ដោយ: គង់ លាងហួរ
អន្តរជាតិ: តម្លៃប្រេងឆៅបានធ្លាក់ចុះតិចតួចក្នុងការជួញដូរនៅព្រឹកថ្ងៃពុធនេះ ខណៈបណ្តាអ្នកវិនិយោគពុំសូវព្រួយបារម្ភខ្លាំងអំពីផលប៉ះពាល់នៃការដំឡើងពន្ធរបស់ទីក្រុងប៉េកាំងលើការនាំចូលថាមពលរបស់សហរដ្ឋអាមេរិកទៅកាន់ទីផ្សាររបស់ប្រទេសចិន។
តួយ៉ាង តម្លៃប្រេងឆៅ Brent futures បានធ្លាក់ចុះ១៨សេន ឬ០,២៤% មកនៅត្រឹម៧៦,០២ដុល្លារក្នុងមួយបារ៉ែលគិតត្រឹមម៉ោងសកល 0210 GMT ខណៈតម្លៃប្រេងឆៅ West Texas Intermediate (WTI) របស់អាមេរិកបានធ្លាក់ចុះ៩សេនមកត្រឹម៧២,៦១ដុល្លារក្នុងមួយបារ៉ែល។
កាលពីថ្ងៃអង្គារម្សិលមិញ ប្រទេសចិនបានប្រកាសដំឡើងពន្ធលើការនាំចូលប្រេង ឧស្ម័នធម្មជាតិរាវ និងធ្យូងថ្មរបស់សហរដ្ឋអាមេរិក ដើម្បីជាការសងសឹកនឹងការយកពន្ធរបស់សហរដ្ឋអាមេរិកលើការនាំចេញរបស់ចិន។
ក្រុមអ្នកវិភាគនៅធនាគារ Goldman Sachs បានអះអាងថា ផលប៉ះពាល់នៃពន្ធសងសឹករបស់ប្រទេសចិនលើតម្លៃថាមពលនឹងនៅមានកម្រិត ព្រោះការផ្គត់ផ្គង់សកល និងតម្រូវការថាមពលទាំងនេះនឹងមិនប្រែប្រួល ដោយសារពន្ធរបស់ប្រទេសចិននោះទេ៕
