ដោយៈ ម៉ាណេត
ភ្នំពេញៈ សហគ្រិនខ្មែរ ដែលជាស្ថាប័នក្រោមចំណុះ ក្រសួងសេដ្ឋកិច្ច និងហរិញ្ញវត្ថុ នឹងនៅតែបន្តដើរតួនាទីជាផ្នែកមួយ ក្នុងការចូលរួមផ្ដល់ជាយន្តការដោះស្រាយ និងគាំទ្រដល់ធុរកិច្ចបង្កើតថ្មី និងសហគ្រាសធុនតូច និងមធ្យម (SME) ដើម្បីឆ្លងកាត់វិបត្ដិសកលនេះ ខណៈស្ថាប័ននេះនឹងបន្ដដាក់ចេញកម្មវិធី កញ្ចប់ជំនួយសហគ្រិនខ្មែរជុំទី៣ នៅឆ្នាំខាងមុខបន្តទៀត។
លោកបណ្ឌិតឈៀង វណ្ណមុនិណ្ឌនាយកប្រតិបត្តិនៃសហគ្រិនខ្មែរបានលើកឡើងកាលពីថ្ងៃទី២៤ ខែវិច្ឆិកា ឆ្នាំ២០២០កន្លងមកថា សហគ្រិនខ្មែរជឿជាក់ថា ជំនួយហិរញ្ញ ប្បទានកម្មវិធីកញ្ចប់ជំនួយសហគ្រិនខ្មែរនេះ ជាដំណោះស្រាយយុទ្ធសាស្ត្រដ៏មានប្រសិទ្ធភាពមួយ សម្រាប់គាំទ្រធុរកិច្ចបង្កើតថ្មី និងសហគ្រាសធុនតូច និងមធ្យម ដែលមានសក្តានុពលក្នុងការចាប់ផ្ដើម ប្រតិបត្តិការអាជីវកម្មឡើងវិញអំឡុងពេល និងក្រោយបរិបទវិបត្តិកូវីដ-១៩ ។
លោកបណ្ឌិតបន្ថែមថា “សហគ្រិនខ្មែរ នឹងបន្តរៀបចំ ក៏ដូចជាធ្វើការជាមួយដៃគូពាក់ព័ន្ធដើម្បីកសាង និងជំរុញប្រព័ន្ធអេកូឡូស៊ីសហគ្រិនភាពនៅប្រទេសកម្ពុជា។ ក្នុងខណៈដែលវិបត្តិជំងឺកូវីដ១៩ បានផ្ដល់ផលប៉ះពាល់ពុំធ្លាប់មានពីមុនជាច្រើន ដល់វិស័យសហគ្រិនភាពនៅកម្ពុជា” ។ លោកបន្តថា “ការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ គឺជាគន្លឹះដ៏សំខាន់មួយក្នុងការស្តារសេដ្ឋកិច្ចជាតិឡើងវិញ” ។
លោកបានលើកឡើងទៀតថា សហគ្រិនខ្មែរ នឹងនៅតែបន្តដើរតួនាទីជាផ្នែកមួយ ក្នុងការចូលរួមផ្ដល់ជាយន្តការដោះស្រាយ និងគាំទ្រដល់ ធុរកិច្ចបង្កើតថ្មី និងសហគ្រាសធុនតូច និងមធ្យមដើម្បីឆ្លងកាត់វិបត្ដិសកលនេះ។ សហគ្រិនខ្មែរ នឹងបន្ដដាក់ចេញកម្មវិធីកញ្ចប់ជំនួយសហគ្រិនខ្មែរជុំទី៣ នៅឆ្នាំខាងមុខបន្តទៀត។
ជាមួយគ្នានោះដែរ លោកបណ្ឌិត បានឱ្យដឹងថា តាមរយៈកម្មវិធីកញ្ចប់ជំនួយទាំងពីរជុំ សហគ្រិនខ្មែរ ទទួលបានពាក្យស្នើសុំសរុបពីធុរកិច្ចបង្កើតថ្មី ក៏ដូចជាសហគ្រាសធុនតូច និងមធ្យមចំនួន២៧៨ ដែលមកពីវិស័យផ្សេងៗគ្នាទូទាំង១៩រាជធានី ខេត្ត។ បន្ទាប់ពីឆ្លងកាត់ការវាយតម្លៃ ដោយសហគ្រិនខ្មែរ និងគណៈកម្មាធិការដែលមកពីវិស័យឯកជនចំនួន១៩រូប សហគ្រិនខ្មែរបានរកឃើញធុរកិច្ចបង្កើតថ្មី និងសហគ្រាសធុនតូច និងមធ្យម ចំនួន១២ ក្នុងជុំទី១ និងចំនួន១៥ បន្ថែមទៀតក្នុងជុំទី២ ដែលមកពីវិស័យផ្សេងៗដូចជា កសិកម្ម/កសិកម្មកែច្នៃ សិប្បកម្មកែច្នៃ សេវាកម្ម និងបច្ចេកវិទ្យាព័ត៌មានវិទ្យា ដែលទទួលបានកញ្ចប់ជំនួយជា ហិរញ្ញប្បទាន ដើម្បីចាប់ផ្ដើមអាជីវកម្មឡើងវិញ។
បន្ថែមពីនេះ សហគ្រិនខ្មែរ ក៏បានផ្ដល់ជាប្រាក់រង្វាន់ជូន ទៅដល់ធុរកិច្ចបង្កើតថ្មី និងសហគ្រាសធុនតូច និងមធ្យមចំនួន១៥ផ្សេងទៀត ដែលបានចូលរួមធ្វើបទបង្ហាញក្នុងកម្មវិធីនៃជុំទាំងពីរ ដើម្បីជាការលើកទឹកចិត្ត។
លោកបណ្ឌិតឈៀង វណ្ណមុនិណ្ឌ បានគូសបញ្ជាក់ថា សម្រាប់កម្មវិធីកញ្ចប់ជំនួយទាំងពីរជុំនេះ សហគ្រិនខ្មែរ បានប្រើប្រាស់ថវិកាសរុបប្រមាណ ៤០០,០០០ដុល្លារអាមេរិក ជូនទៅដល់ធុរកិច្ចបង្កើតថ្មី និងសហគ្រាសធុនតូច និងមធ្យមចាប់ពីចន្លោះ៥,០០០ ដុល្លារទៅ២០,០០០ដុល្លារ ជាមួយនឹងលក្ខខណ្ឌប្រើប្រាស់ កញ្ចប់ថវិការរយៈពេល១ឆ្នាំ ក្នុងការប្រតិបត្តិការអាជីវកម្ម។
សហគ្រិនខ្មែរ បានចុះហត្ថលេខាលើកិច្ចព្រមព្រៀង ផ្តល់ហិរញ្ញប្បទានជាមួយធុរកិច្ចបង្កើតថ្មី និងសហគ្រាសធុនតូចនិងមធ្យមចំនួន២៧ ដែលបានទទួលកញ្ចប់ជំនួយសហគ្រិនខ្មែរជុំទី១ និងជុំទី២ ។
សហគ្រិនខ្មែរត្រូវបានបង្កើតឡើង ដោយមានចក្ខុវិស័យក្លាយជាថ្នាលជាតិ សម្រាប់ការលើកកម្ពស់ គ្រប់សកម្មភាពរបស់វិស័យសហគ្រិនភាព តាមរយៈការអនុវត្តកម្មវិធីគាំទ្រ និងធ្វើការដោយផ្ទាល់ ជាមួយស្ថាប័នដៃគូរដ្ឋ និងឯកជន។
ជាងនេះ សហគ្រិនខ្មែរ ធ្វើការគាំទ្រទៅលើវិស័យអាទិភាព រួមមានធុរកិច្ចបង្កើតថ្មីបែបបច្ចេកវិទ្យា សេវាកម្ម ការកែច្នៃកសិ-ចំនីអាហារ កសិកម្មសម្រាប់ការ នាំចេញ និងផលិតកម្មសម្រាប់ ជំនួសការនាំចូល ដើម្បីគាំទ្រដល់ការធ្វើពិពិធកម្មសេដ្ឋកិច្ច នវានុវត្តន៍ ការបង្កើនផលិតភាព និងការបង្កើតការងារ។
សហគ្រិនខ្មែរ បានបង្កើតកម្មវិធីកញ្ចប់ជំនួយនេះឡើង ដើម្បីឆ្លើយតបទៅនឹងផលលំបាកបង្កឡើងដោយ វិបត្ដិជំងឺកូវីដ-១៩ ដែលសហគ្រិនកម្ពុជាកំពុងតែប្រឈម។ កញ្ចប់ជំនួយនេះ ត្រូវបានអនុវត្តជោគជ័យចំនួនពីរដងរួចមកហើយ ដែលជុំទី១បានធ្វើឡើងនៅខែមីនា ខណៈជុំទី២ទើបតែបញ្ចប់កាលពីខែកញ្ញា។
កម្មវិធីកញ្ចប់ ជំនួយសហគ្រិនខ្មែរនេះ គឺជាដំណោះស្រាយយុទ្ធសាស្ត្រដ៏មុតស្រួចមួយ ដើម្បីបន្តឆ្លើយតបទៅនឹងបញ្ហាប្រឈមបង្កឡើង ដោយវិបតិ្ដជំងឺកូវីដ-១៩ ដែលធុរកិច្ចបង្កើតថ្មី និងសហគ្រាសធុនតូច និងមធ្យមនៅកម្ពុជាកំពុងជួបប្រទះទាំងផ្នែកប្រតិបត្តិការ និងហិរញ្ញវត្ថុ៕
