ដោយគង់ ម៉ាលីនណា
ភ្នំពេញៈ ការចាប់ផ្តើមអាជីវកម្មមួយ មិនមែនជារឿងលំបាកខ្លាំងនោះទេ ប៉ុន្តែដើម្បីឲ្យអាជីវកម្មទទួលបានជោគជ័យ និងរីកធំធាត់ ពិតជាមានរឧងជាច្រើនដែលសហគ្រិនត្រូវឆ្លងកាត់ និងប្រឈម។
ហេតុនេះតើសហគ្រិនគួរសិក្សាលើបញ្ហាអ្វីខ្លះ និងបំពេញបន្ថែមអ្វីខ្លះ ដើម្បីទទួលបានជោគជ័យ។
ថ្ងៃនេះគេហទំព័រ Cambodiafinancilatimes.com និង Facebook Page ឈ្មោះ Cambodia Financial Times សូមលើកយកចំណុចមួយចំនួន ដើម្បីពិភាក្សានិងសិក្សាស្វែងយល់ទាំងអស់គ្នា។
គម្រោងអាជីវកម្ម
ដើម្បីឲ្យអាជីវកម្មមួយអាចដើរទៅមុខដោយភាពរឹងមាំ និងរយៈពេលយូរអង្វែង ចាំបាច់ត្រូវតែគម្រោងអាជីវកម្មមួយ ដែលមានភាពច្បាស់លាស់ និងចក្ខុវិស័យត្រឹមត្រូវ ទោះបីជាអាជីវកម្មនោះចាប់ផ្តើមពីតូចឬធំក៏ដោយ។
ប៉ុន្តែសហគ្រិនមួយចំនួនបានចាប់ផ្តើមអាជីវកម្ម ដោយគ្មានគំរោងផែនការនោះទេ ពិសេសពួកគេធ្វើបណ្តើរសិក្សាបណ្តើរ ដោះស្រាយបញ្ហាប្រឈមបណ្តើរ។
សេចក្តីស្រលាញ់និងឆន្ទៈ
សហគ្រិនខ្លះធ្វើអាជីវកម្មមិនមែនព្រោះតែខ្លួនចូលចិត្ត ឬស្រលាញ់នូវមុខរបរនោះទេ ប៉ុន្តែគេគ្រាន់តែសំឡឹងឃើញប្រាក់ចំណេញ រយៈពេលខ្លីតែប៉ុណ្ណោះ។ ការដែលគ្មានឆន្ទៈ និងសេចក្តីពេញចិត្តក្នុងកិច្ចការនោះពិតប្រាកដនេះហើយ ទើបធ្វើឲ្យសហគ្រិនបរាជ័យភាគច្រើន គ្មានកម្លាំងជម្រុញណាមួយ ដែលនាំគេឆ្ពោះទៅរកភាពជោគជ័យ។
យ៉ាងណាការធ្វើការដោយខ្វះសេចក្តីស្រលាញ់ និងគ្មានឆន្ទៈពិតប្រាកដ ពេលជួបឧបសគ្គបន្តិចបន្តួចពួកគេងាយនឹងបោះបង់ខ្លាំងណាស់។
ចក្ខុវិស័យនិងជំនាញ
ការចាប់ផ្តើមអាជីវកម្ម ដោយមិនមានជំនាញច្បាស់លាស់ ទៅលើប្រភេទអាជីវកម្មដែលខ្លួនធ្វើនោះទេ ដូចជាយល់ដឹងជាលក្ខណៈបច្ចេកទេស ការគ្រប់គ្រង ឬភាពជាអ្នកដឹកនាំជាដើម ជាបញ្ហាដ៏ចម្បងធ្វើឲ្យសហគ្រិនថ្មីថ្មោង មិនអាចគិតបានស៊ីជម្រៅទៅលើដំណើរការអាជីវកម្មដែលគេកំពុងតែធ្វើ ហើយក៏ដូចជាបញ្ហាប្រឈម និងដំណោះស្រាយអាជីវកម្ម ដែលគេកំពុងនឹងជួបប្រទះនាពេលបច្ចុប្បន្ននិងពេលអនាគត។
ជំនាញទន់និងជំនាញលក់
ម្ចាស់អាជីវកម្មដែលអាចជោគជ័យទៅបាន ពិតជាត្រូវការជំនាញទន់ឬជំនាញទំនាក់ទំនងជាមួយសង្គមអ្នកជំនួញ និងត្រូវយល់ដឹងឲ្យបានត្រឹមត្រូវពីអ្វីទៅជាអតិថិជនគោលដៅ និងមិនគោលដៅនៃផលិតផល ឬសេវាកម្មរបស់ខ្លួន។ ដោយសារតែការមិនអាចកំណត់បានច្បាស់លាស់នេះហើយ ដែលជាហេតុផលនៃការបរាជ័យមួយ ព្រោះមិនមានជំនាញទំនាក់ទំនង ដែលមានប្រសិទ្ធភាពក្នុងការរក្សាអតិថិជនរបស់ខ្លួន មិនដឹងពីចំណុចខ្លាំងខ្សោយរបស់ខ្លួនឯង និងគូប្រជែង។
ភាពតស៊ូនិងការអត់ធ្មត់
សហគ្រិនមួយចំនួនឆាប់រាថយ ខ្វះការតស៊ូណាស់ គ្រាន់តែពួកគេជួបការលំបាកនិងបញ្ហាបន្តិចបន្តួច ក៏បោះបង់ពាក់កណ្តាលផ្លូវបាត់ទៅហើយ ដែលតាមពិតការធ្វើសហគ្រិនមិនមែនជារឿងងាយស្រួល ដេកចាំយកលុយនោះឡើយ។
នៅពេលពួកគេគ្មានភាពអត់ធ្មត់គ្រប់គ្រាន់ ក្នុងការអនុវត្តន៍៍ឲ្យបាននូវសកម្មភាពគោលដៅ ពួកគេមិនអាចទទួលបានជោគជ័យ។
ភាពជាអ្នកដឹកនាំ
ជាអ្នកដឹកនាំអ្នកត្រូវតែពូកែបត់បែន អត់ធ្មត់ និងចេះប្រើប្រាស់មនុស្សឲ្យចំគោលដៅ។ ពិសេសអ្នកត្រូវដឹងថា តើមនុស្សណាពូកែប្រើប្រាស់ខួរក្បាល ឬប្រើកម្លាំង។ ប្រភេទមនុស្សដែលឈ្លាសវៃក្នុងការគិត ជាប្រភេទមនុស្សដែលមានការគិតបែបស៊ីជម្រៅ គឺពួកគេនេះហើយ ដែលអាចជួយក្នុងការបង្កើតយុទ្ធសាស្ត្រ ការផ្លាស់ប្តូរ ឬការបង្កើតថ្មីនៅលើផលិតផលមួយ ។
គ្រប់គ្រងហិរញ្ញវត្ថុនិងលំហូរសាច់ប្រាក់
ម្ចាស់ ឬអាជីវកម្មដែលដួលរលំភាគច្រើន ដោយសារតែការខ្វះចំណេះដឹងចាត់ចែង និងប្រើប្រាស់ហិរញ្ញវត្ថុនេះឯង។
ឧទាហរណ៍ ពួកគេមិនអាចគ្រប់គ្រងហ្មត់ចត់រវាងលុយ ដែលដាក់ដើមទុនផ្ទាល់ក្នុងការរកស៊ី និងលុយដែលខ្ចីគេមករកស៊ីជាដើម។ មួយវិញទៀត ទុនបម្រុងដែលត្រូវប្រើឲ្យបានរយៈពេល៦ខែ គេបែរជាចាយពេលតែ២ ទៅ៣ខែក៏អស់ទុនបម្រុងបាត់ទៅហើយ។
ជាងនេះទៅទៀត អ្នកធ្វើអាជីវកម្មជំពូកនេះ មិនមានផែនការហិរញ្ញវត្ថុច្បាស់លាស់ ហើយក៏មិនមានទំនួលខុសត្រូវ ទៅលើលុយដែលខ្ចីគេយកមករកស៊ីនោះដែរ៕
