តម្លៃប្រេងធ្លាក់ចុះ ខណៈផ្សារហ៊ុននៅតំបន់អាសុីបានងើបឡើងថ្លៃ នៅថ្ងៃអង្គារនេះ

ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាសុីបាន ងើបឡើងថ្លៃនៅថ្ងៃអង្គារនេះ ខណៈដែលអ្នកវិនិយោគកំពុងរង់ចាំការផ្តល់តម្រុយបន្ថែមទៀតពីធនាគារកណ្តាលអាមេរិក(Fed) ជុំវិញគោលនយោបាយអត្រាការប្រាក់នាពេលខាងមុខ។

សន្ទស្សន៍ភាគហ៊ុនអាស៊ីប៉ាស៊ីហ្វិករបស់ក្រុមហ៊ុនអាមេរិក MSCI នៅខាងក្រៅប្រទេសជប៉ុនបានងើបឡើងថ្លៃ០,៩១ភាគរយ ដល់៥០៩,៨២ពិន្ទុ ដែលជាកម្រិតខ្ពស់បំផុត
គិតចាប់តាំងពីថ្ងៃទី១៨ ខែកញ្ញា។

ផ្សារហ៊ុន Nikkei របស់ប្រទេសជប៉ុនបានធ្លាក់ថ្លៃចុះ០,១៥ភាគរយ ខណៈសន្ទស្សន៍ផ្សារហ៊ុន Hang Seng របស់ទីក្រុងហុងកុងបានងើបឡើងថ្លៃ១,២៥ភាគរយ។

សន្ទស្សន៍ផ្សារហ៊ុនបន្ទះឈីបពណ៌ខៀវ CSI 300 របស់ប្រទេសចិនបានងើបឡើងថ្លៃ០,៦៦ភាគរយ ខណៈសន្ទស្សន៍ផ្សារហ៊ុន Shanghai Composite បានងើបឡើងថ្លៃ០,៣៧ភាគរយ។

ផ្សារហ៊ុនរបស់ប្រទេសអូស្ត្រាលី S&P/ASX 200 បានងើបឡើងថ្លៃ០,៣៤ភាគរយ។ ចំណែកឯផ្សារហ៊ុនរបស់ប្រទេសជប៉ុន TOPIX បានធ្លាក់ថ្លៃចុះ០,៣៥ភាគរយ ខណៈដែលសន្ទស្សន៍ផ្សារហ៊ុនKOSPI របស់ប្រទេសកូរ៉េខាងត្បូងបានងើបឡើងថ្លៃ០,៩៤ភាគរយ។

ផលប័ត្រនៅលើប័ណ្ណរតនាគាររយៈពេល១០ឆ្នាំបានធ្លាក់ចុះ១,២ពិន្ទុមូលដ្ឋានមកនៅត្រឹម៤,៤១ភាគរយ ខណៈពេលដែលផលប័ត្រនៅលើប័ណ្ណរតនាគាររយៈពេល៣០ឆ្នាំបានធ្លាក់ចុះ២,១ពិន្ទុមូលដ្ឋានដល់៤,៥៤៤ភាគរយ។

ទីផ្សាររំពឹងថា ធនាគារ Fed នឹងរក្សាទុកអត្រាការប្រាក់ឱ្យនៅថេរ ក្នុងកិច្ចប្រជុំគោលនយោបាយប្រចាំខែធ្នូខាងមុខ និងមើលឃើញឱកាសធំជាង៥០% ដែលធនាគារ Fed អាចនឹងកាត់បន្ថយអត្រាការប្រាក់យ៉ាងហោចណាស់២៥ពិន្ទុមូលដ្ឋាន នៅខែឧសភា ឆ្នាំ២០២៤។ នេះបើយោងតាមគេហទំព័រ FedWatch របស់ CME ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណអាមេរិកធៀបនឹងកញ្ចប់រូបិយប័ណ្ណសំខាន់ៗចំនួន៦ បានធ្លាក់ថ្លៃចុះ០,០៥៨ភាគរយមកនៅត្រឹម១០៣,៣៧ពិន្ទុ។

ចំណែកឯ តម្លៃប្រេងបានធ្លាក់ចុះនៅថ្ងៃអង្គារនេះ។ តួយ៉ាង តម្លៃប្រេងឆៅរបស់សហរដ្ឋអាមេរិកបានធ្លាក់ចុះ០,០៥ភាគរយមកនៅត្រឹម៧៧,៧៩ដុល្លារក្នុងមួយបារ៉ែល ហើយតម្លៃប្រេងឆៅ Brent បានធ្លាក់ចុះ០,១១ភាគរយដល់៨២,២៣ដុល្លារក្នុងមួយបារ៉ែល៕