ដោយៈ គង់ ហ្វីអូណា
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៧ ខែធ្នូ ឆ្នាំ២០២៣នេះ បានចុះអនុស្សរណៈយោគយល់គ្នា(MOU) ជាមួយនឹងអភិបាលក្រុងឈុនឆន់ ខេត្តកាំងវ៉ុន នៃធារណរដ្ឋកូរ៉េ។
ការចុះMOUនេះ ដើម្បីផ្តល់ឱកាសជូនពលរដ្ឋកម្ពុជា ដែលមានបំណងទៅធ្វើការជាពលករ រដូវកាលនៅប្រទេសកូរ៉េខាងត្បូង។ ពិធីចុះអនុស្សរណៈនេះ គឺធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។
ក្នុងពីធីចុះអនុស្សរណៈនោះ លោកហេង សួរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងអំរណរគុណដល់លោក Yook, Dong Han អភិបាលក្រុងឈុនឆន់ ចំពោះការទទួលយកពលករពីកម្ពុជានាពេលនេះ។
ក្រៅពីការជ្រើសរើសពលកររដូវកាល រដ្ឋមន្ត្រីបានជំរុញឱ្យលោកអភិបាលក្រុងពិនិត្យក្នុងការជំរុញ ឱ្យរោងចក្រសហគ្រាសក្នុងក្រុងទទួលយកពលករជំនាញរបស់កម្ពុជា(E7)ផងដែរ។
ទន្ទឹមនឹងនោះ លោកអភិបាលក្រុង បានថ្លែងអំណរគុណចំពោះលោករដ្ឋមន្ត្រី សម្រាប់កិច្ចសហការ ប្រកបដោយទំនុកចិត្តរបស់ក្រសួងនាពេលនេះ ខណៈដែលក្រសួង ធ្លាប់មានបទពិសោធន៍គ្រប់គ្រាន់លើការបញ្ជូនពលករ ទៅបម្រើការងារនៅសាធារណៈរដ្ឋកូរ៉េក្រោមប្រព័ន្ធអនុញ្ញាតមុខរបរ(ESP) រួមទាំងការចុះអនុស្សរណៈ នៃការយោគយល់ស្តីពី ការបញ្ជូនពលកររដូវកាលជាមួយក្រុង និងស្រុករបស់កូរ៉េជាច្រើនមកហើយ។
រាល់ការបញ្ជូនពលករកម្ពុជា ទៅក្រៅប្រទេសទាំងអស់ជាពិសេសប្រទេសកូរ៉េ គឺគួរតែឆ្លងកាត់ក្រសួងការងារ និងបណ្តុះបណ្តាលវិជ្ជាជីវៈដើម្បីធានាពីប្រសិទ្ធិភាព និងការការពារសិទ្ធិពលករ៕
