ដោយៈ គង់ ម៉ាណា
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានជំរុញ និងលើកទឹកចិត្តប្រជាកសិករដាំម្ទេសចូលរួមក្នុងសហគមន៍កសិកម្មទំនើបឱ្យបានកាន់តែច្រើន។
ការចូលរួមក្នុងសហគមន៍នេះ នឹងផ្តល់ផលប្រយោជន៍យ៉ាងច្រើន ជាពិសេសការធានាផ្នែកទីផ្សារ និងតម្លៃ។
នៅក្នុងពេលចូលរួមជាគណៈអធិបតី ក្នុងពិធីចុះកិច្ចសន្យាទិញលក់ “ម្ទេសស្តង់ដាសុវត្ថិភាព” និងជួបសំណេះសំណាលជាមួយសហគមន៍កសិកម្មទំនើបម្ទេសដំណាក់ទ្រយឹង ដែលមានសមាជិកចំនួន ១៨២គ្រួសារ លើផ្ទៃដី៥២ហិកតា ក្នុងភូមិប៊ុនរ៉ានីសែនជ័យដំណាក់ទ្រយឹង ឃុំពង្រិល ស្រុកភ្នំក្រវាញ ខេត្តពោធិ៍សាត់ កាលពីថ្ងៃទី៦ ខែមីនា លោកឌិត ទីណា បានមានប្រសាសន៍ឲ្យដឹងថា ការរៀបចំសហគមន៍កសិកម្មទំនើប គឺដើម្បីជួយឱ្យបងប្អូនប្រជាកសិករទាំងអស់ទទួលបានជីវភាពល្អប្រសើរ។
ទីតាំងសហគមន៍កសិកម្មទំនើបម្ទេស ដំណាក់ទ្រយឹង គឺមានភាពអំណោយផលល្អសម្រាប់ការដាំដុះម្ទេស ហេតុនេះប្រសិនបើប្រជាកសិករអនុវត្តតាមបច្ចេកទេសដាំដុះត្រឹមត្រូវ និងចូលរួមក្នុងសហគមន៍កសិកម្មទំនើបបន្ថែមទៀតនោះ ពួកគេនឹងទទួលបានផលចំណេញកាន់តែច្រើន តាមរយៈការធានាទាំងទីផ្សារ និងតម្លៃ ចំពោះដំណាំម្ទេសដែលសហគមន៍ដាំបាន។
លោកឌិត ទីណាបានបន្តថា “ក្រសួងកសិកម្ម តែងតែជួយជំរុញ និងផ្តល់ការគាំទ្រចំពោះដំណើរការ របស់សហគមន៍កសិកម្មទំនើប”។
លោកបានថ្លែងថា ក្រសួងកសិកម្មបានរៀបចំគិតគូរ ច្បាស់លាស់ និងមានការគាំទ្រផ្នែកទុន តាមរយៈកម្ចីមានការប្រាក់ទាប ផ្នែកបច្ចេកទេស និងមានទីផ្សារពិតប្រាកដ។ ដោយឡែកបងប្អូនក្នុងសហគមន៍ត្រូវកសាងទំនុកចិត្តជាមួយគ្នា មានភាពស្មោះត្រង់រវាងអ្នកផលិត និងអ្នកទិញ និងគិតគូរផលប្រយោជន៍រួមជាធំ។
កាលពីចុងខែមករា អំឡុងពេលចុះជួបប្រជាកសិករនៅខេត្តបាត់ដំបង លោក ឌិត ទីណា បានលើកឡើងថា ការចូលរួមគ្នារបស់ប្រជាកសិករ ដើម្បីចងក្រងបង្កើតជាសហគមន៍កសិកម្មទំនើប នឹងផ្តល់ផលចំណេញច្រើនទៅដល់ពួកគេ។
ផលចំណេញទាំងនោះមានដូចជា ការកាត់បន្ថយថ្លៃដើមផលិតតាមរយៈការភ្ជូរដីស្រែ ការទិញធាតុចូលកសិកម្មជាលក្ខណៈទ្រង់ទ្រាយធំក្នុងតម្លៃទាប មានការរៀបចំផែនការផលិតកម្មច្បាស់លាស់ អាចផ្គត់ផ្គង់តាមតម្រូវការទីផ្សារ មានកិច្ចសន្យាផលិតកម្មត្រឹមត្រូវ អាចទទួលបានកម្ចីការប្រាក់ទាប ព្រមទាំងមានទីផ្សារទទួលទិញពិតប្រាកដ។
លោកបានថ្លែងថា សហគមន៍កសិកម្មទំនើប នឹងទទួលបានការគាំទ្របច្ចេកទេស ពីក្រសួងកសិកម្មដោយផ្ទាល់ តាមរយៈការសហការជាមួយមន្រ្តីកសិកម្មឃុំ និងក្រុមការងារជំនាញ។ ប្រការសំខាន់ប្រជាកសិករត្រូវកសាងទំនុកចិត្តជាមួយគ្នា ចេះសហការគ្នា គោរពតាមច្បាប់លក្ខន្តិកៈរបស់សហគមន៍ដែលបានចែង ដើម្បីទទួលបានផលចំណេញសេដ្ឋកិច្ច និងមាននិរន្តរភាព។
ដើម្បីជំរុញការដាំដុះ និងបង្កើនទិន្នផលក្នុងវិស័យកសិកម្ម ពិសេសផលិតកម្មស្រូវ រាជរដ្ឋាភិបាលកម្ពុជានីតីកាលទី៧ នៃរដ្ឋសភា បានដាក់ចេញនូវវិធានការអាទិភាពជាច្រើន ដើម្បីជួយដល់ប្រជាកសិករ ក្នុងនោះ ក៏មានការដាក់ពង្រាយមន្ត្រីកសិកម្មឃុំ ឱ្យទៅជួយដោយផ្ទាល់នៅតាមឃុំ(កសិកម្ម)នៅស្ទើរទូទាំងប្រទេស។
លោកឧបនាយករដ្ឋមន្រ្តី លោក សុខ ចិន្តាសោភា នៅក្នុងពិធីបិទសន្និបាតបូកសរុបការងារកសិកម្ម រុក្ខាប្រមាញ់ និងនេសាទ ទូទាំងប្រទេសឆ្នាំ ២០២៤ និងទិសដៅអនុវត្តឆ្នាំ ២០២៥ កាលពីចុងខែមករា បានលើកឡើងថា កសិកម្ម គឺជាវិស័យអាទិភាពមួយ ដែលថ្នាក់ដឹកនាំរដ្ឋាភិបាលតែងគិតគូរ និងយកចិត្តទុកដាក់ខ្ពស់ ព្រោះវិស័យនេះមិនត្រឹមតែជួយឱ្យប្រទេសកម្ពុជា អាចធានាបាននូវសន្តិសុខស្បៀងសម្រាប់ប្រជាជនខ្លួនប៉ុណ្ណោះទេ ប៉ុន្តែក៏ជាផ្នែកសំខាន់ក្នុងការជួយជំរុញកំណើនសេដ្ឋកិច្ចជាតិផងដែរ។
លោកបន្តថា ដើម្បីលើកកម្ពស់វិស័យកសិកម្ម រាជរដ្ឋាភិបាលកម្ពុជាបានកំណត់គោលនយោបាយ អាទិភាពសំខាន់ៗជាច្រើន ក្នុងន័យជំរុញការបង្កបង្កើនផល រក្សាលំនឹងថ្លៃកសិផល ការដាក់ពង្រាយមន្រ្តីកសិកម្មឃុំទូទាំងប្រទេស និងការកសាងសហគមន៍កសិកម្មទំនើប។
សេដ្ឋកិច្ចកម្ពុជាក្នុងឆ្នាំ ២០២៥ ត្រូវបានព្យាករណ៍ថានឹងសម្រេចបានកំណើនក្នុងរង្វង់៦,៣ភាគរយ ដែលត្រូវទ្រទ្រង់ចម្បងដោយវិស័យឧស្សាហកម្ម ដែលអាចមានកំណើន៨,៦ភាគរយ វិស័យសេវាកម្ម ៥,៦ភាគរយ និងវិស័យកសិកម្ម ១,១ភាគរយ។ នេះបើយោងតាមឯកសារថវិកាសង្ខេបឆ្នាំ ២០២៥។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា ក្នុងឆ្នាំ២០២៤ កម្ពុជាបាននាំចេញកសិផលចំនួន១១,៧ លានតោន កើនឡើង៣៩ភាគរយ បើធៀបនឹងឆ្នាំ២០២៣ ដែលមានចំនួន ៨,៤លានតោន។
ទំហំទឹកប្រាក់ពីការនាំចេញកសិផលនេះ មានតម្លៃប្រមាណ ៤,៨ ពាន់លានដុល្លារ។ ផលិតផលកសិកម្មនាំចេញសំខាន់ៗ រួមមាន ជ័រកៅស៊ូ ស្រូវ អង្ករ ដំឡូងមី ស្វាយចន្ទី ចេក ផ្លែមៀន ម្រេច និងកសិផលសំខាន់ៗមួយចំនួនទៀត។ វិស័យកសិកម្ម បានចូលរួមចំណែកក្នុងផលិតផលក្នុងស្រុកសរុប(GDP) ប្រមាណ២២ភាគរយ នៅក្នុងឆ្នាំ ២០២៤៕
