ដោយ: គង់ លាងហួរ
អន្តរជាតិ: ធនាគារកណ្តាលអាមេរិក(Fed) ត្រូវបានគេរំពឹងថា នឹងបញ្ចុះអត្រាការប្រាក់ នៅក្នុងឆ្នាំ២០២៤នេះ ដែលនេះអាចជាដំណឹងល្អ សម្រាប់រូបិយប័ណ្ណមួយចំនួននៅតំបន់អាស៊ី។
យោងតាមឧបករណ៍ CME FedWatch បានបង្ហាញឱ្យដឹងថា ធនាគារកណ្តាលរបស់សហរដ្ឋអាមេរិក អាចនឹងចាប់ផ្តើមបញ្ចុះអត្រាការប្រាក់ជាលើកដំបូង ចំនួន២៥ពិន្ទុមូលដ្ឋាន នៅក្នុងខែមិថុនាខាងមុខ។
ជាមួយគ្នានេះ អ្នកវិភាគលើកឡើថា រូបិយប័ណ្ណមួយចំនួន ដូចជាប្រាក់យ័នរបស់ចិន ប្រាក់វ៉ុនរបស់កូរ៉េខាងត្បូង និងប្រាក់រូពីរបស់ឥណ្ឌា នឹងទទួលបានអត្ថប្រយោជន៍ ពីការបន្ធូរបន្ថយគោលនយោបាយរូបិយវត្ថុរបស់ធនាគារ Fed ។
ទី១: ប្រាក់យ័នរបស់ប្រទេសចិន
លោក Arun Bharath ប្រធានផ្នែកវិនិយោគប្រចាំ នៅក្រុមហ៊ុន Bel Air Investment Advisors បានលើកឡើងថា ប្រទេសចិនបានព្យាយាមរក្សាស្ថិរភាពប្រាក់យ័ន ធៀបនឹងប្រាក់ដុល្លារអាមេរិក នាពេលកន្លងមក ហើយប្រទេសចិននឹងធ្វើដូច្នេះបន្តទៀត។
លោកអះអាងថា “ស្របពេលដែលអត្រាប្តូរប្រាក់ បានធ្លាក់ថ្លៃចុះដល់កម្រិត៧យ័នក្នុងមួយដុល្លារ។ ដូច្នេះវានឹងមិនអាចធ្លាក់ចុះបន្ថែមទៀតនោះទេ ដោយសារតែអ្នកបង្កើត គោលនយោបាយចាប់ផ្តើមមានសកម្មភាពខ្លាំង ក្នុងការជំរុញសារពើពន្ធ កំណើនឥណទាន និងការជំរុញតម្លៃអចលនទ្រព្យ”។
កាលពីឆ្នាំមុន តម្លៃប្រាក់យ័នបានដាំក្បាលចុះ ដល់កម្រិតទាបបំផុតក្នុងរយៈពេល១៦ឆ្នាំ ធៀបនឹងប្រាក់ដុល្លារអាមេរិក ដោយជួញដូរក្នុងតម្លៃ៧,២៩៨ក្នុងមួយដុល្លារ។
ដូច្នេះ ប្រសិនបើធនាគារFed ចាប់ផ្តើមកាត់បន្ថយអត្រាការប្រាក់ នោះវានឹងបង្រួមគម្លាត ឬភាពខុសគ្នានៃអត្រាការប្រាក់រវាងប្រទេសមហាអំណាចសេដ្ឋកិច្ច ធំជាងគេទាំង២របស់ពិភពលោក និងកាត់បន្ថយសម្ពាធមួយចំនួនលើតម្លៃប្រាក់យ័ន។
ទី២: ប្រាក់រូពីរបស់ប្រទេសឥណ្ឌា
ប្រាក់រូពីអាចនឹងហក់ឡើងថ្លៃកាន់តែខ្ពស់ ស្របពេលដែលមានក្តីសង្ឃឹមថា ធនាគារកណ្តាលនៃប្រទេសឥណ្ឌា អាចនឹងបន្ធូរបន្ថយគោលនយោបាយរូបិយវត្ថុ យឺតជាងធនាគារកណ្តាលដទៃទៀត។
លោក Anindya Banerjee អនុប្រធានផ្នែកស្រាវជ្រាវរូបិយប័ណ្ណ និងនិស្សន្ទវត្ថុនៅក្រុមហ៊ុន Kotak Securities បានកត់សម្គាល់ថា ការកាត់បន្ថយអត្រាការប្រាក់របស់ធនាគារRBI នឹងមានល្បឿនយឺតជាងធនាគារFed ដោយសារតែប្រទេសឥណ្ឌា មិនមានបញ្ហាអតិផរណាដូចអ្វី ដែលតំបន់អឺរ៉ុប ឬសហរដ្ឋអាមេរិកជួបប្រទះនោះទេ។
ទី៣: ប្រាក់វ៉ុនរបស់ប្រទេសកូរ៉េខាងត្បូង
ប្រាក់វ៉ុនរបស់កូរ៉េខាងត្បូង បានស្ថិតនៅក្រោមសម្ពាធអស់រយៈពេល៣ឆ្នាំមកហើយ ប៉ុន្តែការធ្វើឱ្យប្រសើរឡើង នូវទស្សនវិស័យសេដ្ឋកិច្ច និងការបន្ធូរបន្ថយគោលនយោបាយរបស់ធនាគារ Fed នឹងជួយបន្ធូរបន្ថយសម្ពាធនោះនៅឆ្នាំ២០២៤នេះ។
ដោយសារតែប្រាក់វ៉ុន គឺជារូបិយប័ណ្ណដែលផ្តល់ផលប័ត្រទាប(Low yielding) ដូច្នេ យើងគិតថា ប្រាក់វ៉ុន នឹងទទួលផលវិជ្ជមានពីការបន្ធូរបន្ថយ គោលនយោបាយរបស់ធនាគារ Fed នៅក្នុងឆមាសទីពីរនៃឆ្នាំនេះ ដោយសារការបញ្ចុះអត្រាការប្រាក់ នៅសហរដ្ឋអាមេរិក នឹងមិនត្រឹមតែកាត់បន្ថយសម្ពាធលើប្រាក់វ៉ុន តាមរយៈអត្រាប្តូរប្រាក់ប៉ុណ្ណោះទេ ប៉ុន្តែវាក៏នឹងនាំឱ្យទស្សនវិស័យ កំណើនសេដ្ឋកិច្ចពិភពលោកមានការកើនឡើងផងដែរ៕ប្រភព៖CNBC៕
