ដោយៈ និស្ស័យ
ភ្នំពេញៈ ថ្នាក់ដឹកនាំវិទ្យាស្ថានតេជោសែនសាធារណការ និងដឹកជញ្ជូន និងតំណាងស្ថានទូតជប៉ុនប្រចាំនៅកម្ពុជាបានជួបប្រជុំគ្នា ដើម្បីពិភាក្សាស្តីពី ការលើកកម្ពស់កិច្ចសហប្រតិបត្តការ និងលទ្ធភាពក្នុងការផ្តល់ជំនួយ លើការអប់រំ បណ្តុះបណ្តាល និងបច្ចេកទេសដល់វិទ្យាស្ថាន។
កិច្ចប្រជុំដែលបានធ្វើនាព្រឹកថ្ងៃទី៩ មករាកន្លងមក លោក ប្រាងហង្ស សេរីរិទ្ធ នាយកស្តីទីវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញទទួលជួប ជាមួយលោក Hiroyuki Tokito លេខាទី២ នៃស្ថានទូតជប៉ុនប្រចាំនៅកម្ពុជា ដោយមានការចូលរួមពី ថ្នាក់ដឹកនាំវិទ្យាស្ថាន មន្ត្រីរាជការពាក់ព័ន្ធ និងតំណាង JICA Expert-MPWT ផងដែរ។
ជាលទ្ធផល ភាគីជប៉ុនបានឈ្វេងយល់អំពី ស្ថានភាពទូទៅរបស់វិទ្យាស្ថាន ព្រមទាំងទទួលយកសំណើរបស់វិទ្យាស្ថាន ដើម្បីសិក្សាលទ្ធភាព ក្នុងការគាំទ្រលើកិច្ចសហការក្នុងវិស័យអប់រំ បច្ចេកទេស និងធនធានមនុស្ស ពាក់ព័ន្ធនឹង បច្ចេកវិទ្យា ជំនាញនាវាចរណ៍ ទំនើបកម្មកម្មវិធីសិក្សា និងការបណ្តុះបណ្តាលគ្រូបង្គោល ជាដើម តាមរយ:ការផ្តល់ជាជំនួយបច្ចេកទេស ឬការផ្តល់ឥណទានពីរដ្ឋាភិបាលជប៉ុន៕
