ដោយៈ គង់ ម៉ាលីនណា
ភ្នំពេញៈ អគ្គនាយកដ្ឋានពន្ធដារ (GDT) បានប្រមូលពន្ធសរុបចំនួន ១,១៨ ពាន់លានដុល្លារ ក្នុងអំឡុងខែមករា ដល់ខែមីនាឆ្នាំនេះ ធ្លាក់ចុះ ១១,៩ ភាគរយធៀបរយៈពេលដូចគ្នាកាលពីឆ្នាំមុន។
កម្ពុជាមានស្ថាប័នចំនួនពីរ ដែលទទួលបន្ទុកប្រមូលពន្ធ។ មួយគឺអគ្គនាយកដ្ឋានពន្ធដារ (GDT) ដែលផ្តោតលើពន្ធផ្ទៃក្នុងដូចជា ពន្ធលើប្រាក់ចំណូល ពន្ធលើប្រាក់ខែ ពន្ធលើតម្លៃបន្ថែម និងពន្ធអចលនទ្រព្យ និងមួយទៀតគឺអគ្គនាយកដ្ឋានគយ និងរដ្ឋាករ (GDCE) ដែលប្រមូលពន្ធលើទំនិញចូល និងចេញពីប្រទេស។
របាយការណ៍បានអោយដឹងទៀតថា “ការប្រមូលចំណូលពន្ធពីខែមករា ដល់ខែមីនា ស្មើនឹង២៨,៥ភាគរយ នៃផែនការគោលដៅថវិកាដែលបានកំណត់ក្នុងឆ្នាំ២០២៤” ។
ប្រាក់ចំណូលពន្ធបានមកពីសកម្មភាពហិរញ្ញវត្ថុ និងធានារ៉ាប់រង សកម្មភាពនាំចូល-នាំចេញ និងសកម្មភាពផលិតកម្ម គឺជាចំណូលពន្ធចម្បង។អគ្គនាយកដ្ឋានពន្ធដារ កំពុងចាត់វិធានការសក្តានុពល ដើម្បីកាត់បន្ថយផលប៉ះពាល់។
លោក គង់ វិបុល រដ្ឋមន្ត្រីប្រតិភូមអមនាយករដ្ឋមន្ត្រី និងជាអគ្គនាយកពន្ធដារ បានស្នើឲ្យមន្ត្រីពន្ធដារបង្កើនប្រសិទ្ធភាពការងារ ដើម្បីសម្រេចគោលដៅ។
លោកបានមានប្រសាសន៍ថា “អគ្គនាយកដ្ឋានពន្ធដារ បានកែទម្រង់ប្រព័ន្ធពន្ធដារ រួមទាំងសេវាកម្មដល់អ្នកជាប់ពន្ធ និងការចុះឈ្មោះ សវនកម្ម ការគ្រប់គ្រងបំណុល និងការដោះស្រាយបញ្ហាដែលប្រឈមដោយអ្នកជាប់ពន្ធ”។
ការធ្លាក់ចុះនៃប្រាក់ចំណូលពន្ធនេះ បានបង្ហាញពីបញ្ហាប្រឈមសម្រាប់រដ្ឋាភិបាល ដែលពឹងផ្អែកខ្លាំងលើប្រាក់ចំណូលពន្ធ ដើម្បីទ្រទ្រង់សេវាសាធារណៈ និងការអភិវឌ្ឍន៍ហេដ្ឋារចនាសម្ព័ន្ធ។
សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានបញ្ជាក់ថា រដ្ឋាភិបាលកម្ពុជានឹងមិនបង្កើតពន្ធថ្មី ឬដំឡើងអត្រាពន្ធដែលមានស្រាប់នោះទេ ប៉ុន្តែរក្សាការលើកលែងពន្ធ នាពេលបច្ចុប្បន្នសម្រាប់សកម្មភាពសេដ្ឋកិច្ចមួយចំនួន។
សម្តេចបានរៀបចំវិធានការលើកទឹកចិត្ត ផ្នែកពន្ធដល់វិស័យទេសចរណ៍ វិស័យសំណង់ និងវិស័យដីធ្លី និងវិស័យកសិកម្ម ដើម្បីជំរុញសកម្មភាពសេដ្ឋកិច្ច។
អគ្គនាយកដ្ឋានពន្ធដារ ប្រមួលពន្ធបាន៣,៦១ ពាន់លានដុល្លារនៅឆ្នាំ២០២៣ កើនឡើង៤,៥ ភាគរយ ពីទំហំទឹកប្រាក់៣,៤៥ ពាន់លានដុល្លារក្នុងឆ្នាំ២០២២៕