញក្នុងវិស័យវាយនភណ្ឌផងដែរ។
ព្រឹត្តិការណ៍នេះ រៀបចំដោយសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), កម្មវិធី Better Factories Cambodia (BFC) នៃអង្គការ ILO, អង្គការGIZ និងសហការរៀបចំដោយ សភាពាណិជ្ជកម្មអឺរ៉ុប(Eurocham)។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បាននិយាយថា នេះជាមោទនភាពសម្រាប់ប្រទេសកម្ពុជាដែលធ្វើជាម្ចាស់ផ្ទះ នៃកិច្ចប្រជុំកំពូលឧស្សាហកម្ម វាយនភណ្ឌពិភពលោក ឆ្នាំ២០២៥។
លោកបញ្ជាក់ថា “ព្រឹត្តិការណ៍នេះ ក៏នឹងបង្ហាញពិភពលោកអំពីប្រទេសកម្ពុជា ដែលជាប្រទេសមានសក្តានុពលនៅក្នុងឧស្សាហកម្ម ខណៈកម្ពុជាបាន និងកំពុងកៀរគរវិនិយោគបរទេស កាន់តែច្រើនឱ្យចូលមកបណ្តាក់ទុនផ្ទាល់”។
លោកបន្តថា ឧស្សាហកម្មវាយនភណ្ឌនៅកម្ពុជា កំពុងបោះជំហានទៅមុខកាន់តែលឿន។ ការណ៍នេះ ក៏បានជួយបង្កើតការងារជូនប្រជាពលរដ្ឋ ព្រមទាំងប្រាក់ចំណូលគ្រួសារ និងកំណើនសេដ្ឋកិច្ចជាតិផងដែរ។
លោកបានបញ្ជាក់ថា “កំណើននេះបង្ហាញឱ្យឃើញថា កម្ពុជាជាប្រទេសមានសុខសន្តិភាព សុវត្ថិភាព ស្ថិរភាព ហើយជាប្រទេសកំពុងមានការអភិវឌ្ឍឧស្សាហកម្ម ជាពិសេសវិស័យឧស្សាហកម្មវាយនភណ្ឌកាត់ដេរដែលបង្ហាញទៅពិភពលោកថា កម្ពុជាគឺជាកន្លែងនៃការវិនិយោគ ជាទីកន្លែងនៃការបង្កើតរោងចក្រ និងផលិតទំនិញសម្រាប់នាំចេញទៅកាន់បណ្តាប្រទេសនានាលើពិភពលោក”។
លោកបន្ថែមថា នេះក៏បង្ហាញផងដែរថាកម្ពុជា កំពុងដើរតួនាទីដ៏សំខាន់ក្នុងការផលិត និងនាំចេញទំនិញសម្រាប់ផ្គត់ផ្គង់ទីផ្សារក្នុងតំបន់ ក្រៅតំបន់ និងពិភពលោកទាំងមូល ដែលជាគោលនយោបាយដ៏ល្អរបស់កម្ពុជា។ ព្រឹត្តិការណ៍នេះ ក៏ជាឱកាសដែលកម្ពុជាបង្ហាញទៅបរទេស និងការសហការជាមួយបរទេស ជាពិសេសនៅក្នុងវិស័យពាណិជ្ជកម្មអន្តរជាតិ។ កម្ពុជាក៏មាន កិច្ចព្រមព្រៀងពាណិជ្ជកម្មសេរីទ្វេភាគី-ពហុភាគីផ្សេងៗ ដើម្បីពង្រីកវិស័យឧស្សាហកម្ម ពាណិជ្ជកម្ម ក៏ដូចជា វិស័យផ្សេងៗទៀតពាក់ព័ន្ធនាំចេញទៅកាន់ពិភពលោក។
អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេង បានកត់សម្គាល់ថា ការងើបឡើងវិញនៃកំណើនសេដ្ឋកិច្ចសកល ពីវិបត្តិបណ្តាលពីជំងឺកូវីដ១៩ ព្រមទាំងវិបត្តិនយោបាយនៅប្រទេសមានមូលដ្ឋានផលិតកម្ម ក្នុងវិស័យវាយនភណ្ឌធំៗ ដូចជា មីយ៉ាន់ម៉ា បានជំរុញឱ្យវិស័យវាយនភណ្ឌនៅកម្ពុជា នារយៈពេល ២-៣ឆ្នាំចុងក្រោយនេះបោះជំហានទៅមុខយ៉ាងលឿន ទាំងការចូលមកបើករោងចក្រនៅកម្ពុជា ក៏ដូចជាការបញ្ជាទិញសម្រាប់នាំចេញទៅទីផ្សារអន្តរជាតិ។
លោកបញ្ជាក់ថា “នេះជាមូលហេតុធ្វើឱ្យកំណើន នៃការនាំចេញវិស័យកាត់ដេរនៅកម្ពុជាកើនឡើង ជាពិសេសបណ្តាប្រទេសនៅសហគមន៍អឺរ៉ុប អាមេរិក និងចក្រភពអង់គ្លេស”។លោកបន្ថែមថា “ខ្ញុំជឿថា នាពេលអនាគតវិស័យកាត់ដេរ នឹងបោះជំហានទៅមុខកាន់តែល្អបន្ថែមទៀត”។
យោងតាមទិន្នន័យកត់ត្រាដោយ GDCE បានបង្ហាញថា ក្នុងឆ្នាំ២០២៤ កម្ពុជាបាននាំចេញផលិតផលវាយនភណ្ឌ ដែលមានលេខកូដ៍(HS ២ខ្ទង់) ៦១, ៦២, ៦៣ និង ៦៤ ក្នុងទឹកប្រាក់សរុប ១១,៦៨ពាន់លានដុល្លារ កើនឡើង២៤,៤ភាគរយ បើធៀបនឹងឆ្នាំ ២០២៣៕
។){kind=link}