ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ី បានធ្លាក់ថ្លៃចុះនៅថ្ងៃព្រហស្បតិ៍នេះ ខណៈអ្នកវិនិយោគ បានបន្ទាបការរំពឹងទុក និងឱកាសនៃការបញ្ចុះអត្រាការប្រាក់ដោយធនាគារកណ្តាលអាមេរិក(Fed)នៅដើមខែមីនាខាងមុខ។
ជាក់ស្តែង សន្ទស្សន៍ ភាគហ៊ុន អាស៊ី ប៉ាស៊ីហ្វិក របស់ក្រុមហ៊ុនអាមេរិក MSCI នៅ ក្រៅ ប្រទេស ជប៉ុន បាន ធ្លាក់ថ្លៃចុះ០,២៦ភាគរយ ក្នុងការជួញដូរនៅព្រឹកថ្ងៃព្រហស្បតិ៍នេះ។
ផ្សារហ៊ុន Nikkei របស់ប្រទេសជប៉ុនបានធ្លាក់ថ្លៃចុះ១ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ០,១ភាគរយ។
សន្ទស្សន៍ផ្សារហ៊ុនបន្ទះឈីបពណ៌ខៀវ CSI 300 របស់ប្រទេសចិនបានធ្លាក់ថ្លៃចុះ០,៣៧ភាគរយ ខណៈសន្ទស្សន៍ផ្សារហ៊ុន Shanghai Composite បានធ្លាក់ថ្លៃចុះ០,៧៧ភាគរយ។
ផ្សារហ៊ុនរបស់ប្រទេសអូស្ត្រាលី S&P/ASX 200 បានធ្លាក់ថ្លៃចុះ០,៣៤ភាគរយ ខណៈដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានធ្លាក់ថ្លៃចុះ០,៩៤ភាគរយ។
នៅពេលនេះ ទីផ្សារមើលឃើញឱកាសត្រឹមតែ៧០ភាគរយប៉ុណ្ណោះ នៃការកាត់បន្ថយអត្រាការប្រាក់នៅដើមខែមីនា ដោយធនាគារកណ្តាលអាមេរិក(Fed) បើធៀបនឹងឱកាស៩០ភាគរយកាលពីមួយសប្តាហ៍មុន។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណអាមេរិកធៀបនឹងគូប្រជែងចំនួន៦ ដូចជាប្រាក់អឺរ៉ូ និងប្រាក់យ៉េន បានងើបឡើង០,០៨៨% ដល់១០២,៤៩ពិន្ទុ នៅថ្ងៃព្រហស្បតិ៍នេះ បន្ទាប់ពីបានងើបឡើងដល់កម្រិតកំពូលក្នុងរយៈពេល៣សប្តាហ៍គឺ១០២,៧៣ពិន្ទុកាលពីថ្ងៃពុធ។
ចំណែកឯ តម្លៃប្រេងបានបន្តកើនឡើងនៅព្រឹកថ្ងៃព្រហស្បតិ៍នេះ ខណៈដែលអ្នកវិនិយោគកំពុងមានការព្រួយបារម្ភអំពីការផ្គត់ផ្គង់ប្រេងនៅតំបន់មជ្ឈិមបូព៌ា បន្ទាប់ពីការរំខាននៅអណ្តូងប្រេងរបស់ប្រទេសលីប៊ី។
ជាក់ស្តែង តម្លៃប្រេងឆៅប្រភេទ Brent បានកើនឡើង៣៣សេន ឬ០,៤២% ដល់៧៨,៥៨ដុល្លារក្នុងមួយបារ៉ែលគិតត្រឹមម៉ោងសកល 0101 GMT ខណៈតម្លៃប្រេងឆៅរបស់អាមេរិក West Texas Intermediate futures បានកើនឡើង៤០សេន ឬ០,៥៥% ដល់៧៣,១០ដុល្លារក្នុងមួយបារ៉ែល៕