ដោយៈ ម៉ាណា
ភ្នំពេញៈ ការនាំចេញ-នាំចូលទំនិញរបស់កម្ពុជា ជាមួយប្រទេសដៃគូពាណិជ្ជកម្មទាំងអស់ នៅក្នុងរយៈពេល២ខែដើមឆ្នាំ២០២៥ មានទឹកសរុបប្រាក់ជាង៩,៤ ពាន់លានដុល្លារអាមេរិក កើនជាង១៦ភាគរយបើធៀបនឹងរយៈពេលដូចគ្នាកាលពីឆ្នាំមុន។
ទំហំទឹកប្រាក់នៃពាណិជ្ជកម្មរទ្វេភាគី ជាមួយប្រទេសចិន បានគ្របដណ្តប់ជិត៣០ភាគរយនៃចំនួនទឹកប្រាក់សរុប។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា(GDCE)។
យោងតាមទិន្នន័យកត់ត្រាដោយ GDCE ដែលទើបចេញផ្សាយនៅមុននេះបានឱ្យដឹងថា ក្នុងខែមករា-ខែកុម្ភៈ ឆ្នាំ ២០២៥ ចរាចរណ៍ទំនិញចេញ-ចូលរបស់កម្ពុជាជាមួយប្រទេសដៃគូពាណិជ្ជកម្មទាំងអស់ មានទឹកប្រាក់សរុប៩,៤៤៧,៥៣លានដុល្លារ កើនឡើង១៦,៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានចំនួន៨,១២០,៦១ លានដុល្លារ។
ក្នុងចំនួននេះ គឺទំនិញកម្ពុជានាំចេញមានទឹកប្រាក់ ៤ ៤៦០,២ លានដុល្លារ កើនឡើង១១,៩ភាគរយ និងទំនិញនាំចូលពីក្រៅប្រទេស ៤ ៩៨៧,៣៣លានដុល្លារ កើន២០,៦ភាគរយ។
ទិន្នន័យបានឱ្យដឹងទៀតថា ប្រទេសចិនបានបន្តឈរមុខគេ ក្នុងនាមជាដៃគូពាណិជ្ជកម្មធំជាងគេរបស់កម្ពុជា ដោយមានទឹកប្រាក់សរុប ២ ៦៦២,៧៣លានដុល្លារ កើនឡើង២១,១ ភាគរយ ក្នុងនោះកម្ពុជានាំចេញ២១៧,៩៦លានដុល្លារ ធ្លាក់ចុះ៤,៣ភាគរយ និងទំនិញនាំចូលពីប្រទេសចិន២ ៤៤៤,៧៧ លានដុល្លារ កើនឡើង២៤ភាគរយ។
អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេងបានមានប្រសាសន៍ឲ្យដឹងថា ចំនួនទឹកប្រាក់នាំចេញទំនិញរបស់កម្ពុជាដែលកើនជាង១០ភាគរយ នារយៈពេល២ខែដើមឆ្នាំ ២០២៥ គឺដោយសារសមត្ថភាពផលិតកម្ម កម្ពុជាមានកាន់តែខ្លាំង ហើយគុណភាពរបស់វាក៏មានកម្រិតស្តង់ដារផងដែរ។
លោកបានបញ្ជាក់ថា “ខ្ញុំមានជំនឿថា ទឹកប្រាក់នៃការនាំចេញទំនិញកម្ពុជា នឹងបន្តកើនឡើងទៀតក្នុងឆ្នាំនេះ ព្រោះបច្ចុប្បន្នកម្ពុជាមានផលិតផលជាច្រើនមុខសម្រាប់នាំចេញ ខណៈកេរ្តិ៍ឈ្មោះគុណភាពនិងតម្លៃទំនិញកម្ពុជា ក៏មានលក្ខណៈប្រកួតប្រជែងខ្លាំងផងដែរ”៕
