ដោយ: គង់ លាងហួរ
អន្តរជាតិ: នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម កាលពីថ្ងៃសុក្រ ទី១៣ ខែតុលាកន្លងទៅ បានរៀបចំជាតារាងថវិកាជាតិដ៏ធំបំផុត មិនធ្លាប់មានរបស់ប្រទេសនេះ និងផែនការដំឡើងពន្ធសម្រាប់ឆ្នាំ២០២៤ខាងមុខ។
ក្នុងចំណោមវិធានការនានា ដែលបានប្រកាសរួមមានការដំឡើងពន្ធលើការលក់ និងសេវាកម្ម (SST) ពី៦ភាគរយទៅដល់៨ភាគរយ ទោះបីជាវានឹងមិនរាប់បញ្ចូលអាហារ និងភេសជ្ជៈ ឬទូរគមនាគមន៍ក៏ដោយ។
ពន្ធលើផលចំណេញមូលធនលើភាគហ៊ុន ដែលមិនបានចុះបញ្ជីក៏នឹងត្រូវបានដាក់ឱ្យអនុវត្តផងដែរ ក្នុងអត្រា១០ភាគរយចាប់ពីថ្ងៃទី១ ខែមីនាឆ្នាំក្រោយ។
លោកបានបន្តថា ដោយឡែកពីគ្នា ការយកពន្ធលើទំនិញដែលមានតម្លៃខ្ពស់ នឹងដាក់ឱ្យអនុវត្តន៍ពី៥ ទៅដល់១០ភាគរយ លើទំនិញមួយចំនួនដូចជាគ្រឿងអលង្ការ និងនាឡិកាផងដែរ។
ជាមួយគ្នានេះ ប្រទេសម៉ាឡេស៊ី បានកំណត់ថវិកាវិត្ថារកម្មសម្រាប់ឆ្នាំ២០២៤ ចំនួន៣៩៣,៨ពាន់លានរីងហ្គីត (៨៣,២៩ពាន់លានដុល្លារ) ពោលគឺកើនលើសពីថវិកា ចំនួន៣៨៨,១ពាន់លានរីងហ្គីត ដែលត្រូវបានបញ្ចេញសម្រាប់ឆ្នាំ២០២៣នេះ កាលពីខែកុម្ភៈ ដែលជាចំនួនទឹកប្រាក់ដ៏ច្រើនបំផុត។
លោកអាន់វ៉ា អ៊ីប្រាហ៊ីម ដែលជារដ្ឋមន្ត្រីហិរញ្ញវត្ថុរបស់ប្រទេសម៉ាឡេស៊ីផងដែរបានប្រកាសថា ទឹកប្រាក់៣០៣,៨ពាន់លានរីងហ្គីត ដែលស្មើប្រហែល៧៧ភាគរយ នៃថវិកាជាតិសរុបនៅឆ្នាំក្រោយ នឹងត្រូវបានបែងចែក សម្រាប់ការចំណាយប្រតិបត្តិការ ខណៈដែល៩០ពាន់លានរីងហ្គីតទៀត គឺសម្រាប់ការចំណាយលើការអភិវឌ្ឍន៍។
នៅក្នុងសុន្ទរកថារបស់លោក លោក អាន់វ៉ា បានសង្កត់ធ្ងន់ថា មានតែតាមរយៈការកាត់បន្ថយឱនភាព និងបំណុលរបស់ប្រទេសប៉ុណ្ណោះ ទើបរដ្ឋាភិបាលអាចស្តារឡើងវិញ នូវជំហរសារពើពន្ធប្រកបដោយនិរន្តរភាពរបស់ខ្លួន៕
