ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃនៅថ្ងៃព្រហស្បតិ៍នេះ ដែលត្រូវបានជំរុញដោយការធ្លាក់ថ្លៃចុះនៃប្រាក់ដុល្លារអាមេរិក ស្របពេលមានការរំពឹងទុកថា ធនាគារ Federal Reserve នឹងបញ្ចុះអត្រាការប្រាក់នៅឆ្នាំក្រោយ។
តួយ៉ាង តម្លៃមាស Spot Gold បានងើបឡើង០,៥% ដល់២០៧៧,០១ដុល្លារ ក្នុងមួយអោន ខណៈតម្លៃហាងឆេង មាស របស់ សហរដ្ឋ អាមេរិក U.S. gold futures បាន ងើបឡើង១,១%ដល់២០៩៣,១០ដុល្លារក្នុងមួយអោន។
ក្រុមអ្នកវិភាគបានលើកឡើងថា កត្តាចម្បង ដែលជំរុញឱ្យតម្លៃហាងឆេងមាសហក់ឡើងខ្ពស់ គឺការរំពឹងទុក ដែលថា ធនាគារកណ្តាលអាមេរិកនឹងបញ្ចុះអត្រាការប្រាក់របស់ខ្លួនក្នុងឆ្នាំ២០២៤ខាងមុខ។
កាលណាអត្រាការប្រាក់របស់សហរដ្ឋអាមេរិកធ្លាក់ចុះ នោះវានឹងជួយបង្កើនភាពទាក់ទាញនៃដុំមាស ដែលត្រូវបានគេចាត់ទុកជា ការវិនិយោគដ៏មានសុវត្ថិភាពផងដែរ នៅក្នុងគ្រាមានវិបត្តិសេដ្ឋកិច្ច និងវិបត្តិភូមិសាស្ត្រនយោបាយ។
យោងតាមទិន្នន័យដែលបានចេញផ្សាយកាលពីសប្តាហ៍មុនបានបង្ហាញថា តម្លៃទំនិញនៅសហរដ្ឋអាមេរិកបានធ្លាក់ចុះក្នុងខែវិច្ឆិកា ជាលើកដំបូង ក្នុងរយៈពេលជាង៣ឆ្នាំកន្លះ ដែលធ្វើឱ្យអតិផរណាមានការថយចុះបន្ថែមទៀត និងជំរុញការរំពឹងទុកនៃការបញ្ចុះអត្រាការប្រាក់ដោយធនាគារ Fed នៅខែមីនាខាងមុខ។
នៅពេលនេះ ក្រុមពាណិជ្ជករកំពុងមើលឃើញឱកាសចំនួន៨៩% នៃការកាត់បន្ថយអត្រាការប្រាក់ដោយធនាគារកណ្តាលអាមេរិក ក្នុងខែមីនា ឆ្នាំ២០២៤។ នេះបើយោងតាមឧបករណ៍ CME FedWatch ។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិកធៀបនឹងរូបិយប័ណ្ណសំខាន់ៗចំនួន៦ ដូចជាប្រាក់អឺរ៉ូ និងប្រាក់យ៉េន បានធ្លាក់ថ្លៃចុះដល់កម្រិតទាបបំផុតក្នុងរយៈពេល៥ខែ គឺ១០០,៨១ពិន្ទុនៅព្រឹកថ្ងៃព្រហស្បតិ៍នេះ។
តម្លៃលោហធាតុប្រាក់ Spot silver បានងើបឡើង០,១% ទៅដល់២៤,២២ដុល្លារក្នុងមួយអោន ខណៈតម្លៃផ្លាទីនបានងើបឡើង១,៧% ដល់៩៩៤,៩១ដុល្លារក្នុងមួយអោន ហើយតម្លៃPalladium បានធ្លាក់ចុះ២,១% ដល់១១៤៩,៣០ដុល្លារក្នុងមួយអោន៕
