ដោយៈម៉ាណេត
ភ្នំពេញៈ សមិទ្ធផលឥណទានលក្ខណៈបុគ្គល បានបង្ហាញពីកំណើនទាំងព្រម រួមមានសមតុល្យឥណទាន និងចំនួនគណនីឥណទាន ដែលមានភាពវិជ្ជមានគួរឱ្យកត់សម្គាល់នៅក្នុងត្រីមាសទី៣ ឆ្នាំ២០២០ ។
ចំនួននៃពាក្យស្នើសុំឥណទានបុគ្គល បានកើនឡើងទៅគ្រប់ផលិតផលទាំងអស់ និងគ្រប់តំបន់នៅក្នុងត្រីមាសនេះ។ ចំនួនគណនីឥណទានបានកើនឡើង ស្ទើរតែគ្រប់តំបន់ទាំងអស់ លើកលែងតែតំបន់ឆ្នេរ ដែលជាកន្លែងមានការធ្លាក់ចុះ។
ទំហំទឹកប្រាក់នៃឥណទាន មិនដំណើរការលើសពី៣០ថ្ងៃ (30+DPD) បានធ្លាក់ចុះនៅគ្រប់តំបន់ទាំងអស់ ជាមួយនឹងការធ្លាក់ចុះខ្លាំងនៅតំបន់ទន្លេសាប និងតំបន់ខ្ពង់រាប។
ចំណែកឯសមតុល្យឥណទានលក្ខណៈបុគ្គល ក៏បានបន្តកើនឡើងជាលំដាប់ក្នុងកម្រិត+៤,៣៥% គិតត្រឹមពីខែ កញ្ញាឆ្នាំ ២០២។ នៅចុងត្រីមាសនេះសមតុល្យឥណទានលក្ខណៈបុគ្គលចំនួន ៩,១១ ពាន់លានដុល្លារ។
កម្ចីអចលនទ្រព្យមានលើសពីពាក់កណ្តាល នៃសមតុល្យឥណទានលក្ខណៈបុគ្គលសរុប៥១,៥១%។ ចំណែកឯសមតុល្យឥណទានហិរញ្ញវត្ថុផ្ទាល់ខ្លួន មានចំណែក ៤៧,៩០% ។
លោកអឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី មានប្រសាសន៍ថា “នៅក្នុងត្រីមាសនេះ ទីផ្សារឥណទានមានភាពវិជ្ជមាន បន្ទាប់ពីមានការថយចុះការពីត្រីមាសមុន” ។
លោកបានបន្ថែមថា “ការកើនឡើងបណ្តាលមកពីកំណើន នៃពាក្យស្នើសុំឥណទាន និងដំណើរការឥណទាន នៅក្នុងទីផ្សារជាលក្ខណៈបុគ្គល ទោះបីជាមានការកើនឡើងនៃអនុបាទ នៃគណនីប្រាក់កម្ចីជាមួយនឹងការសងយឺត៣០ថ្ងៃ ហួសកាលបរិច្ឆេទកំណត់ ប៉ុន្តែវានៅតែទាបត្រឹម២,៤២% នៃគ្រប់តំបន់ទាំងអស់នៃកម្ពុជា” ៕