ដោយ: គង់ លាងហួរ
សិង្ហបុរី: ផ្សារហ៊ុននៅតំបន់អាស៊ីបានធ្លាក់ថ្លៃចុះ នៅថ្ងៃពុធនេះ ខណៈដែលធនាគារកណ្តាលអាមេរិក(Fed) ក៏គ្រោងបង្ហាញការសម្រេចចិត្តលើគោលនយោបាយ អត្រាការប្រាក់របស់ខ្លួននៅថ្ងៃនេះផងដែរ។
សន្ទស្សន៍ភាគហ៊ុនអាស៊ីប៉ាស៊ីហ្វិក របស់ក្រុមហ៊ុនអាមេរិក MSCI នៅខាងក្រៅប្រទេសជប៉ុន បានធ្លាក់ថ្លៃចុះ០,១៣ភាគរយ ខណៈផ្សារហ៊ុន Nikkei របស់ប្រទេសជប៉ុន បានងើបឡើងថ្លៃ២ភាគរយ។
ផ្សារហ៊ុនរបស់ប្រទេសចិន បានធ្លាក់ថ្លៃចុះ០,១៥ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ០,៧៥ភាគរយ។
ផលប័ត្រនៅលើប័ណ្ណរតនាគាអាមេរិក រយៈពេល១០ឆ្នាំបានកើនឡើង៥,៤ពិន្ទុមូលដ្ឋាន ដល់៤,៩២ភាគរយ ខណៈផលប័ត្រនៅលើប័ណ្ណរតនាគាររយៈពេល៣០ឆ្នាំ បានកើនឡើង៦,៦ពិន្ទុមូលដ្ឋានដល់៥,០៩ភាគរយ។
សន្ទស្សន៍ប្រាក់ដុល្លារ ដែលវាស់រូបិយប័ណ្ណអាមេរិកធៀបនឹងកញ្ចប់រូបិយប័ណ្ណសំខាន់ៗ បានងើបឡើង០,០៥៦ភាគរយដល់១០៦,៧៣ពិន្ទុ។ ចំណែកប្រាក់ Sterling របស់ប្រទេសអង់គ្លេស បានធ្លាក់ថ្លៃចុះ០,១៣% នៅថ្ងៃពុធនេះ។
ប្រាក់យ៉េនបានងើបឡើងថ្លៃ០,២៧% ដល់១៥១,២៦យ៉េន ក្នុងមួយដុល្លារ នៅថ្ងៃពុធនេះ បន្ទាប់ពីបានធ្លាក់ថ្លៃចុះ ដល់កម្រិតទាបបំផុតក្នុងរយៈពេល១ឆ្នាំ គឺ១៥១,៧៤យ៉េន ក្នុងមួយដុល្លារ កាលពីថ្ងៃអង្គារម្សិលមិញនេះ។
ចំណែក តម្លៃប្រេងបានកើនឡើងនៅថ្ងៃពុធនេះ ស្របពេលដែលទីផ្សារកំពុងតាមដានយ៉ាងដិតដល់ លើការវិវឌ្ឍចុងក្រោយបំផុតក្នុងជម្លោះ រវាងប្រទេសអ៊ីស្រាអែល និងក្រុមហាម៉ាស។
ជាក់ស្តែង តម្លៃប្រេងឆៅរបស់អាមេរិក បានកើនឡើង០,២៨ភាគរយ ដល់៨១,២៥ដុល្លារក្នុងមួយបារ៉ែល ហើយតម្លៃប្រេងឆៅ Brent បានកើនឡើង០,៣៥ភាគរយ ដល់៨៥,៣២ដុល្លារក្នុងមួយបារ៉ែល៕
