ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃនៅថ្ងៃពុធនេះ ដែលត្រូវបានជំរុញដោយការធ្លាក់ថ្លៃចុះនៃប្រាក់ដុល្លារអាមេរិក ស្របពេលមានការរំពឹងទុកថា ធនាគារ Federal Reserve នឹងកាត់បន្ថយអត្រាការប្រាក់នៅឆ្នាំក្រោយ។
តួយ៉ាង តម្លៃមាស Spot Gold បានងើបឡើង០,៣% ដល់២០៥៨,១៧ដុល្លារ ក្នុងមួយអោន ខណៈតម្លៃហាងឆេង មាស របស់ សហរដ្ឋ អាមេរិក U.S. gold futures បាន ប្រែប្រួល តិចតួច មកនៅ ត្រឹម២០៦៩,៤ដុល្លារក្នុងមួយអោន។
អ្នកវិភាគបានលើកឡើងថា កត្តាចម្បងដែលជំរុញគាំទ្រតម្លៃមាសឱ្យហក់ឡើងខ្ពស់ គឺការរំពឹងទុកដែលថា ធនាគារកណ្តាលអាមេរិកនឹងបញ្ចុះអត្រាការប្រាក់របស់ខ្លួនក្នុងឆ្នាំ២០២៤ខាងមុខ។
កាលណាអត្រាការប្រាក់របស់សហរដ្ឋអាមេរិកធ្លាក់ចុះ នោះវានឹងជួយបង្កើនភាពទាក់ទាញនៃដុំមាស ដែលត្រូវបានគេចាត់ទុកជា ការវិនិយោគដ៏មានសុវត្ថិភាពផងដែរ នៅក្នុងគ្រាមានវិបត្តិសេដ្ឋកិច្ច និងវិបត្តិភូមិសាស្ត្រនយោបាយ។
យោងតាមទិន្នន័យដែលបានចេញផ្សាយកាលពីសប្តាហ៍មុនបានបង្ហាញថា តម្លៃទំនិញនៅសហរដ្ឋអាមេរិកបានធ្លាក់ចុះក្នុងខែវិច្ឆិកា ជាលើកដំបូង ក្នុងរយៈពេលជាង៣ឆ្នាំកន្លះ ដែលធ្វើឱ្យអតិផរណាមានការថយចុះបន្ថែមទៀត និងជំរុញការរំពឹងទុកនៃការបញ្ចុះអត្រាការប្រាក់ដោយធនាគារ Fed នៅខែមីនាខាងមុខ។
នៅពេលនេះ ក្រុមពាណិជ្ជករកំពុងមើលឃើញឱកាសចំនួន៧៩% នៃការកាត់បន្ថយអត្រាការប្រាក់ដោយធនាគារកណ្តាលអាមេរិក ក្នុងខែមីនា ឆ្នាំ២០២៤។ នេះបើយោងតាមឧបករណ៍ CME FedWatch ។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិកធៀបនឹងរូបិយប័ណ្ណសំខាន់ៗចំនួន៦ ដូចជាប្រាក់អឺរ៉ូ និងប្រាក់យ៉េន បានស្ថិតនៅត្រឹម១០១,៥៤ពិន្ទុនៅថ្ងៃពុធនេះ ក្រោយពីធ្លាក់ថ្លៃចុះដល់កម្រិតទាបបំផុតក្នុងរយៈពេល៥ខែ គឺ១០១,៤២ពិន្ទុកាលពីសប្តាហ៍មុន។
តម្លៃលោហធាតុប្រាក់ Spot silver បានធ្លាក់ចុះ១,២% ទៅដល់២៤,១២ដុល្លារក្នុងមួយអោន ខណៈតម្លៃផ្លាទីនបានងើបឡើង០,៧% ដល់៩៦៩,៦៧ដុល្លារក្នុងមួយអោន ហើយតម្លៃPalladium បានធ្លាក់ចុះ០,៩% ដល់១២០២,៤៦ដុល្លារក្នុងមួយអោន៕
