ដោយៈ គង់ ម៉ាលីនណា
ភ្នំពេញៈ ធនាគារ DEUTSCHE BANK AG របស់អាល្លឺម៉ង់ដែលមានសាខាក្នុងប្រទេសសិង្ហបុរី បានសម្រេចផ្តល់កម្ចីក្នុងអត្រាការប្រាក់ទាបចំនួន៥០លានដុល្លារ ដល់ក្រុមហ៊ុនCAMGSM ជាក្រុមហ៊ុន ចុះបញ្ជីភាគហ៊ុនក្នុងស្រុក ដើម្បីយកទៅពង្រីកប្រព័ន្ធបណ្តាញបច្ចេកវិទ្យារបស់ខ្លួន។
យោងតាមឯកសារបានពីក្រុមហ៊ុន ដែលផ្ញើទៅផ្សារមូលបត្រកម្ពុជា (CSX) កាលពីថ្ងៃទី២៦ ខែធ្នូបានឲ្យដឹងថា ក្រុមហ៊ុន CAMGSM Plcសម្រេចបានកិច្ចព្រមព្រៀងមួយ ជាមួយធនាគារ DEUTSCHE BANK AG សាខាប្រទេសសិង្ហបុរី កាលពីថ្ងៃទី២២ ខែធ្នូ ឆ្នាំ២០២៣ ក្នុងតម្លៃកម្ចីចំនួន៥០លានដុល្លារ សម្រាប់រយៈពេល១០ឆ្នាំ ចាប់ពីថ្ងៃទី ២២ ខែធ្នូ ឆ្នាំ២០២៣ ដល់ថ្ងៃទី១ ខែកុម្ភៈ ឆ្នាំ២០៣៤ ហើយអត្រាការប្រាក់ចំនួន៣ភាគរយ+ SOFR រយៈពេល ៦ ខែ។
ក្រុមហ៊ុននេះ បានឱ្យដឹងនៅក្នុងឯកសារនេះថា “ប្រាក់កម្ចីរយៈពេលវែងនេះ មានគោលបំណងផ្តល់ហិរញ្ញប្បទាន ដល់ការចំណាយដើមទុនសម្រាប់ការពង្រីកប្រព័ន្ធបណ្តាញបច្ចេកវិទ្យា”។
លោកហុង សុហួរ អគ្គនាយក CSX បានមានប្រសាសន៍ឲ្យដឹងថា ទោះបីជាក្រុមហ៊ុនត្រូវបានចុះ បញ្ជីលើផ្សារហ៊ុននេះក៏ដោយ ក៏ពួកគេនៅតែអាចទទួលយកហិរញ្ញប្បទាន ឬកម្ចីពីប្រភពណាមួយដើម្បីគាំទ្រដល់កំណើនអាជីវកម្មរបស់ពួកគេដែរ។
លោកថ្លែងថា “ជាធម្មតា ក្រុមហ៊ុនណាមួយដែលបានចុះបញ្ជីនៅតែមានលទ្ធភាពទទួលយកប្រាក់កម្ចី ឬហិរញ្ញប្បទានពីស្ថាប័នហិរញ្ញវត្ថុផ្សេងទៀត ដើម្បីគាំទ្រដល់ការពង្រីកអាជីវកម្មរបស់ពួកគេ ពីព្រោះពួកគេ មិនអាចប្រើប្រាស់មូលនិធិ ដែលពួកគេប្រមូលបានពីទីផ្សារមូលធនតែមួយមុខ ដើម្បីគាំទ្រអាជីវកម្មរបស់ពួកគេបានទេ”៕
