ដោយ: គង់ លាងហួរ
ហាណូយ: ធនាគាររដ្ឋនៃប្រទេសវៀតណាម (SBV) បានត្រៀមខ្លួនរួចជាស្រេច ដើម្បីធ្វើអន្តរាគមន៍ ប្រសិនបើចាំបាច់ ដើម្បីរក្សាអត្រាប្តូរប្រាក់ឱ្យមានស្ថិរភាព។ នេះបើយោងតាមការលើកឡើងរបស់លោក Dao Minh Tu ទេសាភិបាលរងនៃធនាគារSBV។
ទេសាភិបាលរង នៃធនាគាររដ្ឋវៀតណាមរូបនេះ បានថ្លែង នៅក្នុងកិច្ចប្រជុំរដ្ឋាភិបាល កាលពីពេលថ្មីៗនេះថា ធនាគារក៏អាចប្រើប្រាស់គោលនយោបាយរូបិយវត្ថុ ដើម្បីគ្រប់គ្រង និងស្តារស្ថិរភាពទីផ្សារប្តូរប្រាក់បរទេសផងដែរ ខណៈធនាគារមានទុនបម្រុងជារូបិយប័ណ្ណបរទេសជាង១០០ពាន់លានដុល្លារអាមេរិក។
លោកបន្តថា “អត្រាប្តូរប្រាក់គឺជាសូចនាករ ម៉ាក្រូសេដ្ឋកិច្ចដ៏សំខាន់ ដែលអាចជះផលប៉ះពាល់ដល់អំណាច នៃការទិញរបស់រូបិយប័ណ្ណវៀតណាម និងគោលនយោបាយសេដ្ឋកិច្ចផ្សេងទៀត”។
លោកបានបន្តថា ដូច្នេះហើយ ធនាគាររដ្ឋវៀតណាមប្តេជ្ញាចិត្ត ក្នុងការគ្រប់គ្រង គោលនយោបាយប្រកបដោយភាពបត់បែន ដើម្បីធានាឱ្យបានថា អត្រាប្តូរប្រាក់របស់យើងមានភាពសមស្រប។
កាលពីខែមីនាកន្លងទៅ ធនាគារ SBV បានប្រមូលកៀរគរថវិកាចំនួន១៦៤,៣ទ្រីលានដុង (ប្រមាណ៦,៦ពាន់លានដុល្លារ) តាមរយៈការបោះផ្សាយលក់ប័ណ្ណរតនាគារ ដល់បណ្តាធនាគារនានា ដើម្បីពង្រឹងតម្លៃប្រាក់ដុង។
ទោះបីជាយ៉ាងណាក្តី បន្ទាប់ពីធនាគារខាងលើ បានបញ្ឈប់ការបោះផ្សាយលក់មូលបត្របំណុល នៅដើមខែមេសា ប្រាក់ដុល្លារអាមេរិកបានហក់ឡើងថ្លៃយ៉ាងគំហុក បើធៀបនឹងប្រាក់ដុង ក្នុងរយៈពេលប៉ុន្មានថ្ងៃកន្លងមកនេះ។
លោក Tu បានពន្យល់ថា “ការហក់ឡើងនៃតម្លៃប្រាក់ដុល្លារអាមេរិក នាពេលថ្មីៗនេះ គឺដោយសារតែធនាគារកណ្តាលអាមេរិក ពុំទាន់បានកំណត់ពេលវេលាជាក់លាក់ សម្រាប់ការកាត់បន្ថយអត្រាការប្រាក់នៅឡើយ ដែលកត្តានេះបានធ្វើឲ្យរូបិយប័ណ្ណ ជាច្រើនធ្លាក់ថ្លៃចុះបើធៀបនឹងប្រាក់ដុល្លារ”។
លោកបានគូសបញ្ជាក់បន្ថែមថា “អត្រាការប្រាក់របស់វៀតណាមមានកម្រិតទាប ជាងអត្រាការប្រាក់របស់សហរដ្ឋអាមេរិក។ ដូច្នេះ ការណ៍នេះ ក៏បានដាក់សម្ពាធទៅលើអត្រាប្តូរប្រាក់ របស់យើងផងដែរ”៕ប្រភព:VNexpress៕