ដោយ: គង់ លាងហួរ
អន្តរជាតិ: ចំនួនជនបរទេសដែលរស់នៅក្នុងប្រទេសជប៉ុនបានកើនឡើងដល់កម្រិតខ្ពស់បំផុតជាង៣,២លាននាក់ក្នុងឆ្នាំនេះ ខណៈកម្មករកាន់តែច្រើនឡើងបានសម្រុកចូលទៅកាន់ទឹកដីជប៉ុនដើម្បីបំពេញកង្វះកម្លាំងពលកម្មរបស់ប្រទេសនេះ។
គិតត្រឹមដំណាច់ខែមិថុនា ជនបរទេសចំនួន៣.២២៣.៨៥៨នាក់បានរស់នៅក្នុងប្រទេសជប៉ុន ពោលគឺកើនឡើងចំនួន១៤៨.៦៤៥នាក់ បើធៀបនឹងចុងខែធ្នូ ឆ្នាំ២០២២។ នេះបើយោងតាមទីភ្នាក់ងារសេវាកម្មអន្តោប្រវេសន៍របស់ជប៉ុន។
ការកើនឡើងដ៏គួរឱ្យកត់សម្គាល់នេះត្រូវបានគេមើលឃើញនៅក្នុងចំនួនកម្មករជំនាញជាក់លាក់ ដែលអាចទទួលបានការងារភ្លាមៗនៅក្នុងឧស្សាហកម្មដែលបានកំណត់ ដោយមិនចាំបាច់មានការបណ្តុះបណ្តាល ក៏ដូចជាសិក្ខាកាមដែលចូលរួមក្នុងកម្មវិធីកម្មសិក្សាបច្ចេកទេសរបស់ប្រទេសជប៉ុន។
បើគិតតាម ស្ថានភាព រស់នៅ គេសង្កេតឃើញថា អ្នក រស់នៅ អចិន្ត្រៃយ៍ គឺជា ក្រុម ធំជាងគេ បំផុត ដែលមានចំនួន ៨៨០.១៧៨នាក់ ពោលគឺកើនឡើង១,៩ ភាគរយ បើធៀប នឹង ខែធ្នូ ឆ្នាំ២០២២។
បើគិតតាមប្រភេទទិដ្ឋាការការងារ អ្នកហាត់ការបច្ចេកទេសមានចំនួនសរុប៣៥៨.១៥៩នាក់ កើនឡើង១០,២ភាគរយ ហើយវិស្វករ អ្នកឯកទេសផ្នែកមនុស្សសាស្ត្រ និងសេវាកម្មអន្តរជាតិ រួមទាំងគ្រូបង្រៀនភាសាបរទេសបានកើនឡើង១០,៩ភាគរយដល់៣៤៦.១១៦នាក់។
បើក្រឡេកទៅមើលអំពីសញ្ជាតិវិញ គេសង្កេតឃើញថា ជនជាតិចិនមានចំនួនច្រើនជាងគេបំផុតនៅក្នុងប្រទេសជប៉ុន បន្ទាប់មកគឺជនជាតិវៀតណាម និងកូរ៉េខាងត្បូង៕