ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានធ្លាក់ថ្លៃចុះនៅថ្ងៃពុធនេះ ខណៈអ្នកវិនិយោគកំពុងរង់ចាំមើលលទ្ធផលនៃកិច្ចប្រជុំគោលនយោបាយរបស់ធនាគារកណ្តាលអាមេរិក(Fed)។
ជាក់ស្តែង សន្ទស្សន៍ ភាគហ៊ុន អាស៊ី ប៉ាស៊ីហ្វិក របស់ក្រុមហ៊ុនអាមេរិក MSCI នៅ ក្រៅ ប្រទេស ជប៉ុន បាន ធ្លាក់ថ្លៃចុះ០,១៣ភាគរយ ក្នុងការជួញដូរនៅព្រឹកថ្ងៃពុធនេះ។
ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,៥២ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ០,៥១ភាគរយ។
សន្ទស្សន៍ផ្សារហ៊ុនបន្ទះឈីបពណ៌ខៀវ CSI 300 របស់ប្រទេសចិនបានធ្លាក់ថ្លៃចុះ០,៧៤ភាគរយ ខណៈសន្ទស្សន៍ផ្សារហ៊ុន Shanghai Composite បានធ្លាក់ថ្លៃចុះ០,៤៦ភាគរយ។
ផ្សារហ៊ុនរបស់ប្រទេសអូស្ត្រាលី S&P/ASX 200 បានងើបឡើងថ្លៃ០,៤៥ភាគរយ ខណៈដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានធ្លាក់ថ្លៃចុះ០,២៧ភាគរយ។
កំណើនការងារនៅសហរដ្ឋអាមេរិកបានបង្កើនល្បឿន នៅក្នុងខែវិច្ឆិកា ខណៈដែលអត្រាអ្នកអត់ការងារធ្វើបានធ្លាក់ចុះដល់៣,៧% ដែលជាសញ្ញាបង្ហាញពីភាពរឹងមាំនៃទីផ្សារការងារមូលដ្ឋាន និងជំរុញឱ្យក្រុមពាណិជ្ជករភ្នាល់ថា ធនាគារ Federal Reserve អាចនឹងពន្យារពេលរហូតដល់ខែឧសភា ដើម្បីចាប់ផ្តើមការបញ្ចុះអត្រាការប្រាក់ជាលើកដំបូងរបស់ខ្លួន។
សន្ទស្សន៍តម្លៃទំនិញប្រើប្រាស់ (CPI) នៅសហរដ្ឋអាមេរិក បានកើនឡើង៣,១% នៅក្នុងខែវិច្ឆិកា លើមូលដ្ឋានប្រចាំឆ្នាំ ស្របតាមការរំពឹងទុករបស់ក្រុមសេដ្ឋវិទូ។ សន្ទស្សន៍តម្លៃទំនិញប្រើប្រាស់ (CPI) ក្នុងខែវិច្ឆិកាបានកើនឡើង០,១%បើធៀបនឹងតុលា។
ធនាគារកណ្តាលអាមេរិក (Fed) ត្រូវបានគេរំពឹងថា នឹងរក្សាទុកឱ្យអត្រាការប្រាក់ឱ្យនៅថេរដដែល ក្នុងសប្តាហ៍នេះ ហើយទីផ្សារមើលឃើញឱកាសប្រហែល៨០% ដែលធនាគារនេះអាចនឹងបញ្ចុះអត្រាការប្រាក់នៅក្នុងខែឧសភា ឆ្នាំ២០២៤ខាងមុខ។
សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងប្រាក់អឺរ៉ូ ប្រាក់យ៉េន និងរូបិយប័ណ្ណ៤ផ្សេងទៀត បានស្ថិតនៅទ្រឹងត្រឹម១០៣,៨២ពិន្ទុ បន្ទាប់ពីបានធ្លាក់ថ្លៃចុះ០,៣១ភាគរយពេញមួយយប់។
តម្លៃប្រេងបានបន្តធ្លាក់ចុះនៅថ្ងៃពុធនេះ បន្ទាប់ពីបានធ្លាក់ចុះជាង៣ភាគរយដល់កម្រិតទាបបំផុតក្នុងរយៈពេល៦ខែនៅក្នុងវគ្គមុន ដោយសារការផ្គត់ផ្គង់លើសតម្រូវការ និងការព្រួយបារម្ភអំពីនៃការថយចុះតម្រូវការប្រេង។
តម្លៃប្រេងឆៅ Brent futures សម្រាប់ខែកុម្ភៈបានធ្លាក់ចុះ១សេនដល់៧៣,២៣ដុល្លារក្នុងមួយបារ៉ែលគិតត្រឹមម៉ោងសកល 0207 GMT ខណៈតម្លៃប្រេងឆៅរបស់អាមេរិក West Texas Intermediate futures សម្រាប់ខែមករាបានធ្លាក់ចុះ២សេនមកនៅត្រឹម៦៨,៥៩ដុល្លារក្នុងមួយបារ៉ែល៕