ដោយៈ គង់ ម៉ាលីនណា
ភ្នំពេញៈ ការធ្វើជំរឿនសេដ្ឋកិច្ចនៅកម្ពុជាបានបង្ហាញថា សហគ្រាសអាជីវកម្ម ដែលកំពុងបើកដំណើរការនៅប្រទេសកម្ពុជាគិតត្រឹមថ្ងៃទី០១ ខែមីនា ឆ្នាំ២០២២ មានជាង៧៥ម៉ឺនសហគ្រាស។
លទ្ឋផលជំរឿន ដែលបានផ្សព្វផ្សាយកាលពីសប្តាហ៍មុនដោយនាយករដ្ឋមន្រ្តីកម្ពុជាបានបង្ហាញថា ក្នុងចំណោមអង្គភាពសេដ្ឋកិច្ចជាង៧៥ម៉ឺនសហគ្រាស គ្របដណ្តប់ដោយអង្គភាពសេដ្ឋកិច្ចធ្វើសកម្មភាពអាជីវកម្មតាមចិញ្ចើមផ្លូវ មានចំនួនជាង១០ភាគរយផងដែរ។
អង្គភាពសេដ្ឋកិច្ចដែលធ្វើសកម្មភាព អាជីវកម្មតាមចិញ្ចើមផ្លូវ គឺជាអង្គភាពអាជីវកម្ម ដែលមានលក្ខណៈដូចជា តូប ឬស្តង់ជាដើម ដែលមានទីតាំងអាជីវកម្មជាក់លាក់នៅលើចិញ្ចើមផ្លូវ។
យោងតាមតួលេខជំរឿនបានបង្ហាញទៀតថា អង្គភាពសេដ្ឋកិច្ចដែលធ្វើអាជីវកម្ម តាមចិញ្ចើមផ្លូវមានចំនួន១០,២% ស្មើ៧៧,០៧៣ សហគ្រាសនៃចំនួនអង្គភាពសេដ្ឋកិច្ចសរុប។ ក្នុងនោះស្ត្រីចូលរួមមានប្រមាណ៧៥% ហើយអ្នកចូលរួមការងារទំហំ១នាក់ ឬ២នាក់មានប្រមាណ៨៩%។
លទ្ឋផលជំរឿននេះបានបង្ហាញឲ្យដឹងផងដែរថា កម្ពុជាមានអង្គភាពសេដ្ឋកិច្ចចំនួន៧៥៣,៦៧០ សហគ្រាស គិតត្រឹមថ្ងៃទី០១ ខែមីនា ឆ្នាំ២០២២។ នេះបើយោងតាមរបាយការណ៍ជំរឿនសេដ្ឋកិច្ចឆ្នាំ ២០២២។
បើធៀបលទ្ធផលចុងក្រោយនៃជំរឿនសេដ្ឋកិច្ចឆ្នាំ ២០២២ ទៅនឹងលទ្ធផលនៃជំរឿនសេដ្ឋកិច្ចនៅឆ្នាំ២០១១ ចំនួនអង្គភាពសេដ្ឋកិច្ចនៅឆ្នាំ ២០២២ បានកើនឡើងប្រមាណ៤៩ភាគរយ ជាមួយនឹងអត្រាកំណើនប្រចាំឆ្នាំមាន៣,៧%។
ជាមួយគ្នានេះដែរ អ្នកចូលរួមការងារបានកើនឡើង៧០,៩% ដែលបណ្តាលឱ្យអត្រា កំណើនប្រចាំឆ្នាំមានប្រមាណ ៥% ដែលមានកម្រិតខ្ពស់ជាងអត្រាកំណើនប្រជាជន ដែលមានប្រមាណតែ១,៤% ប៉ុណ្ណោះ។
ការធ្វើជំរឿនសេដ្ឋកិច្ច ឆ្នាំ២០២២ គ្របដណ្ដប់លើអង្គភាពសេដ្ឋកិច្ច មានទីតាំងជាក់លាក់អចិន្ត្រៃយ៍ទាំងអស់ ដែលស្ថិតក្នុងដែនដីនៃព្រះរាជាណាចក្រកម្ពុជា។ លទ្ធផលចុងក្រោយ នៃការធ្វើជំរឿនសេដ្ឋកិច្ចឆ្នាំ២០២២ ត្រូវផ្សព្វផ្សាយបន្ទាប់ពីការប្រព្រឹត្តកម្ម ទិន្នន័យនិងវិភាគទិន្នន័យអស់រយៈពេលជាងមួយឆ្នាំ៕