ដោយៈ គង់ ម៉ាលីនណា
ភ្នំពេញៈ ទិន្នន័យពីអគ្គនាយកដ្ឋានគយ និងរដ្ឋាករកម្ពុជា (GDCE) បានឱ្យដឹងថា ការនាំចេញ-នាំចូលទំនិញរវាងកម្ពុជា-ជប៉ុន ក្នុងរយៈពេល៩ខែ ដើមឆ្នាំ២០២៣ សម្រេចបានជាង១,៣៧ ពាន់លានដុល្លារ។
ទំហំទឹកប្រាក់នេះ បានបង្ហាញពីការធ្លាក់ចុះ៨,៣ភាគរយ បើធៀបរយៈពេលដូចគ្នាកាលពីឆ្នាំមុន ក្នុងនោះកម្ពុជានាំទៅជប៉ុន ៨៨៥,៧៤ លានដុល្លារ ធ្លាក់ចុះ១,៣ភាគរយ និងជប៉ុន នាំចូលមកកម្ពុជា៤៨១,១លានដុល្លារ ធ្លាក់ចុះ១៨,៨ភាគរយ។
ផ្អែកតាមតួលេខខាងលើ គឺជញ្ជីងពាណិជ្ជកម្មកម្ពុជា មានឧត្តមភាព៤០៤,៦៤លានដុល្លារ។ ជប៉ុន គឺជាដៃគូពាណិជ្ជកម្មធំជាងគេទី៥ របស់កម្ពុជា បន្ទាប់ពីប្រទេសចិន អាមេរិក វៀតណាម និងថៃ។
ធនាគារជាតិនៃកម្ពុជា (NBC) បានឱ្យដឹងថា គិតត្រឹមត្រីមាសទី១ ឆ្នាំ២០២៣ ជប៉ុនគឺជាប្រទេសដែលមានវិនិយោគផ្ទាល់ នៅកម្ពុជា ច្រើនជាងគេទី៤ ដោយមានទឹកប្រាក់សរុប១១,៣ទ្រីលានរៀល កើនឡើង១១,៦ភាគរយ ធៀបរយៈពេលដូចគ្នាឆ្នាំ២០២២ បន្ទាប់ពីប្រទេសចិន កូរ៉េ និងសិង្ហបុរី៕
