ដោយ: គង់ លាងហួរ
ស៊ីដនីៈ សហរដ្ឋអាមេរិកបានដំឡើងពន្ធ លើរថយន្តអគ្គិសនីរបស់ចិន (EVs) ដល់អត្រា១០០ភាគរយ ព្រមទាំងអត្រាពន្ធពី២៥ទៅ៥០ភាគរយ លើផលិតផលចិនផ្សេងទៀត រួមទាំងអាគុយលីចូមអុីយ៉ុង បន្ទះសូឡា និងសារធាតុរ៉ែសំខាន់ៗ។
ជុំវិញចំណាត់ការនេះ លោក Roland Rajah នាយកមជ្ឈមណ្ឌលអភិវឌ្ឍន៍ឥណ្ឌូ-ប៉ាស៊ីហ្វិកនៅវិទ្យាស្ថាន Lowy លើកឡើងថា សហរដ្ឋអាមេរិក កំពុងធ្វើឱ្យខូចការបើកចំហ ប្រព័ន្ធពាណិជ្ជកម្មសកល ដែលបណ្តាប្រទេស កំពុងអភិវឌ្ឍន៍ពឹងផ្អែកយ៉ាងខ្លាំង។ លោកបន្តថា ចំណាត់ការនេះ ក៏អាចប៉ះពាល់ដល់វឌ្ឍនភាព នៃការដោះស្រាយបញ្ហាប្រែប្រួលអាកាសធាតុ ហើយប្រទេសដែលមានប្រាក់ចំណូលទាបគឺជាអ្នករងគ្រោះខ្លាំងបំផុត។
យ៉ាងណាមិញ ទោះបីមានផលអវិជ្ជមានជាច្រើន ពីការដំឡើងពន្ធរបស់សហរដ្ឋអាមេរិក លើយានយន្តអគ្គិសនីរបស់ចិនយ៉ាងណាក្តី ប៉ុន្តែក៏មានផ្លូវមួយ ដែលបណ្តាប្រទេសកំពុងអភិវឌ្ឍន៍ទទួលបានផលប្រយោជន៍ផងដែរ។ នេះបើយោងទៅតាមការលើកឡើងរបស់វិទ្យាស្ថាន Lowy។
លោក Roland Rajah បានគូសបញ្ជាក់ថា “លទ្ធិគាំពារនិយមរបស់អាមេរិក កំពុងត្រូវបានតម្រង់ទិសភាគច្រើន និងជាពិសេសទៅកាន់ប្រទេសចិន ដែលការណ៍នោះបង្កើតឱកាស សម្រាប់ប្រទេសដទៃ”។នេះបើយោងតាមការចុះផ្សាយដោយសារពត៌មាន CNA។
លោកបន្តថា ការដំឡើងពន្ធពីមុនរបស់សហរដ្ឋអាមេរិក មកលើប្រទេសចិន បានជំរុញឱ្យក្រុមហ៊ុនខ្សែសង្វាក់ ផ្គត់ផ្គង់ថាមពលស្អាតផ្លាស់ប្តូរមូលដ្ឋាន ផលិតកម្មរបស់ពួកគេចេញពីចិន ទៅកាន់បណ្តាប្រទេសកំពុងអភិវឌ្ឍន៍ផ្សេងទៀត ដូចជា ប្រទេសវៀតណាម កម្ពុជា និងម៉ិកស៊ិក ហើយការប្រកាសដំឡើងពន្ធចុងក្រោយបំផុត នឹងពង្រឹងនិន្នាការនេះ។
អ្នកជំនាញរូបនេះបញ្ជាក់ទៀតថា ប្រសិនបើសហរដ្ឋអាមេរិកពង្រឹងកិច្ចគាំពារនិយម លើឧស្សាហកម្មថាមពលស្អាតរបស់ខ្លួន នោះ បណ្តាប្រទេសកំពុងអភិវឌ្ឍន៍ នៅតែមានមធ្យោបាយសំខាន់ៗ ដើម្បីអាចទទួលបានអត្ថប្រយោជន៍។
លោកបញ្ជាក់ថា “ការដាក់ចេញគោលនយោបាយ ដើម្បីលើកទឹកចិត្តឱ្យក្រុមហ៊ុនចិនបោះទុនវិនិយោគ និងផលិតក្នុងស្រុក ដូចជាការផ្ទេរបច្ចេកវិទ្យា និងចំណេះធ្វើ អាចសមហេតុផល ព្រោះថាដើម្បីចៀសវាងការបង់ពន្ធខ្ពស់ពេកទៅឱ្យអាមេរិក ក្រុមហ៊ុនចិនមួយចំនួនបានងាកទៅផលិតទំនិញមួយចំនួននៅក្រៅប្រទេស”។
ទោះបីជាយ៉ាងណាក្តី តាមរយៈយុទ្ធសាស្ត្រនេះ បណ្តាប្រទេសកំពុងអភិវឌ្ឍន៍ អាចបង្កើតប្រព័ន្ធថាមពលស្អាតផ្ទាល់ខ្លួន របស់ពួកគេ និងដើម្បីទាញយកអត្ថប្រយោជន៍ ពីការនាំចូលទំនិញរបស់ចិនដែលមានតម្លៃថោក៕ប្រភព: CNA៕
